ବୟାଳିଶମୌଜାରେ ଗୁଳିକାଣ୍ଡ: ଜଣେ ମୃତ

କଟକ: କଟକ ଜିଲ୍ଲାର ବୟାଳିଶମୌଜା ଅଞ୍ଚଳରେ ଜଣେ ବ୍ୟକ୍ତିଙ୍କୁ ଗୁଳି କରି ହତ୍ୟା କରାଯାଇଛି। ମୃତକଙ୍କ ନାମ ବିକାଶ ମହାନ୍ତି ବୋଲି ଜଣାପଡ଼ିଛି। ସେ ଜଗତସିଂପୁର ଜିଲ୍ଲାର ବିରଙ୍ଗର ବାସିନ୍ଦା।

ପୂର୍ବ ଶତ୍ରୁତାକୁ ନେଇ ଏହି ହତ୍ୟାକାଣ୍ଡ ଘଟିଥିବା ପ୍ରାଥମିକ ତଦନ୍ତରୁ ଜାଣିବାକୁ ମିଳିଛି। ପୁଲିସ ଗୁଳି ଚଳାଇଥିବା ଅଭିଯୁକ୍ତଙ୍କୁ ଅଟକ ରଖିଛି ଏବଂ ହତ୍ୟାରେ ବ୍ୟବହୃତ ବନ୍ଧୁକକୁ ଜବତ କରିଛି।

ଅଭିଯୁକ୍ତ ଜଣକ କେନ୍ଦ୍ରାପଡ଼ା ଜିଲ୍ଲାର ପଟ୍ଟାମୁଣ୍ଡାଇ ଅଞ୍ଚଳର। ସେ  ଘରେ ରଙ୍ଗ କାମ କରୁଥିଲେ। ତେଣୁ, ସେ ମୃତକଙ୍କ ସହିତ ପରିଚିତ ଥିଲେ। ଶନିବାର ସେମାନେ ହୋଲି ଖେଳିଥିଲେ ଏବଂ ମଦ୍ୟପାନ କରିଥିଲେ। ଅଭିଯୁକ୍ତ ହଠାତ୍ କୌଣସି କଥାରେ ଉତ୍ତେଜିତ ହୋଇ ଗୁଳି ଚଳାଇଥିଲେ। ଏହି ଦୁଇ ଜଣଙ୍କ ବ୍ୟତୀତ ଘଟଣାସ୍ଥଳେ ଅନ୍ୟ ଲୋକମାନେ ମଧ୍ୟ ଥିଲେ। ପୁଲିସ ସେମାନଙ୍କୁ ପଚରାଉଚରା କରୁଛି।

ଅଧିକ ପଢ଼ନ୍ତୁ: ଓଡ଼ିଶାରେ ବିଜେଡିକୁ ମଜବୁତ କରିବା ପାଇଁ ବରିଷ୍ଠମାନେ ଅଣ୍ଟା ଭିଡ଼ନ୍ତୁ: ଅଶୋକ ଚନ୍ଦ୍ର ପଣ୍ଡା

ସୂଚନା ପାଇବା ପରେ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ସେ କେଉଁଠାରୁ ବନ୍ଧୁକ ପାଇଲେ ତାହା ମଧ୍ୟ ପୁଲିସ ତଦନ୍ତ କରୁଛି। ସାଇଣ୍ଟିଫିକ୍ ଟିମ୍ ଘଟଣାସ୍ଥଳରୁ ଅଧିକ ପ୍ରମାଣ ସଂଗ୍ରହ କରୁଛି।

ସୂଚନାଯୋଗ୍ୟ, କିଛି ଦିନ ପୂର୍ବରୁ ବୟାଳିଶମୌଜା ଅଞ୍ଚଳରେ ଏକ ଦେଶୀ ବନ୍ଧୁକ ତିଆରି ୟୁନିଟ୍ ଠାବ କରାଯାଇଥିଲା। ଏହି ମାମଲାରେ ଅନ୍ୟ ରାଜ୍ୟର ଚାରି ଜଣଙ୍କୁ ଗିରଫ କରାଯାଇଥିଲା।

ଅଧିକ ପଢ଼ନ୍ତୁ: ଦୁର୍ଘଟଣା ପ୍ରବଣ ସ୍ଥାନରେ ହମ୍ପସ ନିର୍ମାଣ ଦାବିରେ ରାସ୍ତାରୋକ କଲେ ଗ୍ରାମବାସୀ