ବ୍ୟାପିଲା ଝାଡ଼ାବାନ୍ତି ଓ ଜଣ୍ଡିସ୍, ପୁରୀ ଓ ଭୁବନେଶ୍ବରରେ ବହୁ ସଂଖ୍ୟାରେ ଆକ୍ରାନ୍ତ
ସତ୍ୟବାଦୀର ଗୋଟିଏ ପୋଖରୀ ସଂକ୍ରମିତ, ରେଡ୍ ଫ୍ଲାଗ୍ ସୂଚନା ମାରିଲା ସ୍ବାସ୍ଥ୍ୟ ବିଭାଗ
ଭୁବନେଶ୍ବର/ପୁରୀ: ପିଇବା ପାଣି ଅବ୍ୟବସ୍ଥାର ବିପଜ୍ଜନକ ଦିଗଟି ସାମ୍ନାକୁ ଆସିଛି। ‘ସମ୍ବାଦ’ର ଆଶଙ୍କା ଏବେ ସତ େହଲାଣି। ବାତ୍ୟା ପ୍ରଭାବିତ ପୁରୀ ଓ ଭୁବନେଶ୍ବରରେ ବ୍ୟାପିଛି ଝାଡ଼ାବାନ୍ତି ଓ ଜଣ୍ଡିସ୍। ପୁରୀର ଏକାଧିକ ଅଞ୍ଚଳ ଓ ରାଜଧାନୀର ଯଦୁପୁର ଅଞ୍ଚଳରେ ଝାଡ଼ାବାନ୍ତି ଘଟଣା ନଜରକୁ ଆସିଛି। ବାତ୍ୟା ପ୍ରଭାବିତ ଅଞ୍ଚଳରେ ଝାଡ଼ାବାନ୍ତି ନ ବ୍ୟାପିବା ନେଇ ସବୁ ପଦକ୍ଷେପ ଗ୍ରହଣ କରାଯାଉଥିବା ସ୍ବାସ୍ଥ୍ୟ ବିଭାଗ କହୁଥିଲେ ହେଁ, ତୃଣମୂଳସ୍ତରରେ ଚିତ୍ର କିନ୍ତୁ ଅଲଗା। ବହୁ ସ୍ଥାନରେ ବିଶୁଦ୍ଧ ପାଣିର ଅଭାବ ଯୋଗୁଁ ଆଗାମୀ ଦିନରେ ଆହୁରି ସାଂଘାତିକ ପରିସ୍ଥିତି ସୃଷ୍ଟି ହୋଇପାରେ ବୋଲି ଆଶଙ୍କା ପ୍ରକାଶ ପାଇଲାଣି ।
Sambad is now on WhatsApp
Join and get latest news updates delivered to you via WhatsApp
୪୦୫୯ କୂଅରୁ ୨୭୩୭ ସମ୍ପୂର୍ଣ୍ଣ ସୁରକ୍ଷିତ ନୁହେଁ
ସୂଚନା ମୁତାବକ, ଆଜି ପୂର୍ବାହ୍ନ ୧୦ଟା ସୁଦ୍ଧା ଜିଲ୍ଲାର ବିଭିନ୍ନ ପ୍ରଭାବିତ ଅଞ୍ଚଳରୁ ୧୯ ଜଣ ଝାଡ଼ାବାନ୍ତି ରୋଗୀ ସଂକ୍ରାମକ ରୋଗ ଚିକିତ୍ସାଳୟକୁ ଆସିଛନ୍ତି। ଏହାବ୍ୟତୀତ ୫୦ରୁ ଅଧିକ ରୋଗୀ ଚିକିତ୍ସିତ ହୋଇ ଫେରି ଯାଇଥିବା ମୁଖ୍ୟ ଚିକିତ୍ସା ଅଧିକାରୀ ସୂଚନା ଦେଇଛନ୍ତି। ବ୍ରହ୍ମଗିରି, ସଦର ଓ କଣାସ ଅଞ୍ଚଳରୁ ଅଧିକ ସଂଖ୍ୟାରେ ଝାଡ଼ାବନ୍ତି ରୋଗୀ ଚିକିତ୍ସା ପାଇଁ ଆସୁଛନ୍ତି। ଏ ପର୍ଯ୍ୟନ୍ତ ଜିଲ୍ଲାରେ ଜଣେ ହେଲେ ଜଣ୍ଡିସ ଆକ୍ରାନ୍ତ ଚିକିତ୍ସା ପାଇଁ ଆସି ନଥିବା ସୂଚନା ମିଳିଛି। ରାଜଧାନୀର ଯଦୁପୁର ଅଞ୍ଚଳର କୋଚିଲାପୁଟରେ ଝାଡ଼ାବାନ୍ତି ଦେଖା ଦେଇଛି। ସ୍ଥାନୀୟ ଅଞ୍ଚଳର ୭/୮ ପରିବାରର ୧୫ରୁ ଅଧିକ ବ୍ୟକ୍ତି ଏଥିରେ ଆକ୍ରାନ୍ତ ହୋଇ ରାଜଧାନୀର ବିଭିନ୍ନ ଡାକ୍ତରଖାନାରେ ଚିକିତ୍ସିତ ହୋଇଛନ୍ତି। ସୂଚନା ମୁତାବକ ସେଠାରେ ଗୋଟିଏ ନଳକୂପ ବିଷାକ୍ତ ହୋଇଯିବା ପରେ ଏହାକୁ ବନ୍ଦ କରି ଦିଆଯାଇଛି। ନୂଆ ଟାଙ୍କି ବସାଯାଇ ସ୍ଥାନୀୟ ଅଞ୍ଚଳରେ ଜନ ସ୍ବାସ୍ଥ୍ୟ ବିଭାଗ ପକ୍ଷରୁ ପିଇବା ପାଣି ଯୋଗାଇ ଦିଆଯାଉଛି। ଏହାସହ ଜଣେ ଜଣ୍ଡିସ୍ ଆକ୍ରାନ୍ତ ମଧ୍ୟ କ୍ୟାପିଟାଲ ହସ୍ପିଟାଲରେ ଚିକିତ୍ସିତ ହେଉଥିବା ସୂଚନା ମିଳିଛି। ସ୍ବାସ୍ଥ୍ୟ ବିଭାଗର ଜଣେ ବରିଷ୍ଠ ଅଧିକାରୀଙ୍କ କହିବା ମୁତାବକ, ରାଜଧାନୀରେ ଝାଡ଼ାବାନ୍ତି ନିୟନ୍ତ୍ରଣରେ ରହିଛି। ସ୍ଥାନୀୟ ଅଞ୍ଚଳରେ ଥିବା ନଳକୂପ ପାଣି ପିଇ ଲୋକମାନେ ଝାଡ଼ାବାନ୍ତିରେ ଆକ୍ରାନ୍ତ ହୋଇଥିବା ସନ୍ଦେହ କରାଯାଉଛି। ସେ ଦୃଷ୍ଟିରୁ ନଳକୂପରେ ପାଣି ନ ପିଇବା ପାଇଁ ରେଡକ୍ରସ୍ ମରାଯାଇଛି। ଏହା ଯେପରି ଆଗକୁ ନ ବ୍ୟାପିବ ସେଥିପାଇଁ ଯଥେଷ୍ଟ ଗୁରୁତ୍ବ ଦିଆଯାଉଛି ବୋଲି ଅଧିକାରୀ ସୂଚନା ଦେଇଛନ୍ତି।
ପୁରୀ ଜିଲ୍ଲାର ଜଳ ଉତ୍ସଗୁଡ଼ିକ ବହୁମାତ୍ରାରେ ପ୍ରଦୂଷିତ ହୋଇଯାଇଛି। ସତ୍ୟବାଦୀ ବ୍ଲକ ବଡ଼ହାଟ ଅଞ୍ଚଳରେ ଏକ ଜଳଉତ୍ସର ପାଣି ସବୁଠୁ ଅଧିକ ସଂକ୍ରମିତ ବୋଲି ଚିହ୍ନଟ କରାଯାଇଛି। ସେହି ଜଳ ଉତ୍ସକୁ ରେଡ୍ ଫ୍ଲାଗ୍ ବର୍ଗ ଭାବେ ଚିହ୍ନଟ କରିଛନ୍ତି ଜିଲ୍ଲା ସ୍ବାସ୍ଥ୍ୟ ବିଭାଗ। ଏହାବ୍ୟତୀତ ଜିଲ୍ଲାର ୨୭୩୭ଟି କୂଅ ପାଣି ଏପର୍ଯ୍ୟନ୍ତ ସୁରକ୍ଷିତ ବୋଲି କର୍ତ୍ତୃପକ୍ଷ କହି ପାରୁନାହାନ୍ତି। ‘ଫନି’ ତାଣ୍ଡବ ପରେ ଖୋଲା ଜଳ ଉତ୍ସ ଥିବା କୂଅ, ପୋଖରୀ ଓ ନାଳଗୁଡ଼ିକ ପ୍ରଦୂଷିତ ହୋଇ ଯାଇଥିବା ବେଳେ ସେଥିରେ ଗଛ ଓ ମୃତ ପଶୁପକ୍ଷୀ ପଡ଼ି ପାଣି ପଚି ଯାଇଛି। ଜଳ ଉତ୍ସ ସଂକ୍ରମଣ ନେଇ ବିଭିନ୍ନ ସ୍ଥାନରୁ ଅଭିଯୋଗ ଆସିବା ପରେ ଜିଲ୍ଲା ସ୍ବାସ୍ଥ୍ୟ ବିଭାଗ ସେଗୁଡ଼ିକର ପର୍ଯ୍ୟାୟ କ୍ରମେ ପରୀକ୍ଷା କରିଛନ୍ତି। ଜିଲ୍ଲାର ପ୍ରଭାବିତ ବ୍ଲକଗୁଡ଼ିକରେ ଥିବା ମୋଟ ୪୦୫୯ଟି କୂଅ ପାଣିର ନମୁନା ପରୀକ୍ଷଣ ପରେ ସେଗୁଡ଼ିକୁ ବିଶୋଧନ କରିବାକୁ ନିଷ୍ପତ୍ତି ନିଆଯାଇଥିଲା। ପ୍ରଥମ ପର୍ଯ୍ୟାୟରେ ସେଗୁଡ଼ିକ ବିଶୋଧନ ହୋଇସାରିଛି। ତେବେ ବ୍ୟବହାର ପାଇଁ ସମ୍ପୂର୍ଣ୍ଣ ଯୋଗ୍ୟ କରିବାକୁ ଦ୍ବିତୀୟ ପର୍ଯ୍ୟାୟ ବିଶୋଧନ କରାଯିବା କଥା। ହେଲେ ଏ ପର୍ଯ୍ୟନ୍ତ ୧୩୨୫ଟି କୂଅର ଦ୍ବିତୀୟ ପର୍ଯ୍ୟାୟ ବିଶୋଧନ କରାଯାଇଛି। ବଳକା ୨୭୩୭ କୂଅ ଏପର୍ଯ୍ୟନ୍ତ ବ୍ୟବହାର ପାଇଁ ସମ୍ପୂର୍ଣ୍ଣ ଯୋଗ୍ୟ ହୋଇ ପାରିନାହିଁ।
ସେହିପରି ସ୍ବାସ୍ଥ୍ୟ ବିଭାଗ ପକ୍ଷରୁ କେତେକ ପୋଖରୀର ଜଳ ନମୁନା ଯାଞ୍ଚ କରାଯାଇଥିଲା। ସେଥିରୁ ସତ୍ୟବାଦୀ ବଡ଼ହାଟରେ ଥିବା ଏକ ପୋଖରୀ ପାଣି ଆଦୌ ବ୍ୟବହାର ଯୋଗ୍ୟ ନୁହେଁ ବୋଲି ସିଡିଏମ୍ଓ ସୂଚନା ଦେଇଛନ୍ତି। ଉକ୍ତ ପୋଖରୀକୁ ରେଡ୍ ଫ୍ଲାଗ ବର୍ଗ ଭାବେ ଚିହ୍ନଟ କରାଯାଇ ପାଣି ବ୍ୟବହାର କରିବାକୁ ବାରଣ କରାଯାଇଛି। ଖାଦ୍ୟ ସୁରକ୍ଷା ଅଧିକାରୀଙ୍କ ପକ୍ଷରୁ ପୁରୀ ସହର ସମେତ ଉତ୍ତରା, ପିପିଲି, ବ୍ରହ୍ମଗିରିର ମୋଟ ୭୫ଟି ନଳକୂଅର ପାଣି ନମୁନା ପରୀକ୍ଷା କରାଯାଇଥିଲା। ସେଥିରୁ ୭୫ଟି ନଳକୂଅ ପାଣିରେ ପିଏଚ୍(ପୋଟେନସିଆଲ ଅଫ୍ ହାଇଡ୍ରୋଜେନ) ମାନ ଠିକ୍ ରହିଥିବାରୁ ତାହା ବ୍ୟବହାର ଯୋଗ୍ୟ ବୋଲି ରିପୋର୍ଟରେ କୁହାଯାଇଛି।