ସ୍ବାସ୍ଥ୍ୟ ସଚିବଙ୍କ ମାସିକିଆ ଛୁଟି: ଆର୍ କେ ଶର୍ମାଙ୍କୁ ସ୍ବାସ୍ଥ୍ୟ ବିଭାଗ ଦାୟିତ୍ବ
ଭୁବନେଶ୍ବର: ସ୍ବାସ୍ଥ୍ୟ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ଲମ୍ବା ଛୁଟିରେ ଯାଇଛନ୍ତି। ଆଜି ଠାରୁ ଅକ୍ଟୋବର ୧୧ ତାରିଖ ପର୍ଯ୍ୟନ୍ତ ସେ ୨୮ ଦିନ ଛୁଟିରେ ରହିବେ। ଅକ୍ଟୋବର ୧୨ରୁ ୧୫ ତାରିଖ ଯାଏ ପୂଜା ଛୁଟି ହୋଇଥିବାରୁ ସେ ୧୬ ତାରିଖରେ କାର୍ଯ୍ୟରେ ଯୋଗ ଦେବେ। ବ୍ୟକ୍ତିଗତ କାରଣ ଦର୍ଶାଇ ସେ ଏହି ଛୁଟି ନେଇଛନ୍ତି। କୃଷି ଉତ୍ପାଦନ କମିସନର୍ ତଥା ୧୯୮୭ ବ୍ୟାଚ୍ ଆଇଏଏସ୍ ଅଫିସର୍ ରାଜ କୁମାର ଶର୍ମାଙ୍କୁ ସ୍ବାସ୍ଥ୍ୟ ବିଭାଗର ଅତିରିକ୍ତ ଦାୟିତ୍ବ ଦିଆଯାଇଛି। ଏ ନେଇ ସାଧାରଣ ପ୍ରଶାସନ ବିଭାଗ ପକ୍ଷରୁ ଗତକାଲି ବିଜ୍ଞପ୍ତି ଜାରି ହୋଇଛି।
Sambad is now on WhatsApp
Join and get latest news updates delivered to you via WhatsApp
ସ୍ବାସ୍ଥ୍ୟ ବିଭାଗ ପରି ଅତ୍ୟନ୍ତ ସମ୍ବେଦନଶୀଳ ବିଭାଗର ଦାୟିତ୍ବରେ ଥିବା ବରିଷ୍ଠ ଆଇଏଏସ୍ ଅଫିସର ଶ୍ରୀ ମହାପାତ୍ର ଲମ୍ବା ଛୁଟିରେ ଯିବା ନେଇ ପାୱାର୍ କରିଡର୍ରେ ଭିନ୍ନ ଭିନ୍ନ ଚର୍ଚ୍ଚା ଜୋର୍ ଧରିଛି। ବାସ୍ତବରେ ବ୍ୟକ୍ତିଗତ କାରଣ ନା ବୃତ୍ତିଗତ ଅସନ୍ତୋଷ ପାଇଁ ସେ ଛୁଟି ନେଇଛନ୍ତି, ତାହାକୁ ନେଇ ଆଲୋଚନା ଆରମ୍ଭ ହୋଇଛି। ବର୍ତ୍ତମାନ କରୋନାର ଦ୍ବିତୀୟ ଲହର ସମ୍ପୂର୍ଣ୍ଣ ଯାଇନି। ତୃତୀୟ ଲହର ନେଇ ବିଶେଷଜ୍ଞମାନେ ମଧ୍ୟ ଆକଳନ କରୁଛନ୍ତି। ଏଥି ପାଇଁ ବିଭାଗ ପକ୍ଷରୁ ଜୋର୍ଦାର ପ୍ରସ୍ତୁତି ଚାଲିଛି। ରାଜ୍ୟ ସରକାର ସ୍ବାସ୍ଥ୍ୟ କ୍ଷେତ୍ରକୁ ସର୍ବାଧିକ ଗୁରୁତ୍ବ ଦେଉଛନ୍ତି। ଏକାଧିକ ମେଡିକାଲ କଲେଜ ଓ ହସ୍ପିଟାଲର ଭିତ୍ତିଭୂମି ନିର୍ମାଣ କାର୍ଯ୍ୟ ଚାଲୁ ରହିଛି। ପୁଣି ଆସନ୍ତା ୪ ତାରିଖରେ କୋଭିଡ ମୃତ୍ୟୁକୁ ନେଇ ସାନି ସତ୍ୟପାଠ ଦାଖଲ କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ଏପରି ଗୁରୁତ୍ବପୂର୍ଣ୍ଣ ସମୟରେ ଶ୍ରୀ ମହାପାତ୍ର ଛୁଟିରେ ଯିବାଟା ସ୍ବାଭାବିକ ବୋଲି କେହି ଗ୍ରହଣ କରିପାରୁ ନାହାନ୍ତି। ଆଉ କିଛି ମାସ ପରେ ରାଜ୍ୟ ପ୍ରଶାସନର ସର୍ବୋଚ୍ଚ ସ୍ତରରେ ଅଦଳବଦଳ ହେବାର ଥିଲା ବେଳେ ଶ୍ରୀ ମହାପାତ୍ରଙ୍କ ଛୁଟି ପ୍ରଶାସନିକ ମହଲରେ ବେଶ୍ ଗୁରୁତ୍ବ ବହନ କରୁଛି। ସୂଚନାଯୋଗ୍ୟ ଯେ ଗତ ବର୍ଷ ଏପ୍ରିଲ୍ ମାସରେ କୋଭିଡ୍ ପ୍ରଥମ ଲହର ସମୟରେ ସ୍ବାସ୍ଥ୍ୟ ବିଭାଗର ତତ୍କାଳୀନ ପ୍ରମୁଖ ଶାସନ ସଚିବ ନିକୁଞ୍ଜ ବିହାରୀ ଧଳଙ୍କୁ ବଦଳି କରାଯାଇ ଶ୍ରୀ ମହାପାତ୍ରଙ୍କୁ ଅବସ୍ଥାପିତ କରାଯାଇଥିଲା।