ଚମ୍ପୁଆରେ ହାଡ଼ଭଙ୍ଗା ଶୀତ, ଦୁଇ ଜଣଙ୍କ ମୃତ୍ୟୁ

ଚମ୍ପୁଆ : କେନ୍ଦୁଝର ଜିଲ୍ଲା ଚମ୍ପୁଆ ଅଞ୍ଚଳରେ ହାଡ଼ଭଙ୍ଗା ଶୀତ ଅନୁଭୂତ ହେଉଥିବା ବେଳେ ଏହାର ପ୍ରକୋପରେ ଦୁଇଜଣ ବ୍ୟକ୍ତିଙ୍କ ମୃତ୍ୟୁ ହୋଇଥିବା କୁହାଯାଉଛି।

ମିଳିଥିବା ସୂଚନା ଅନୁଯାୟୀ, ଚମ୍ପୁଆ ଅଞ୍ଚଳରେ ଏକ ସପ୍ତାହ ହେଲା ଶୀତ ଲହରି ଜାରି ରହିଛି। ଗତକାଲି ଚମ୍ପୁଆର ତାପମାତ୍ରା ୧୦ ଡିଗ୍ରି ସେଲ୍‌ସିୟସ୍‌ ଥିଲା। ଏହି ପ୍ରବଳ ଶୀତରେ ଚମ୍ପୁଆ ସଦର ମହକୁମା ଉପଖଣ୍ଡ ଚିକିତ୍ସାଳୟର ବାରଣ୍ଡାରେ ଶୋଇଥିବା ଜଣେ ଅସହାୟ ଲୋକଙ୍କ ମୃତ୍ୟୁ ଘଟିଥିଲା। ଉକ୍ତ ଅସହାୟ ଓ ଅଜଣା ବ୍ୟକ୍ତିଜଣକ ଅନ୍ୟ ସ୍ଥାନରୁ ଆସି ଚମ୍ପୁଆ ବଜାରରେ ଥିବା କେତେକ ଦୋକାନରେ ପାଣି ଦେବା ସହିତ ରାସ୍ତା ଝାଡୁ କରି ସେଥିରେ ଗୁଜୁରାଣ ମେଣ୍ଟାଉଥିଲେ। ତାଙ୍କର ଘର ନ ଥିବାରୁ ସେ ସନ୍ଧ୍ୟାରେ ଚମ୍ପୁଆ ଡାକ୍ତରଖାନା ବାରଣ୍ଡାକୁ ଯାଇ ଶୋଇଯାଉଥିଲେ। ଗତକାଲି ରାତିରେ ସେ ଚମ୍ପୁଆ ଡାକ୍ତରଖାନା ବାରଣ୍ଡାରେ ଶୋଇଥିବା ବେଳେ ପ୍ରବଳ ଶୀତ ଯୋଗୁ ତାଙ୍କ ମୃତ୍ୟୁ ହୋଇଥିବା କୁହାଯାଉଛି।

ସେହିପରି ଗତକାଲି ରାତିରେ ଅସହ୍ୟ ଥଣ୍ଡାରେ ଚମ୍ପୁଆ ନିକଟ ଅଢଙ୍ଗାପାଳ ଗ୍ରାମର ପାଣ୍ଡୁ ମହାନ୍ତ (୬୦)ଙ୍କ ଦେହ ଥଣ୍ଡା ପଡ଼ିଯାଇଥିଲା। ପାଣ୍ଡୁଙ୍କୁ ଚିକିତ୍ସା ପାଇଁ ପରିବାର ଲୋକ ଆଜି ଚମ୍ପୁଆ ଡାକ୍ତରଖାନା ଆଣିଥିଲେ। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କ ମୃତ୍ୟୁ ଘଟିଥିଲା।