ମାନବିକତାର ପରିଚୟ ଦେଲେ ହାବିଲଦାର୍‌ ଅଶୋକ, ଦୁର୍ଘଟଣାରେ ଆହତ ବୃଦ୍ଧାଙ୍କୁ ଟେକି ନେଇ ହସ୍ପିଟାଲରେ ଭର୍ତ୍ତି କଲେ

ଭଦ୍ରକ: ସବୁ ପୁଲିସ ଦୁର୍ନୀତିଗ୍ରସ୍ତ ନୁହନ୍ତି। ସବୁ ପୁଲିସ ସମାଜ ବିରୋଧୀ କାମ ମଧ୍ୟ କରି ନଥାନ୍ତି। ପୋଲିସ ବିଭାଗରେ ଏଭଳି କିଛି କର୍ମଚାରୀ ଅଛନ୍ତି, ଯେଉଁମାନେ କି ସମାଜର ମଙ୍ଗଳ କାର୍ଯ୍ୟ କରିଥାନ୍ତି। ବିପଦରେ ପଡ଼ିଥିବା ଲୋକଙ୍କର ଆଶାବାଡ଼ି ହୋଇଥାନ୍ତି। ଆଉ ଏମିତି ଜଣେ ପୁଲିସ କର୍ମଚାରୀ ହେଉଛନ୍ତି ହାବିଲଦାର ଅଶୋକ ବେହେରା, ଯିଏକି ମାନବିକତାର ପରିଚୟ ଦେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ପରିସରକୁ ଆସିଛନ୍ତି।

ଦୁର୍ଘଟଣାଗ୍ରସ୍ତ ହୋଇ ଜଣେ ବୃଦ୍ଧା ଚାଲିପାରିନଥିବାରୁ ତାଙ୍କୁ ନିଜେ ଟେକି ନେଇ ଅଶୋକ ମହିଳା ଓ୍ବାର୍ଡରେ ପହଞ୍ଚାଇଛନ୍ତି। ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ଏହି ଦୃଶ୍ୟ । ଘଟଣାଟି ଭଦ୍ରକରେ ଘଟିଛି । ମଙ୍ଗଳବାର ସକାଳେ ଭଦ୍ରକର ଡାହାଣୀଗଡିଆ ଛକରେ ଏକ ଦୁର୍ଘଟଣା ଘଟିଥିଲା । ଦୁର୍ଘଟଣାରେ ଜଣେ ବୃଦ୍ଧା ଆହତ ହୋଇଥିଲେ । ମର୍ଣ୍ଣିଂ ଓ୍ବାକ କରୁଥିବା ପୁଲିସ ହାବିଲଦାର ଅଶୋକ ବେହେରା ଏହା ଦେଖି ସଙ୍ଗେ ସଙ୍ଗେ ସାହାଯ୍ୟ ପାଇଁ ଆଗେଇ ଆସିଥିଲେ । ଆମ୍ବୁଲାନ୍ସ ଡକାଇ ଆହତ ବୃଦ୍ଧାଙ୍କୁ ଡାକ୍ତରଖାନା ନେଇଥିଲେ । ଚାଲିକି ମହିଳା ଓ୍ବାର୍ଡ ଯିବା ସମ୍ଭବ ହୋଇନଥିବାରୁ ବୃଦ୍ଧା ଜଣଙ୍କୁ ଟେକି ନେଇ ମହିଳା ଓ୍ବାର୍ଡ ନେଇଥିଲେ ଅଶୋକ । ସୂଚନାଯୋଗ୍ୟ, ଅଶୋକ ବେହେରା ଭଦ୍ରକ ସାଂସଦ ମଞ୍ଜୁଲତା ମଣ୍ଡଳଙ୍କର ପିଏସଓ ଭାବେ ନିୟୋଜିତ ଅଛନ୍ତି।