କଟକ: ଜଳସଂପଦ ବିଭାଗର ନିୟମିତ ପଦବିରେ ଅବସରପ୍ରାପ୍ତ ଅଧିକାରୀଙ୍କୁ ନିଯୁକ୍ତି ଦିଆଯିବା ଅଭିଯୋଗକୁ ନେଇ ଦାୟର ମାମଲାକୁ ହାଇକୋର୍ଟ ଗୁରୁତ୍ବର ସହିତ ଗ୍ରହଣ କରିଛନ୍ତି। ଇଞ୍ଜିନିୟର-ଇନ୍-ଚିଫ୍ (ସିଭିଲ୍‌) ପଦକୁ ପଦୋନ୍ନତି ପାଇଁ ଯୋଗ୍ୟ ବିବେଚିତ ବ୍ୟକ୍ତିଙ୍କୁ ବଞ୍ଚିତ କରାଯିବା ଓ ଅବସରପ୍ରାପ୍ତ ଅଧିକାରୀଙ୍କୁ ପୁନଃନିଯୁକ୍ତି ପ୍ରଦାନ କରାଯିବା ପ୍ରସଙ୍ଗରେ ଜବାବ ରଖିବାକୁ ରାଜ୍ୟ ସରକାରଙ୍କୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ଜଷ୍ଟିସ୍‌ ଆଦିତ୍ୟ କୁମାର ମହାପାତ୍ରଙ୍କୁ ନେଇ ଗଠିତ ଖଣ୍ଡପୀଠ କୃଷ୍ଣଚନ୍ଦ୍ର ମହାନ୍ତିଙ୍କ ଆବେଦନର ଶୁଣାଣି କରି ଏହି ନିର୍ଦ୍ଦେଶ ପ୍ରଦାନ କରିଛନ୍ତି। ମାମଲାର ବିବରଣୀରୁ ପ୍ରକାଶ ଯେ ୨୦୨୫ ମେ ୨ରେ ବସିଥିବା ବିଭାଗୀୟ ପଦୋନ୍ନତି କମିଟି (ଡିପିସି) ବୈଠକରେ ତିନୋଟି ପଦ ପୂରଣ ପାଇଁ ମୁଖ୍ୟଯନ୍ତ୍ରୀ (ସିଭିଲ୍‌) ସ୍ତରର ୧୦ଜଣ ଅଧିକାରୀଙ୍କ ନାଁ ବିଚାରକୁ ନିଆଯାଇଥିଲା। ଆବେଦନକାରୀଙ୍କ ନାଁ ଡିପିସିରେ ବିଚାରକୁ ନିଆଯାଇଥିଲା। ତାଲିକାର ତୃତୀୟ ସ୍ଥାନରେ ଥିବା ବି.ବି.ଦାଶଙ୍କୁ ପଦୋନ୍ନତି ପ୍ରଦାନ କରାଯାଇଥିଲେ ମଧ୍ୟ ଚତୁର୍ଥ ସ୍ଥାନରେ ଥିବା ଆବେଦନକାରୀଙ୍କୁ ଇଞ୍ଜିନିୟର-ଇନ୍‌-ଚିଫ୍‌ ପଦକୁ ପଦୋନ୍ନତି ପ୍ରଦାନ କରାଯାଇ ନଥିଲା। ଅପରପକ୍ଷରେ ଗତ ଜୁନ ୩୦ରେ ଜଳସମ୍ପଦ ବିଭାଗର ଇଞ୍ଜିନିୟର-ଇନ୍-ଚିଫ୍‌ ଭାବେ ଅବସର ଗ୍ରହଣ କରିଥିବ‌ା ସି.ଏସ୍‌.ପାଢ଼ୀଙ୍କୁ ପୁନଃନିଯୁକ୍ତି ମିଳିଥିଲା। ଇଞ୍ଜିନିୟର-ଇନ୍-ଚିଫ୍ ପଦକୁ ପଦୋନ୍ନତି ପାଇଁ ଆବେଦନକାରୀ ଯୋଗ୍ୟ ହୋଇଥିଲେ ମଧ୍ୟ ତାଙ୍କୁ ଏଥିରୁ ବଞ୍ଚିତ କରାଯାଇଛି ବୋଲି ହାଇକୋର୍ଟରେ ଦାୟର ଆବେଦନରେ ଉଲ୍ଲେଖ କରାଯାଇଛି।