ଟ୍ରାନ୍ସଫର୍ମର ପୋଡ଼ିବାର ୧୫ ଦିନ ବିତିଯାଇଥିଲେ ବି ନୂଆ ଲାଗୁନଥିବା ପ୍ରତିବାଦରେ ନେସ୍କୋ ସେକ୍ସନ ଅଫିସ ଘେରିଲେ ଉପଭୋକ୍ତା
କେନ୍ଦୁଝର/ଢେଙ୍କିକୋଟ: ଟ୍ରାନ୍ସଫର୍ମର ପୋଡ଼ିବାର ୧୫ ଦିନ ହେଲାଣି। ବାକି ଟଙ୍କା ପୈଠ କରିସାରିଲେଣି ଉପଭୋକ୍ତା। ତଥାପି ଟ୍ରାନ୍ସଫର୍ମର ଲଗାଇବାରେ ଟାଳଟୁଳ ନୀତି ଅବଲମ୍ବନ କରୁଛି ବିଦ୍ୟୁତ୍ ବିଭାଗ। ଏହାକୁ ନେଇ କଟରାବେଡ଼ାର ଉପଭୋକ୍ତାମାନେ ତାତିବା ସହ ଆଜି ସକାଳେ କେନ୍ଦୁଝର ଜିଲ୍ଲା ଢେଙ୍କିକୋଟ ସେକ୍ସନ ବିଦ୍ୟୁତ୍ କାର୍ଯ୍ୟାଳୟକୁ ଘେରିଛନ୍ତି।
ଉପଭୋକ୍ତା ଅଶୋକ କୁମାର ମହାକୁଡ଼ଙ୍କ ସୂଚନା ଅନୁସାରେ ଏହି ୨୫ କେଭି କ୍ଷମତାବିଶିଷ୍ଟ ଟ୍ରାନ୍ସଫର୍ମରଟି ଯଥେଷ୍ଟ ପୁରୁଣା। ପୂର୍ବରୁ ଏଠାରୁ ପ୍ରାୟ ୨୦-୨୨ ଘର ସଂଯୋଗ ନେଇ ନିୟମିତ ବିଲ୍ ପୈଠ କରୁଥିଲେ। ସୌଭାଗ୍ୟ ଯୋଜନା କାର୍ଯ୍ୟକାରୀ ହେବା ପରେ ଆଉ ୨୦-୨୨ ଘରକୁ ଏଠାରୁ ସଂଯୋଗ ଦିଆଯାଇଥିଲା। ଏହି ନୂତନ ଉପଭୋକ୍ତାମାନଙ୍କର ମିଟର ରିଡିଂ ଠିକ୍ ସମୟରେ ହେଉ ନଥିଲା, କି ସେମାନଙ୍କୁ ବିଲ୍ ମଧ୍ୟ ମିଳୁନଥିଲା। ଟ୍ରାନ୍ସଫର୍ମର ପୋଡ଼ିବା ପରେ ହଠାତ ସେମାନଙ୍କ ମିଟର ରିଡିଂ ନକରି ବିଲ୍ ଦିଆଯାଇଛି।
Sambad is now on WhatsApp
Join and get latest news updates delivered to you via WhatsApp
କେତେକ ଉପଭୋକ୍ତାଙ୍କୁ ବର୍ଷକୁ ପ୍ରାୟ ୬ରୁ ୭ଶହ ଟଙ୍କା ଓ ଅନ୍ୟକେତେକଙ୍କୁ ୩ ହଜାରରୁ ୫ ହଜାର ଟଙ୍କା ଏବଂ ଆଉ କେତେଜଣଙ୍କୁ ୧୨ ହଜାର ଟଙ୍କାର ବିଲ୍ ଦିଆଯାଇଛି। ୦.୫ କିଲୋୱାଟ ବିଦ୍ୟୁତ୍ ସଂଯୋଗରେ ମାସିକ ୨ ହଜାର ଟଙ୍କା ପର୍ଯ୍ୟନ୍ତ ବିଲ୍ ଦିଆଯାଇଛି। ମାତ୍ର ଏହି ବିଲରେ କେତେ ମାସ କିମ୍ବା ସମୟ ତଥା କେତେ ୟୁନିଟର ଶୁଳ୍କ ତାହା ଉଲ୍ଲେଖ କରାଯାଇ ନାହିଁ। ତଥାପି ଉପଭୋକ୍ତାମାନେ ୧ ହଜାରରୁ ୧୫୦୦ ଟଙ୍କା ଲେଖାଏଁ ପୈଠ କରିଛନ୍ତି। ଏହାବାଦ୍ ବିଭାଗୀୟ କନିଷ୍ଠ ଯନ୍ତ୍ରୀ ତଥା ଲାଇନମ୍ୟାନଙ୍କ ନିର୍ଦେଶାନୁସାରେ ବାଲେଶ୍ବରରୁ ଟ୍ରାନ୍ସଫର୍ମର ଆଣିବା ଭଡ଼ା ବାବଦରେ ଗାଁ ଲୋକେ ୬ ହଜାର ଟଙ୍କା ଆଦାୟ କରିଛନ୍ତି। ଏହା ଆଇନସମ୍ମତ ନହେଲେ ବି ସମସ୍ତେ ଦିଅନ୍ତି ବୋଲି କନିଷ୍ଠ ଯନ୍ତ୍ରୀ କହିଥିଲେ। ଏହାସତ୍ତ୍ବେ ଟ୍ରାନ୍ସଫର୍ମର ଲାଗିନାହିଁ। ଅନ୍ୟପଟେ ସ୍କୁଲ ନିକଟରେ ଥିବା ସୌଭାଗ୍ୟ ଯୋଜନାର ନୂଆ ଟ୍ରାନ୍ସଫର୍ମରରୁ ୪-୫ ଜଣ ପୁରୁଣା ଉପଭୋକ୍ତାଙ୍କୁ ଦୁଇଦିନ ତଳେ ସଂଯୋଗ ଦିଆଯାଇଛି। ଏହାକୁ ନେଇ ଗ୍ରାମର ମହିଳାମାନେ ତାତିବା ସହ ଆଜି ସକାଳୁ ଢେଙ୍କିକୋଟ ନେସ୍କୋ ଅଫିସରେ ପହଞ୍ଚି ହୋହଲ୍ଲା କରିଥିଲେ।
‘ଏବେ ବାଲେଶ୍ବରରେ ଟ୍ରାନ୍ସଫର୍ମର ନାହିଁ, ୧୦ ଦିନ ମଧ୍ୟରେ ଲଗାଯିବ’ ବୋଲି କନିଷ୍ଠ ଯନ୍ତ୍ରୀ ମୌଖିକ ପ୍ରତିଶ୍ରୁତି ଦେବା ପରେ ଦିନ ସାଢ଼େ ୧୧ଟାରେ ମହିଳାମାନେ ଫେରିଥିଲେ। ଏହି ଘେରାଉରେ ପ୍ରେମଲତା ମାନସିଂହ, ସାବିତ୍ରୀ ନାୟକ, ଚଞ୍ଚଳା ନାୟକ, ସବିତା ନାୟକ, ଅଶୋକ ମହାକୁଡ଼, ଚିନ୍ତାମଣି ମହାକୁଡ଼, ଖଗେଶ୍ବର ମହାକୁଡ଼, ସୁରେନ୍ଦ୍ର ନାୟକ, ଡମ୍ବରୁଧର ମହାନ୍ତ, ୱାର୍ଡ ମେମ୍ବର ବାଙ୍କୁ ସେଠୀଙ୍କ ସମେତ ୩୦ରୁ ଊର୍ଦ୍ଧ୍ବ ଉପଭୋକ୍ତା ସାମିଲ ହୋଇଥିଲେ। ଲାଇନ୍ ନଥିବାରୁ ବାଡ଼ିବଗିଚାରେ କରିଥିବା ପରିବା ଚାଷ ପାଣି ମଡ଼ାଇବାରେ ଅସୁବିଧା ହେଉଥିବା ସେମାନେ କହିଛନ୍ତି।
ଏ ବିଷୟରେ କେନ୍ଦୁଝର ନେସ୍କୋ ଅଧୀକ୍ଷଣ ଯନ୍ତ୍ରୀଙ୍କୁ ପଚାରିବାରୁ ଟ୍ରାନ୍ସଫର୍ମର ଉପଲବ୍ଧ ଅଛି କି ନାହିଁ, ତାହା କହିପାରିନଥିଲେ। ଘଟଗାଁ ଏସଡିପିଓଙ୍କୁ ପଚାରିବାରୁ ସେ ୧୫ ଦିନ ଲାଗିବ ବୋଲି କହିଥିଲେ। ବିଭାଗୀୟ ଅଧିକାରୀଙ୍କ କଥାରେ ତାଳମେଳ ରହୁନଥିବାରୁ ଅସନ୍ତୋଷ ପ୍ରକାଶ ପାଇଛି।