ଓଡ଼ିଶୀ ସଙ୍ଗୀତକୁ ଶାସ୍ତ୍ରୀୟ ମାନ୍ୟତା; କୌଣସି ସାଙ୍ଗିତିକ ଧାରାକୁ ସରକାର ଶାସ୍ତ୍ରୀୟ ମାନ୍ୟତା ପ୍ରଦାନ କରନ୍ତି ନାହିଁ: ଜି. କିଷନ୍ ରେଡ୍ଡୀ
ନୂଆଦିଲ୍ଲୀ: କୌଣସି ସାଙ୍ଗିତିକ ଧାରାକୁ ସରକାର ଶାସ୍ତ୍ରୀୟ ମାନ୍ୟତା ପ୍ରଦାନ କରନ୍ତି ନାହିଁ ବୋଲି ଆଜି ଓଡ଼ିଶୀ ସଙ୍ଗୀତକୁ ଶାସ୍ତ୍ରୀୟ ମାନ୍ୟତା ପ୍ରଦାନ ସଂକ୍ରାନ୍ତ ପ୍ରଶ୍ନର ଉତ୍ତର ଦେଇ କେନ୍ଦ୍ର ସଂସ୍କୃତି, ପର୍ଯ୍ୟଟନ ଏବଂ ଉତ୍ତରପୂର୍ବାଞ୍ଚଳ ବିକାଶ ମନ୍ତ୍ରୀ ଜି. କିଷନ୍ ରେଡ୍ଡୀ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଓଡ଼ିଶୀ ସଙ୍ଗୀତକୁ ଶାସ୍ତ୍ରୀୟ ମାନ୍ୟତା ପ୍ରଦାନ ସମ୍ବନ୍ଧରେ ଓଡ଼ିଆ ସମ୍ପ୍ରଦାୟ ଏବଂ କେତେକ ପ୍ରତିନିଧି ବାରମ୍ବାର କରୁଥିବା ଅନୁରୋଧକୁ ସରକାର ଗ୍ରହଣ କରିଛନ୍ତି କି, ନାହିଁ ବୋଲି ସାଂସଦ ଅଚ୍ୟୁତାନନ୍ଦ ସାମନ୍ତ ମନ୍ତ୍ରୀଙ୍କୁ ପଚାରିଥିଲେ।
ଶାସ୍ତ୍ରୀୟ ମାନ୍ୟତା ପ୍ରଦାନ କରାଯିବାଦ୍ବାରା ଓଡ଼ିଶୀ ସଙ୍ଗୀତ ଜନପ୍ରିୟ ହେବା ସହ ସମଗ୍ର ଦେଶର ସଙ୍ଗୀତପ୍ରେମୀଙ୍କୁ ଆନନ୍ଦ ଦିଅନ୍ତା ବୋଲି ସେ କହିଥିଲେ। ପ୍ରସଙ୍ଗକୁ ଅଧିକ ସ୍ପଷ୍ଟ ଭାବେ ବୁଝାଇ ଦେବାକୁ ମନ୍ତ୍ରୀଙ୍କୁ ଅନୁରୋଧ କରି ସେ ଆହୁରି ମଧ୍ୟ ପଚାରିଥିଲେ, ଏ ସଂକ୍ରାନ୍ତରେ ସରକାର କିଛି ବିଚାର କରୁଛନ୍ତି କି? ଯଦି ସରକାର ଓଡ଼ିଶୀ ସଙ୍ଗୀତକୁ ଶାସ୍ତ୍ରୀୟ ମାନ୍ୟତା ନ ଦିଅନ୍ତି, ତା’ର କାରଣ ଦର୍ଶାଇବେ କି?
ଏହାର ଉତ୍ତର ଉପସ୍ଥାପନ କରି ମନ୍ତ୍ରୀ ଜି. କିଷନ୍ ରେଡ୍ଡୀ କହିଲେ, ଓଡ଼ିଶୀ ସଙ୍ଗୀତକୁ ଶାସ୍ତ୍ରୀୟ ମାନ୍ୟତା ପ୍ରଦାନ କରିବା ଲାଗି ଅନୁରୋଧ କରି ଭୁବନେଶ୍ବରର ‘ଗୁରୁ ଗୋପାଳ ପଣ୍ଡା ଓଡ଼ିଶୀ ଏକାଡେମି’ର ପ୍ରତିଷ୍ଠାତା ସଭାପତି ତଥା ଅଧ୍ୟକ୍ଷ ଗୁରୁ ଗୋପାଳ ପଣ୍ଡା, ‘ଇନ୍ଷ୍ଟିଚ୍ୟୁଟ୍ ଅଫ୍ ଇଣ୍ଡିଆନ୍ ମ୍ୟୁଜିକ୍’ର ଅଧ୍ୟକ୍ଷ ପ୍ରଫେସର୍ ପି. କେ. ମିଶ୍ର ଏବଂ ରାଜ୍ୟସଭା ସାଂସଦ ଡକ୍ଟର୍ ଅମର ପଟ୍ଟନାୟକଙ୍କ ଠାରୁ ଭାରତ ସରକାରଙ୍କ ସଂସ୍କୃତି ମନ୍ତ୍ରାଳୟ ଅଧୀନରେ କାର୍ଯ୍ୟରତ ସ୍ବଂୟଶାସିତ ସଂଗଠନ ‘ସଙ୍ଗୀତ ନାଟକ ଏକାଡେମି’ ପ୍ରସ୍ତାବମାନ ଗ୍ରହଣ କରିଛି।
ଓଡ଼ିଶୀ ସଙ୍ଗୀତକୁ ଶାସ୍ତ୍ରୀୟ ମାନ୍ୟତା ଏବଂ ପାଇକ ବିଦ୍ରୋହକୁ ପ୍ରଥମ ସ୍ବାଧୀନତା ସଂଗ୍ରାମ ମାନ୍ୟତା ଦେବା ପାଇଁ ସରକାର ପ୍ରକାରାନ୍ତରେ ସ୍ପଷ୍ଟ କରିଥିବା ମଧ୍ୟ ଏଥିରୁ ଜଣାପଡୁଛି।