ଖସିବା ପାଇଁ ଗଂଜେଇ ମାଫିଆଙ୍କ ଅଜବ ନୀତି: ଚଢଉ ସମୟରେ ଛାଡିଦେଲେ ଦୁଇ ପୋଷା କୁକୁର, ଆକ୍ରମଣରେ ଜଣେ ଅଧିକାରୀ ଓ ଦୁଇ କର୍ମଚାରୀ ଆହତ
ନୀଳଗିରି : ନୀଳଗିରି ସହରରେ ଜଣେ ଗଂଜେଇ ମାଫିଆଙ୍କ ଘରେ ଚଢଉ କରିବାକୁ ଯାଇ ଅବକାରୀ ବିଭାଗ ଅଧିକାରୀ ଓ କର୍ମଚାରୀ ଅଭାବନୀୟ ପରିସ୍ଥିତିର ସମ୍ମୁଖୀନ ହୋଇଛନ୍ତି। ଗିରଫକୁ ଏଡାଇବା ପାଇଁ ଗଂଜେଇ ମାଫିଆ ୨ ପୋଷା କୁକୁରଙ୍କୁ ଛାଡି ଦେଇଥିଲା। କୁକୁର ଆକ୍ରମଣରେ ଜଣେ ଅଧିକାରୀଙ୍କ ସହ ୨ ଜଣ କର୍ମଚାରୀ ଆହତ ହୋଇଛନ୍ତି। ତେବେ କୁକୁର ଆକ୍ରମଣ ପରେ ବି ଭୟଭୀତ ନ ହୋଇ ଅଧିକାରୀ ଓ କର୍ମଚାରୀ ଚଢଉ କରିଥିଲେ। ଗଂଜେଇ ମାଫିଆ ନିରଞ୍ଜନ ବେହେରାକୁ ଗିରଫ କରାଯିବା ସହ ତାଙ୍କ ଘରୁ ୩ ବସ୍ତା ଗଂଜେଇ ଜବତ କରିଥିଲେ। ଜବତ ୪୩ କିଲୋ ଗଂଜେଇର ମୂଲ୍ୟ ୨ ଲକ୍ଷ ୧୫ ହଜାର ଟଙ୍କା ହେବ ବୋଲି ବିଭାଗ ପକ୍ଷରୁ କୁହାଯାଇଛି। ଗିରଫରୁ ବର୍ତ୍ତିବା ପାଇଁ ଗଂଜେଇ ମାଫିଆ ନିରଞ୍ଜନ ବେହେରାଙ୍କ ଅଜବ ନୀତି ଆପଣାଇବା ଘଟଣା ସମଗ୍ର ନୀଳଗିରିରେ ମୁଖ୍ୟ ଆଲୋଚନାର ବିଷୟ ହୋଇଛି।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁଯାୟୀ ନୀଳଗିରି ଏନଏସି ୨ ନମ୍ବର ୱାର୍ଡ ଘାଟଘରସାହିର ନିରଞ୍ଜନ ବେହେରା ଘରେ ବହୁ ପରିମାଣର ଗଂଜେଇ ମହଜୁଦ୍ ରଖିଥିବା ଏବଂ ତାକୁ ବାହାରକୁ ଚାଲାଣ କରିବାକୁ ଯୋଜନା ଚଳାଇଥିବା ନେଇ ବିଶେଷ ସୁତ୍ରରୁ ଅବକାରୀ ବିଭାଗକୁ ଖବର ମିଳିଥିଲା। କେନ୍ଦ୍ରାଞ୍ଚଳ ଗୁଇନ୍ଦା, ବାଲେଶ୍ବର ଓ ନୀଳଗିରି ଅବକାରୀ ବିଭାଗ ପକ୍ଷରୁ ବୁଧବାର ଅପରାହ୍ନ ୩ଟାରେ ନିରଞ୍ଜନଙ୍କ ଘରେ ଚଢଉ କରାଯିବା ପାଇଁ ଉଦ୍ୟମ ହୋଇଥିଲା। ତେବେ ହଠାତ୍ ନିରଞ୍ଜନ ୨ ପୋଷା କୁକୁରଙ୍କୁ ଛାଡି ଦେଇଥିଲା। ଆକ୍ରମଣ କରିବାକୁ ହୁକୁମ୍ ବି ଦେଇଥିଲା। କୁକୁର ଆକ୍ରମଣରେ ଅବକାରୀ ଅଧିକାରୀ ଜୟନ୍ତୀ ଆଚାର୍ଯ୍ୟ ଏବଂ କର୍ମଚାରୀ ସୁବ୍ରତ ଜେନା ଓ ବସନ୍ତ ମଲିକ ଆହତ ହୋଇଥିଲେ। କୁକୁର ଆକ୍ରମଣକୁ ଖାତିର ନକରି ଘରେ ଚଢଉ କରି ୩ ବସ୍ତା ଗଞ୍ଜେଇ ଜବତ କରିବା ସହ ନିରଂଜନକୁ ଗିରଫ କରିଥିଲେ। ଏ ନେଇ ନୀଳଗିରି ଅବକାରୀ ବିଭାଗ ପକ୍ଷରୁ ୩୮/୨୧ରେ ଏକ ମାମଲା ରୁଜୁ ହୋଇ ତଦନ୍ତ ଚାଲିଛି।