ବ୍ରହ୍ମପୁର : କରୋନା ଭୂତାଣୁ ସଂକ୍ରମଣ ଦ୍ରୁତଗତିରେ ବ୍ୟାପୁଥିବାରୁ ଭୟରେ ସମଗ୍ର ଗଞ୍ଜାମ ଥରହର । ଦିନକୁ ଦିନ ସଂକ୍ରମଣ ଓ ମୃତ୍ୟୁ ଜିଲ୍ଳାରେ ବଢିଚାଲିଛି । ଜିଲ୍ଲାରେ ଆଜି ପୁଣି ୨ଜଣଙ୍କ ମୃତୁ୍ୟ ଘଟିଥିବା ବେଳେ ୨୧୮ଜଣ ନୂତନ ପଜିଟିଭ ଚିହ୍ନଟ ହୋଇଛନ୍ତି । ଜିଲ୍ଲା ଆଜି ଚିହ୍ନଟ ପଜିଟିଭ ମଧ୍ୟରୁ ୧୭୪ଜଣ ପଜିଟିଭ ସଂସ୍ପର୍ଶରେ ଆସି ସ୍ଥାନୀୟ ସଂକ୍ରମିତ ଅର୍ଥାତ ସାଧାରଣ ଲୋକ, ଯାହାକି ଚିହ୍ନଟ ପଜିଟିଭ୍ର ୭୯ ପ୍ରତିଶତ । ପଜିଟିଭ୍ ସଂକ୍ରାନ୍ତରେ ଆସି ସାଧାରଣ ଲୋକ ସଂକ୍ରମିତ ହେବା ପରେ ଜିଲ୍ଲାର ସ୍ଥିତି ବିଗିଡ଼ିବାରେ ଲାଗିଛି । ପ୍ରତ୍ୟେହ ଶତାଧିକ ସାଧାରଣ ଲୋକ ସଂକ୍ରମିତ ହେଉଛନ୍ତି । ଅନ୍ୟପକ୍ଷରେ ଜିଲ୍ଲାରେ ଆଜି ରେକର୍ଡ଼ ସଂଖ୍ୟକ ଅର୍ଥାତ ୧୮୭ଜଣ ସୁସ୍ଥ ହୋଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁଯାୟୀ, ମଧୁମେହରେ ପୀଡ଼ିତ ଜଣେ ୭୨ବର୍ଷୀୟ ବୃଦ୍ଧ ଏବଂ ୫୫ବର୍ଷୀୟ ପୁରୁଷଙ୍କ ଆଜି କରୋନାରେ ମୃତ୍ୟୁ ଘଟିଥିବା ସ୍ୱାସ୍ଥ୍ୟ ବିଭାଗ ସୂଚନା ଦେଇଛି । ଜିଲ୍ଳାରେ ସମୁଦାୟ ମୃତ୍ୟୁ ସଂଖ୍ୟା ୩୭ରେ ପହଁଚିଛି । ଏଥିମଧ୍ୟରେ ୩୬ଜଣ କୋଭିଡ଼୍ ଓ ଜଣେ ଅଣ କୋଭିଡ଼୍ ମୃତ୍ୟୁ ବୋଲି ଜଣାପଡ଼ିଛି ।
ଜିଲ୍ଳାରୁ ଆଜି ଚିହ୍ନଟ ସଂକ୍ରମିତଙ୍କ ମଧ୍ୟରେ ୪୩ଜଣ କୋଭିଡ଼୍ ଯୋଦ୍ଧା, ରାଜ୍ୟ ବାହାର ଫେରନ୍ତା ଜଣେ ଓ ପଜିଟିଭ ସଂସ୍ପର୍ଶରେ ଆସି ସ୍ଥାନୀୟ ସଂକ୍ରମିତ ୧୭୪ଜଣ । ସଂକ୍ରମିତ କୋଭିଡ଼୍ ଯୋଦ୍ଧାଙ୍କ ମଧ୍ୟରେ ଆସିକାର ୧୨ଜଣ, ବେଗୁନିଆପଡ଼ାର ୨ଜଣ, ବେଲଗୁଣ୍ଠାର ୩ଜଣ, ବ୍ରହ୍ମପୁର ମହାନଗର ଅଂଚଳର ୭ଜଣ, ଭଞ୍ଜନଗର, ବୁଗୁଡ଼ା, ଛତ୍ରପୁର, ଜଗନ୍ନାଥ ପ୍ରସାଦ, କୁକୁଡ଼ାଖଣ୍ଡି, ରଙ୍ଗେଇଲୁଣ୍ଡା ଓ ସାନଖେମୁଣ୍ଡି ଅଁଚଳର ଜଣେ ଲେଖାଏଁ, ପୋଲସରା ଅଂଚଳର ୭ଜଣ ଓ ସୋରଡ଼ା ଅଂଚଳର ୩ଜଣ ରହିଛନ୍ତି । କବିସୂର୍ଯ୍ୟନଗର ଅଂଚଳର ଜଣେ ରାଜ୍ୟ ବାହାର ଫେରନ୍ତା ସଂକ୍ରମିତ ରହିଛନ୍ତି ।
ପଜିଟିଭ୍ ସଂସ୍ପର୍ଶରେ ଆସି ସ୍ଥାନୀୟ ସଂକ୍ରମିତଙ୍କ ମଧ୍ୟରେ ବ୍ରହ୍ମପୁର ମହାନଗର ଅଂଚଳର ୩୪ଜଣ, ବେଗୁନିଆପଡ଼ା ଅଂଚଳର ୨୨ଜଣ, ବୁଗୁଡ଼ା ଅଂଚଳର ୧୭ଜଣ, ଛତ୍ରପୁର ଓ ଆସିକା ଅଚଂଳର ୧୫ଜଣ ଲେଖାଏଁ, କବିସୂର୍ଯ୍ୟନଗର ୧୦ଜଣ, ରଙ୍ଗେଇଲୁଣ୍ଡା ଅଂଚଳର ୯ଜଣ, ଦିଗପହଣ୍ଡି ଅଂଚଳର ୮ଜଣ, ହିଞ୍ଜିଳିକାଟୁ ଅଂଚଳର ୫ଜଣ, ଗଞ୍ଜାମ, ବେଲଗୁଣ୍ଠା,ଭଞ୍ଜନଗର, ଧରାକୋଟ,ଖଲ୍ଲିକୋଟ,ପାତ୍ରପୁର ଓ ପୋଲସରା ଅଂଚଳର ୪ଜଣ ଲେଖାଏଁ, ଶେରଗଡ଼ ଓ ସୋରଡ଼ା ଅଂଚଳର ୩ଜଣ ଲେଖାଏଁ , ସାନଖେମୁଣ୍ଡି ଓ କୁକୁଡ଼ାଖଣ୍ଡି ଅଂଚଳର ୨ଜଣ ଲେଖାଏଁ ଏବଂ ଚିକିଟି ଓ ପୁରୁଷୋତମ ପୁର ଅଂଚଳର ଜଣେ ଲେଖାଏଁ ସଂକ୍ରମିତ ରହିଛନ୍ତି ।
ଜିଲ୍ଲାରେ ସମୁଦାୟ କରୋନା ପଜିଟିଭ ସଂଖ୍ୟା ୩୬୩୪ରେ ପହଂଚିଛି । ଜିଲ୍ଲାରେ ପ୍ରତ୍ୟେହ ଯେଉଁଭଳି ଭାବେ ପଜିଟିଭ ଚିହ୍ନଟ ହେଉଛନ୍ତି ଆସନ୍ତା ଦୁଇଦିନ ମଧ୍ୟରେ ସଂକ୍ରମିତ ସଂଖ୍ୟା ୪ହଜାର ପାର ହେବାର ଆଶଙ୍କା ଦେଖାଦେଇଛି । ଅନ୍ୟପକ୍ଷରେ ଜିଲ୍ଲାରେ ଆଜି ୧୮୭ସୁସ୍ଥ ହୋଇଥିବା ବେଳେ ସମୁଦାୟ ସୁସ୍ଥ ସଂଖ୍ୟା ୨୦୭୯ରେ ପହଂଚିଛି । ଜିଲ୍ଲାରେ ଏବେ ୧୫୧୮ସଂକ୍ରମିତ ରହିଛନ୍ତି ।