ମହାପ୍ରଭୁଙ୍କ ଗୁଆଲି ଯାତ୍ରା

ପୁରୀ : ରୁକ୍ମିଣୀଙ୍କୁ ବିବାହ ପରେ ପବିତ୍ର ଚମ୍ପକ ଦ୍ବାଦଶୀରେ ଗୁଆଲି ଯାତ୍ରାରେ ନଗର ପରିକ୍ରମା କରିଛନ୍ତି ମହାପ୍ରଭୁ। ଜ୍ୟେଷ୍ଠ ଶୁକ୍ଳ ଦ୍ବାଦଶୀ ତିଥି‌ରେ ଶ୍ରୀମଦନ ମୋହନ ଓ ଶ୍ରୀଦେବୀ ପାଲିଙ୍କିରେ ନଗର ପରିକ୍ରମା କରିଛନ୍ତି। ସକାଳ ଧୂପ ଓ ଭୋଗମଣ୍ଡପ ନୀତି ସରିବା ପରେ ଆଲଟ ଲାଗି ହୋଇ ତିନି ବାଡ଼ରେ ମହାସ୍ନାନ ଓ ନୂଆଲୁଗା ଲାଗି କରାଯାଇଥିଲା। ରୁପା ପିଙ୍ଗଣରେ ପୂଜାପଣ୍ଡା, ପତି ମହାପାତ୍ର, ମୁଦିରଥ ଚନ୍ଦନ ବିଜେ କରାଇ ଶ୍ରୀବିଗ୍ରହଙ୍କ ଶ୍ରୀଅଙ୍ଗରେ ଲାଗି କରାଇଥିଲେ।

ବର କନ୍ୟା ଶ୍ରୀମଦନମୋହନ ଓ ଶ୍ରୀଦେବୀ ରତ୍ନ ସିଂହାସନକୁ ବିଜେ କରିବା ସେଠାରେ ବନ୍ଦାପନା ହୋଇଥିଲା। ବନ୍ଦାପନା ନୀତି ସରିବା ପରେ ବରକନ୍ୟାଙ୍କୁ ଆଜ୍ଞାମାଳ ପ୍ରଦାନ କରାଯାଇଥିଲା। ଝୁଲଣ ମଣ୍ଡପ ନିକଟରେ ରଖାଯାଇଥିବା ପାଲିଙ୍କିରେ ବରକନ୍ୟା ଅଧିଷ୍ଠିତ ହୋଇଥିଲେ। ବିମାନବଡ଼ୁ ସେବକମାନେ ବଡ଼ଦେଉଳର ଚତୁଃପାର୍ଶ୍ବରେ ବେଢ଼ା ବୁଲିବା ପରେ ବିମାନ ସରଘର ଓ ଆନନ୍ଦ ବଜାରରେ ପନ୍ତିଭୋଗ ଖାଇ ସିଂହଦ୍ବାର ଦେଇ ଶ୍ରୀନଅରକୁ ବିଜେ କରିଥିଲେ। ଘଣ୍ଟ, ଘଣ୍ଟା, କାହାଳି ଓ ଆଲୋକମାଳାରେ ପଟୁଆରେ ମହାପ୍ରଭୁଙ୍କ ଶୋଭାଯାତ୍ରାରେ ଶହଶହ ଭକ୍ତ ଶ୍ରୀନଅରରେ ଗଜପତି ମହାରାଜ ବରକନ୍ୟାଙ୍କୁ ପାଛୋଟି ନେଇ ଏକ ଖଟ ଉପରେ ବିଜେ କରାଇଥିଲେ। ମହାସୁଆର ସେବାୟତଙ୍କ ଦ୍ବାରା ପ୍ରସ୍ତୁତ ପିଠା ପୂଜାପଣ୍ଡା ସେବକ ପଞ୍ଚ ଉପଚାର ବିଧିରେ ମଣୋହି କରିଥିଲେ।

ପ୍ରସାଦ ଲାଗି ପରେ ଗଜପତି ଚଳନ୍ତି ପ୍ରତିମାଙ୍କ ବନ୍ଦାପନା କରିବା ସହ ଚାମର ଆଲଟ ସେବା କରିଥିଲେ। ବିଧି ଅନୁସାରେ କିଛି ଭେଟ ଦେଇଥିଲେ। ପରେ ଶ୍ରୀନଅର ଭିତର ଶୋଧ ହୋଇଥିଲା। ଶ୍ରୀନଅରରୁ ମହାଜଜନ ସେବକମାନେ ବରକନ୍ୟାଙ୍କୁ ପାଲିଙ୍କିରେ ବିଜେ କରାଇଥିଲେ। ପାଲିଙ୍କିରେ ବର କନ୍ୟା ଯମ୍ବେଶ୍ବର ମହାଦେବଙ୍କ ମନ୍ଦିରକୁ ବିମାନ‌ବଡ଼ୁ ସେବାୟତଙ୍କ ସହଯୋଗରେ ଯାଇଥିଲେ। ସେଠାରେ ବରକନ୍ୟାଙ୍କ ଉଦ୍ଦେଶ୍ୟରେ ପଞ୍ଚଗ୍ରାସୀ ଭୋଗ ଓ ବନ୍ଦାପନା ହୋଇଥିଲା। ପରେ ବାହୁଡ଼ା ବିଜେ କରି ଦକ୍ଷିଣ ଘରକୁ ଆସିଥିଲେ। ଶ୍ରୀମନ୍ଦିରରେ ଆଲଟ, ଚନ୍ଦନ ଲାଗି ନୀତି ଓ ବଡ଼ସିଂହାର ଭୋଗ ସରିବା ପରେ ବରକନ୍ୟା ଦକ୍ଷିଣୀ ଘରୁ ଭିତର ସିଂହାସନ ବିଜେ କରିଥିଲେ।