ସବୁ ବର୍ଗର ସଶକ୍ତୀକରଣ ଲକ୍ଷ୍ୟ: ରାଜ୍ୟପାଳ

ଭୁବେନଶ୍ବର: ମୋ ସରକାରର ପ୍ରତ୍ୟେକ ଆଭିମୁଖ୍ୟରେ ଲୋକ ହିଁ ପ୍ରଥମ। ଅତ୍ୟାବଶ୍ୟକ ସେବା ଯୋଗାଇବା, ଜୀବିକା ସୁଯୋଗ ସୃଷ୍ଟି କରିବା ଏବଂ ପ୍ରମୁଖ ଭିତ୍ତିଭୂମିର ବିକାଶ ପାଇଁ ସରକାର ପ୍ରତିଶ୍ରୁତିବଦ୍ଧ। ଆମେ ପ୍ରତ୍ୟେକ ନାଗରିକଙ୍କ କଲ୍ୟାଣକୁ ପ୍ରାଥମିକତା ଦେବା ସହ ରାଜ୍ୟର ସମସ୍ତ ଅଞ୍ଚଳରେ ସମାନ ଅଭିବୃଦ୍ଧି ସୁନିଶ୍ଚିତ କରିବାକୁ ପ୍ରୟାସ କରୁଛୁ। ମୋ ସରକାର ପ୍ରଗତି ଓ ସମୃଦ୍ଧି ଦିଗରେ ଆମର ଯାତ୍ରାରେ କାହାକୁ ପଛରେ ନପକାଇ, ଓଡ଼ିଶାର ସାମଗ୍ରିକ ବିକାଶ ଏବଂ ଏହାର ସମସ୍ତ ବର୍ଗର ଲୋକଙ୍କ ସଶକ୍ତୀକରଣ ପାଇଁ ଦୃଢ଼ ଭାବରେ ସମର୍ପିତ ହେବ।

ସପ୍ତଦଶ ବିଧାନସଭାର ତୃତୀୟ ଅଧିବେଶନ ତଥା ବଜେଟ୍‌ ଅଧିବେଶନର ଆରମ୍ଭରେ ରାଜ୍ୟପାଳ ହରିବାବୁ କମ୍ଭମ୍‌ପାଟି ନିଜ ଅଭିଭାଷଣରେ ରାଜ୍ୟ ସରକାରଙ୍କ ଆଭିମୁଖ୍ୟକୁ ଏହିପରି ବର୍ଣ୍ଣନା କରିଛନ୍ତି। ଏହାସହ ରାଜ୍ୟ ସରକାରଙ୍କ ବିଭିନ୍ନ ଯୋଜନା, ପରିକଳ୍ପନା ଦ୍ବାରା ଚଳିତବର୍ଷ ରାଜ୍ୟ ଓ ରାଜ୍ୟବାସୀଙ୍କ ପାଇଁ ପ୍ରଗତି, ସମୃଦ୍ଧି ଓ ସୌହାର୍ଦ୍ଦ୍ୟ ଆଣି ଦେଉ ବୋଲି କାମନା କରିଛନ୍ତି। ରାଜ୍ୟ ସରକାର କିପରି ୮ମାସ ମଧ୍ୟରେ କୃଷି, ଜଳସେଚନ, ଶିକ୍ଷା, ସ୍ବାସ୍ଥ୍ୟ, ନିଯୁକ୍ତି, ଭିତ୍ତିଭୂମି କ୍ଷେତ୍ରକୁ ଫୋକସ୍‌ କରିଛନ୍ତି ଏବଂ ଆଗାମୀ ଦିନରେ ବିଭିନ୍ନ କାର୍ଯ୍ୟ କରିବାକୁ ଯାଉଛନ୍ତି ତାହାକୁ ରାଜ୍ୟପାଳଙ୍କ ମୁହଁରେ କୁହାଇଛନ୍ତି।

ଶ୍ରୀ କମ୍ଭମ୍‌ପାଟି କହିଥିଲେ, ରାଜ୍ୟକୁ ସମୃଦ୍ଧି ପଥରେ ଆଗେଇ ନେବାର ଦାୟିତ୍ବ ମୋ ସରକାର ବହନ କରିଛନ୍ତି। ‘ଜ୍ଞାନ’ ଅର୍ଥାତ୍ ଗରିବ, ଯୁବାବର୍ଗ, ଅନ୍ନଦାତା ଏବଂ ନାରୀ ଶକ୍ତିକୁ ସଶକ୍ତ କରିବାର ସଂକଳ୍ପ ନେଇ ଜୁଲାଇ ୨୦୨୪ରେ ମୋ ସରକାର ‘ସବ୍‌ କା ସାଥ, ସବ୍‌କା ବିକାଶ, ସବ୍‌ କା ବିଶ୍ବାସ ଏବଂ ସବ୍‌ କା ପ୍ରୟାସ’ ନୀତି ଆଧାରିତ ଏହାର ପ୍ରଥମ ବଜେଟ୍ ଉପସ୍ଥାପନ କରିଥିଲେ। ଦାୟିତ୍ବ ଗ୍ରହଣ କରିବାର ୮ମାସର ସ୍ବଳ୍ପ ସମୟ ମଧ୍ୟରେ ମୋ  ସରକାର ବିଭିନ୍ନ ଐତିହାସିକ ନିଷ୍ପତ୍ତି ନେଇଛନ୍ତି। କୃଷି କ୍ଷେତ୍ରରେ ଅଗ୍ରଗତି ପାଇଁ ମୋ ସରକାର ପ୍ରତିଶ୍ରୁତିବଦ୍ଧ। ଅଭିନବ ଜ୍ଞାନକୌଶଳ, ଉନ୍ନତ ଜଳସେଚନ, ଫସଲ ବୀମା ଏବଂ ଆର୍ଥିକ ସହାୟତା ଦ୍ବାରା ଅନ୍ତର୍ଭୁକ୍ତୀକରଣ କୃଷି ରୂପାନ୍ତରଣ ପରିଚାଳିତ ହେବ ଓ ଅନ୍ତର୍ଜାତୀୟ ସହଯୋଗ, ଗବେଷଣା ତଥା ନୀତି ସମନ୍ବୟ ମାଧ୍ୟମରେ ବିଶ୍ବସ୍ତରୀୟ କୃଷି ପଦ୍ଧତିକୁ ସ୍ଥାନୀୟକରଣ କରାଯିବ। ଜଳସେଚନ ବ୍ୟବସ୍ଥାକୁ ସୁଦୃଢ଼ୀକରଣ କରିବା  ସହ ଜଳ ସଂରକ୍ଷଣ ବୃଦ୍ଧି ନେଇ ରାଜ୍ୟ ସରକାର ‘ଇନଷ୍ଟ୍ରିମ ଷ୍ଟୋରେଜ୍ ଷ୍ଟ୍ରକ୍ଚର’ ଯୋଜନାରେ ୭୨ଟି ପ୍ରକଳ୍ପ ହେଉଛି।  

ସବୁ ଜିଲ୍ଲାରେ ରେଳ ସଂଯୋଗୀକରଣକୁ ପ୍ରାଥମିକତା
୨୦୨୬ ସୁଦ୍ଧା ପ୍ରତି ଘରକୁ ନଳ ଯୋଗେ ପାଣି
ସାମାଜିକ ସୁରକ୍ଷା ପେନ୍‌ସନ୍‌ ପ୍ରଦାନ ହାରରେ ଓଡ଼ିଶା ଦେଶରେ ଆଗୁଆ

ରାଷ୍ଟ୍ର ନିର୍ମାଣ ଓ ୨୦୩୬ ସୁଦ୍ଧା ସମୃଦ୍ଧ ଓଡ଼ିଶାର ଲକ୍ଷ୍ୟ ହାସଲ କରିବାରେ ନାରୀ ଶକ୍ତିର ଭୂମିକା ଗୁରୁତ୍ବପୂର୍ଣ୍ଣ ହୋଇଥିବାରୁ ସରକାର ମହିଳା ସଶକ୍ତୀକରଣକୁ ପ୍ରାଥମିକତା ଦେଇଛନ୍ତି। ୨୧ରୁ ୬୦ବର୍ଷର ପ୍ରାୟ ୧କୋଟି ମହିଳାଙ୍କୁ ସୁଭଦ୍ରା‌ ଯୋଜନାରେ ଆର୍ଥିକ ସହାୟତା ପ୍ରଦାନ କରାଯାଉଛି। ଏହାସହ ମହିଳା ଓ ଶିଶୁମାନଙ୍କ ସ୍ବାସ୍ଥ୍ୟ ଓ ପୋଷଣରେ ଉନ୍ନତି ଆଣିବା ପାଇଁ ବିଭିନ୍ନ ପ୍ରକାରର ସହା‌ୟତା ‌ଯୋଗାଯାଉଥିବା କହିଛନ୍ତି। ସାମାଜିକ ସୁରକ୍ଷା ପେନସନରେ ୫୭ଲକ୍ଷ ଲୋକଙ୍କୁ ଅନ୍ତର୍ଭୁକ୍ତ କରାଯାଇଛି। ଯାହାକି ଦେଶର ସମସ୍ତ ରାଜ୍ୟ ମଧ୍ୟରେ ଜନସଂଖ୍ୟାରେ ସର୍ବାଧିକ ପ୍ରତିଶତ ଅଟେ। ଜାନୁଆରି, ୨୦୨୫ରୁ ୮୦ବର୍ଷରୁ ଅଧିକ ବୟସ୍କ ଏବଂ ୮୦%ରୁ ଅଧିକ ଭିନ୍ନକ୍ଷମ ହିତାଧିକାରୀଙ୍କୁ ମାସିକ ୩୫୦୦ଟଙ୍କା ଭତ୍ତା ପ୍ରଦାନ କରାଯାଉଛି। ଅନୁସୂଚିତ ଜନଜାତିଙ୍କ କଲ୍ୟାଣ ପାଇଁ କେନ୍ଦ୍ର ସରକାରଙ୍କ ଯୋଜନା ‘ଧରତୀ ଆବା ଜନଜାତି ଗ୍ରାମ ଉନ୍ନତ ଅଭିଯାନ’ ୨୭ଟି ଜିଲ୍ଲାରେ କାର୍ଯ୍ୟକାରୀ ହେଉଛି। ସ୍ବାସ୍ଥ୍ୟ କ୍ଷେତ୍ରକୁ ସରକାର ପ୍ରାଧାନ୍ୟ ଦେଉଛନ୍ତି। ଆୟୁଷ୍ମାନ ଭାରତ-ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନାରେ ଓଡ଼ିଶା‌ ସାମିଲ ହେବା ଦ୍ବାରା ଦେଶର ୨୯ହଜାରରୁ ଅଧିକ ଡାକ୍ତରଖାନାରେ ୩.୫୦କୋଟି ଲୋକଙ୍କୁ ଏହି ସୁବିଧା ମିଳିବ।

ଜାତୀୟ ଶିକ୍ଷା ନୀତି-୨୦୨୦ ବିଦ୍ୟାଳୟରେ ଲାଗୁ ହେବ। ଏହାଦ୍ବାରା ରାଜ୍ୟର ୬୧୬୯୩ଟି ବିଦ୍ୟାଳୟରେ ପଢ଼ୁଥିବା ପ୍ରାୟ ୭୭ଲକ୍ଷ ପିଲା ଉପକୃତ ହେବେ। ଗୋଦାବରୀଶ ପ୍ରାଥମିକ ବିଦ୍ୟାଳୟ ମାଧ୍ୟମରେ ୬୭୯୪ଟି ପ୍ରାଥମିକ ବିଦ୍ୟାଳୟକୁ ଏକ ସମଗ୍ର ଶିକ୍ଷା କେନ୍ଦ୍ରରେ ପରିଣତ କରାଯିବ। ୨୦୨୪-୨୫ ଶିକ୍ଷା ବର୍ଷରୁ ସମସ୍ତ ସରକାରୀ ବିଶ୍ବବିଦ୍ୟାଳୟରେ ଜାତୀୟ ଶିକ୍ଷା ନୀତି-୨୦୨୦ ଲାଗୁ ହୋଇଥିବାବେଳେ ୪ଟି ବିଶ୍ବବିଦ୍ୟାଳୟକୁ ‘ମେରୁ’ (ମଲ୍ଟିଡିସିପ୍ଲିନାରୀ ଏଜୁକେସନ ଆଣ୍ଡ ରିସର୍ଚ୍ଚ ୟୁନିଭର୍ସିଟି)କୁ ଉନ୍ନୀତ କରାଯିବ। 

ମୋ ସରକାର ସମସ୍ତଙ୍କୁ ପକ୍କାଘର ଯୋଗାଇବାକୁ ଅନ୍ତ୍ୟୋଦୟ ଗୃହ ଯୋଜନା ଆରମ୍ଭ କରିଛନ୍ତି। ୨୦୨୬ ସୁଦ୍ଧା ସମସ୍ତଙ୍କ ଘରକୁ ନଳ ଯୋଗେ ପିଇବା ପାଣି ଯୋଗାଇ ଦିଆଯିବ। ସହରାଞ୍ଚଳରେ ସୁଦୃଢ଼ ଗମନାଗମନକୁ ଫୋକସ୍‌ କରାଯାଉଛି। ସମସ୍ତ ଜିଲ୍ଲାରେ ରେଳ ସଂଯୋଗୀକରଣକୁ ପ୍ରାଥମିକତା ଦିଆଯାଉଛି। ଏଥିପାଇଁ ମୋ ସରକାର କେନ୍ଦ୍ର ସରକାରଙ୍କ ସହ ସମନ୍ବୟ ରଖି ଡିଜାଇନ୍ ପ୍ରସ୍ତୁତ କରିଛନ୍ତି। ରାଜ୍ୟବାସୀଙ୍କୁ ୨୪ଘଣ୍ଟା ଗୁଣାତ୍ମକ ଏବଂ ନିର୍ଭରଯୋଗ୍ୟ ବିଦ୍ୟୁତ୍‌ ସେବା ସୁନିଶ୍ଚିତ କରିବାକୁ ମୋ ସରକାର ପ୍ରତିବଦ୍ଧ। ଜାନୁଆରି ୨୮ ଓ ୨୯ରେ ଆୟୋଜିତ ଉତ୍କର୍ଷ ଓଡ଼ିଶା- ମେକ୍‌ ଇନ୍‌ ଓଡ଼ିଶା କନ୍‌କ୍ଲେଭ୍ ମାଧ୍ୟମରେ ମୋ ସରକାର ରାସାୟନିକ ଏବଂ ପେଟ୍ରୋକେମିକାଲ୍ସ, ବୟନଶିଳ୍ପ, ଖଣି ଓ ଧାତବବିଦ୍ୟା, ନବୀକରଣୀୟ ଶକ୍ତି, ଆଇଟି/ଆଇଟିଇଏସ୍‌, ପର୍ଯ୍ୟଟନ ଏବଂ ଖାଦ୍ୟ ପ୍ରକ୍ରିୟାକରଣ ଭଳି କ୍ଷେତ୍ରରେ ନିବେଶ ପାଇଁ ୧୨.୮୯ ଲକ୍ଷ କୋଟି ଟଙ୍କାର ବୁଝାମଣାପତ୍ର ସ୍ବାକ୍ଷର ହୋଇଛି। 

ଆସନ୍ତା ଦୁଇ ବର୍ଷରେ ବୟନ ଶିଳ୍ପ କ୍ଷେତ୍ରରେ ୫୦ହଜାର ନିଯୁକ୍ତି ଏବଂ ଆସନ୍ତା ୫ବର୍ଷରେ ଆଇଟି/ଆଇଟିଇଏସ୍‌ରେ ୫୦ହଜାର ନିଯୁକ୍ତି ସୃଷ୍ଟି ପାଇଁ ସରକାର ପଦକ୍ଷେପ ନେଇଛନ୍ତି। ଏହାସହ ୫ବର୍ଷ ମଧ୍ୟରେ ୧.୫ଲକ୍ଷ ସରକାରୀ ଚାକିରି ପୂରଣ କରାଯିବ। ୨୦୨୭ ସୁଦ୍ଧା ୨୫ଲକ୍ଷ ମହିଳାଙ୍କୁ ଲକ୍ଷପତି ଦିଦି ଭାବେ ସଶକ୍ତ କରାଯିବ। ୨୦୨୪-୨୫ରେ ପ୍ରାୟ ୧୦ଲକ୍ଷ ମହିଳାଙ୍କୁ ଏହି ସ୍ତରର ଆୟ ହାସଲ ପାଇଁ ତାଲିମ ଦିଆଯିବ। ଏହିପରି ୯୧ଟି ପଏଣ୍ଟ ମାଧ୍ୟମରେ ରାଜ୍ୟପାଳ ରାଜ୍ୟ ସରକାରଙ୍କ ବିଭିନ୍ନ ସଫଳତା, ଯୋଜନାର ବର୍ଣ୍ଣନା କରିଛନ୍ତି।