ଭୁବନେଶ୍ବର: ଉଚ୍ଚ ମାଧ୍ୟମିକ ବିଦ୍ୟାଳୟ(ଯୁକ୍ତ୨ କଲେଜ) କ୍ୟାମ୍ପସରେ ରୢାଗିଂ ଓ ନିର୍ଯାତନା ରୋକିବା ଉପରେ ରାଜ୍ୟ ସରକାର କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି। କୌଣସି ପରିସ୍ଥିତିରେ ବିଦ୍ୟାଳୟ କ୍ୟାମ୍ପସରେ ଏଭଳି କାର୍ଯ୍ୟକୁ ପୋତ୍ସାହିତ ନ କରିବାକୁ ଅଧ୍ୟକ୍ଷମାନଙ୍କୁ ନିର୍ଦ୍ଦେଶ ଦିଆଯାଇଛି। ଆସନ୍ତା ୨୪ ତାରିଖଠାରୁ ଯୁକ୍ତ୨ ପ୍ରଥମ ବର୍ଷ ଛାତ୍ରଛାତ୍ରୀଙ୍କ ପାଠପଢ଼ା ଆରମ୍ଭ ହେଉଥିବାରୁ ତାହାକୁ ନଜରରେ ରଖି ଏଭଳି ଆଭିମୁଖ୍ୟ ଗ୍ରହଣ କରିଛନ୍ତି। ଏଥିସହ ପ୍ରଥମ ଦିନ ଛାତ୍ରଛାତ୍ରୀଙ୍କୁ କ୍ୟାମ୍ପସରେ ଭବ୍ୟ ସ୍ବାଗତ ସହ ଇଣ୍ଡକ୍ସନ୍‌ କ୍ଲାସ ମାଧ୍ୟମରେ ଶିକ୍ଷାନୁଷ୍ଠାନର ଇତିହାସ, ନୀତି, ନିୟମ, ଭବିଷ୍ୟତ କ୍ୟାରିଅର ସମ୍ପର୍କରେ ଅବଗତ କରାଯିବ। ବିଦ୍ୟାଳୟ ଅଧ୍ୟକ୍ଷ ଓ ଅଧ୍ୟାପକମାନେ ଏହି କାର୍ଯ୍ୟକ୍ରମରେ ଉପସ୍ଥିତ ରହିବେ। 
ସେହିଭଳି ସମସ୍ତ ନବାଗତ ଛାତ୍ରଛାତ୍ରୀ ଅଗଷ୍ଟ ପହିଲାରେ ୟୁନିଫର୍ମ ପିନ୍ଧି ବିଦ୍ୟାଳୟ ଆସିବାକୁ କୁହାଯାଇଛି। ସ୍ଥାୟୀ ପରିଚୟପତ୍ର ଆସିବା ପୂର୍ବରୁ ଛାତ୍ରଛାତ୍ରୀଙ୍କୁ ଅସ୍ଥାୟୀ ପରିଚୟପତ୍ର ପ୍ରଦାନ କରାଯିବ। ରାଗିଂ ମୁକ୍ତ କ୍ୟାମ୍ପସ ସମ୍ପର୍କରେ ପିଲାଙ୍କୁ ଜଣାଇବା ସହ ଆଣ୍ଟି-ରୢାଗିଂ ସେଲ୍‌ ମୁଖ୍ୟଙ୍କ ନାମ ଓ ଯୋଗାଯୋଗ ନମ୍ବର ପିଲାଙ୍କୁ ପ୍ରଦାନ କରାଯିବ। ବିଦ୍ୟାଳୟରେ ଅଭ୍ୟନ୍ତରୀଣ ଅଭିଯୋଗ କମିଟି(ଆଇସିସି) ଗଠନ କରିବା ବାଧ୍ୟତାମୂଳକ। ଏଥିରେ ଜଣେ ନୋଡାଲ ଅଧିକାରୀ ନିଯୁକ୍ତ ‌ହେବେ, ତାଙ୍କ ନାମ ଓ ଯୋଗାଯୋଗ ନମ୍ବର ନୋଟିସ୍‌ ବୋର୍ଡ ଏବଂ ବିଦ୍ୟାଳୟ ୱେବସାଇଟ୍‌ରେ ଉଲ୍ଲେଖ କରାଯିବ।
ପ୍ରତି ବିଦ୍ୟାର୍ଥୀଙ୍କର ଜଣେ ପ୍ରୋକ୍ଟର ଶିକ୍ଷକ ରହିବେ, ଯିଏ କି ଛାତ୍ରଛାତ୍ରୀ ଓ ଶିକ୍ଷାନୁଷ୍ଠାନ ମଧ୍ୟରେ ଯୋଗସୂତ୍ର ସ୍ଥାପନ କରିବେ। ‌ପ୍ରୋକ୍ଟର ଜଣକ ପିଲାଙ୍କୁ ସେମାନଙ୍କ ବିଷୟ, ସେକ୍ସନ, ଗ୍ରୁପ୍‌, ଟାଇମ୍‌ଟେବୁଲ୍‌ ସମ୍ପର୍କରେ ଜଣାଇବେ। 
ନିୟମିତ ବ୍ୟବଧାନରେ ଅଭିଭାବକ-ଶିକ୍ଷକ ବୈଠକ(ପିଟିଏମ୍‌) ଡାକିବା ଏବଂ ଅଭିଭାବକଙ୍କୁ ସେଥିରେ ସାମିଲ ହେବାକୁ ପ୍ରୋତ୍ସାହିତ କରାଯିବ। କେବଳ ସେତିକି ନୁହେଁ, ଆତ୍ମରକ୍ଷା କୌଶଳ ତାଲିମ ସମ୍ପର୍କରେ ଛାତ୍ରୀଙ୍କୁ ଅବଗତ କରିବାକୁ ନିର୍ଦ୍ଦେଶ ଦିଆଯାଇଛି।