ଭୁବନେଶ୍ବର: କଂଗ୍ରେସର ୧୨ ବିଧାୟକଙ୍କ ନିଲମ୍ବନକୁ ନେଇ ହାଇଡ୍ରାମା ଦେଖିବାକୁ ମିଳିଛି। ବିଧାନସଭା ଭିତରେ ଓ ବାହାରେ ଏହାର ତାତି ଦେଖିବାକୁ ମିଳିଛି। ବିଧାୟକମାନଙ୍କୁ ମାର୍ଶାଲ ଲଗାଇ ଗୃହ ଭିତରୁ ଜବରଦସ୍ତ ବାହାର କରାଯାଇଥିବା ଜଣାପଡ଼ିଛି। ଏଥିରେ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ ଆହତ ହୋଇଛନ୍ତି। ଏହା ଜଣାପଡ଼ିବା ପରେ କଂଗ୍ରେସ ଭୀଷଣ ପ୍ରତିକ୍ରିୟାଶୀଳ ହୋଇଛି। କଂଗ୍ରେସର ବରିଷ୍ଠ ଓ ଯୁବ ନେତା ଏକାଠି ହୋଇ ରାସ୍ତାକୁ ଓହ୍ଲାଇ ଏହାର ପ୍ରତିବାଦ କରିଛନ୍ତି। ରାତିରେ ବିଧାନସଭା ସାମ୍ନାରେ କଂଗ୍ରେସ କର୍ମୀମାନେ ବିକ୍ଷୋଭ ପ୍ରଦର୍ଶନ କରିବା ସହ ନିଷ୍ପତ୍ତିର ପ୍ରତିବାଦ ଜଣାଇଛନ୍ତି। ଅଘଟଣ ଆଶଙ୍କାରେ ବିଧାନସଭା ଆଖପାଖ ଅଞ୍ଚଳରେ ବ୍ୟାପକ ପୁଲିସ ମୁତୟନ କରାଯାଇଛି। 

Advertisment

ଆଜି ଅପରାହ୍ନରେ ବାଚସ୍ପତି ୧୨ ଜଣଙ୍କ ନିଲମ୍ବନ କଲା ପରେ ବି ସେମାନେ ଗୃହ ବାହାରକୁ ଯାଇ ନଥିଲେ। ବାଚସ୍ପତିଙ୍କ ନିଷ୍ପତ୍ତି ଅଗାଣତନ୍ତ୍ରିକ କହି ଗୃହ ମଧ୍ୟ ଭାଗରେ ବସି ରହି ପ୍ରତିବାଦ କରିଥିଲେ। ଏହା ପରେ ବାଚସ୍ପତି ବିଭିନ୍ନ ପର୍ଯ୍ୟାୟରେ ଗୃହକୁ ମୁଲତବୀ ରଖିଥିଲେ ବି ସେମାନେ ଯାଇ ନଥିଲେ। ‌ପାଖାପାଖି ୭ଟା ବେଳେ ବାଚସ୍ପତି ଗୃହକୁ ଆସନ୍ତାକାଲି ପର୍ଯ୍ୟନ୍ତ ମୁଲତବୀ ରଖିଲେ। କିନ୍ତୁ ନିଲମ୍ବନ ନିଷ୍ପତ୍ତିର ପ୍ରତିବାଦରେ ରାତିତମା ଗୃହରେ ବସିରହିବେ ବୋଲି କଂଗ୍ରେସ ବିଧାୟକମାନେ ଶୁଣାଇ ଦେଇଥିଲେ। ସେହି ଅନୁଯାୟୀ ସେମାନେ ଗୃହ ଭିତରେ ବସି ରହିଲେ। 

କଂଗ୍ରେସ ବିଧାୟକମାନଙ୍କୁ କିପରି ବାହାର କରାଯିବ, ତାହା କାଠିକର ପାଠ ହୋଇପଡ଼ିଥିଲା। ପ୍ରଥମେ ପ୍ରେସ୍ ଗ୍ୟାଲେରିକୁ ଖାଲି କରିଦିଆଯାଇଥିଲା। ରାତି ହୋଇଯାଇଥିବାରୁ ଗ୍ୟାଲେରି ବନ୍ଦ ହେବ କହି ଗଣମାଧ୍ୟମ ପ୍ରତିନିଧିମାନଙ୍କୁ ଚାଲିଯିବାକୁ ସୁରକ୍ଷାକର୍ମୀମାନେ କହିଥିଲେ। ତାହା ପରେ ବିଧାନସଭା ପରିସରରେ ମଧ୍ୟ ନରହିବା ପାଇଁ ଗଣମାଧ୍ୟମ ପ୍ରତିନିଧିମାନଙ୍କୁ କୁହାଯାଇଥିଲା। ରାତି ପ୍ରାୟ ୮ଟା ବେଳକୁ କ୍ୟାମେରା ଟିମ୍ ସହ ପ୍ରତିନିଧିମାନେ ମୁଖ୍ୟ ଫାଟକ ବାହାରକୁ ଚାଲିଯାଇଥିଲେ। ଏହାର କିଛି ସମୟରେ ଗୃହ ଲବି ନିକଟରେ ସୁରକ୍ଷା କର୍ମୀ ଓ କଂଗ୍ରେସ ବିଧାୟକଙ୍କ ଠେଲାପେଲା ହୋଇଥିଲା। ବିଧାୟକ ସତ୍ୟଜିତ ଗମାଙ୍ଗୋ ଏକ ଭିଡିଓ ବାର୍ତ୍ତାରେ ଜଣାଇଛନ୍ତି, କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ ଓ ବିଧାୟକ ମଙ୍ଗୁ ଖିଲ ଟଏଲେଟ୍‌ ଯିବାକୁ ବାହାରକୁ ଆସିଥି‌ଲେ। ‌ଆଉ ସେମାନଙ୍କୁ ବିଧାନସଭାର ସୁରକ୍ଷାକର୍ମୀ ଭିତରକୁ ଛାଡ଼ି ନଥିଲେ। ଏହାକୁ ନେଇ ପ୍ରବଳ ଯୁକ୍ତିତର୍କ ହୋଇଥିଲା। ମଙ୍ଗୁ ଖିଲଙ୍କୁ ସୁରକ୍ଷା କର୍ମୀମାନେ ଟେକିକି ଆଣି ବାହାରେ ଛାଡ଼ିଥିଲେ। ଶ୍ରୀ କାଡ଼ାମଙ୍କୁ ପେଲି ଦେଇ କବାଟରେ ଚାପି ଦେବାରୁ ତାଙ୍କ ହାତ ଖଣ୍ଡିଆ ହୋଇଗଲା। ତାରାପ୍ରସାଦ ବାହିନୀପତି ଓ ସାଗର ଦାସ ସେଠାକୁ ଯାଇ କବାଟ ପେଲି ଭାଙ୍ଗିବାରୁ ତାଙ୍କ ହାତ ବାହାରିଥିଲା। ଏହା ପରେ ଶ୍ରୀ ବାହିନୀପତି ସୁରକ୍ଷା କର୍ମୀ ଏପରି ନକରିବା ପାଇଁ ତାଗିଦ୍ କରିଥିଲେ। କଂଗ୍ରେସ ବିଧାୟକ ଦଳ ନେତାଙ୍କ ପ୍ରକୋଷ୍ଠରେ ଉପସ୍ଥିତ ଥିବା ଛାତ୍ର କଂଗ୍ରେସ ନେତା ବିଭୂତି ଭୂଷଣ ମହାପାତ୍ର ଏହି ଘଟଣାର ଭିଡିଓ ସାମାଜିକ ଗଣମାଧ୍ୟମରେ ପୋଷ୍ଟ କଲା ପରେ କଂଗ୍ରେସ ନେତା ଓ କର୍ମୀମାନେ ତାତି ଯାଇଥିଲେ। ବିଧାୟକମାନଙ୍କୁ ଅଶୋଭନୀୟ ବ୍ୟବହାର କରାଯିବା ସହ ଆକ୍ରମଣ କରାଯାଇଛି ବୋଲି ପ୍ରଚାର ହୋଇଯାଇଥିଲା। 

ରାତି ପ୍ରାୟ ସାଢ଼େ ୯ଟାରେ ପିସିସି ସଭାପତି ଭକ୍ତଚରଣ ଦାସ କଂଗ୍ରେସ କର୍ମୀମାନଙ୍କ ସହ ବିଧାନସଭା ଅଭିମୁଖେ ଯାଇଥିଲେ। ବରିଷ୍ଠ କଂଗ୍ରେସ ନେତା ନରସିଂହ ମିଶ୍ର, ନିରଞ୍ଜନ ପଟ୍ଟନାୟକ, ଜୟଦେବ ଜେନା ଓ ଶରତ ରାଉତ ବି ବିଧାନସଭା ଫାଟକ ନିକଟରେ ପହଞ୍ଚିଯାଇଥିଲେ। ବିଧ‌ାୟକମାନଙ୍କୁ ଦେଖା କରିବାକୁ ଭିତରକୁ ଯିବା ପାଇଁ ସେମାନେ ଚାହିଥିଲେ। କିନ୍ତୁ ପୁଲିସ ସେମାନଙ୍କୁ ଛାଡ଼ି ନଥିଲା। ଶ୍ରୀ ମିଶ୍ର ବାଚସ୍ପତିଙ୍କୁ ଫୋନ୍ କରିଥିଲେ ବି ସେ ରିସିଭ୍‌ କରି ନଥିଲେ। ଏଠାରେ ବିଏନ୍‌ଏସ୍‌ ୧୬୩ ଧାରା ଲାଗୁ ହୋଇଥିବାରୁ ଯିବାକୁ ଦିଆଯିବନି ବୋଲି ପୁଲିସ କହିଥିଲା। କିନ୍ତୁ ୫ ଜଣ ଏକାଠି ଯିବାରେ ବିଏନ୍‌ଏସ୍‌ ୧୬୩ ଧାରା ପ୍ରତିବନ୍ଧକ ନୁହେଁ ବୋଲି ଶ୍ରୀ ମିଶ୍ର ଯୁକ୍ତି ବାଢ଼ିଥିଲେ। ସରକାରଙ୍କ ଏପରି ଅଗାଣତାନ୍ତ୍ରିକ କାର୍ଯ୍ୟକୁ ନେତାମାନେ ତୀବ୍ର ସମାଲୋଚନା କରିଥିଲେ। ରାତି ପ୍ରାୟ ସାଢ଼େ ୧୦ଟା ବେଳକୁ କଂଗ୍ରେସ ରାଜ୍ୟ ପ୍ରଭାରୀ ଅଜୟ କୁମାର ଲଲ୍ଲୁ ବିଧାନସଭା ନିକଟରେ ପହଞ୍ଚିଥିଲେ। ରାଜ୍ୟ ସରକାରଙ୍କ ବିରୋଧୀଙ୍କ ପ୍ରତି ଦମନମୂଳକ ନୀତିକୁ ଭର୍ତ୍ସନା କରିଥିଲେ।

ଏହି ସମୟରେ ବହୁ ସଂଖ୍ୟା କଂଗ୍ରେସ କର୍ମୀ ବିଧାନସଭା ସମ୍ମୁଖରେ ଏକାଠି ହୋଇ ଧାରଣା ଦେବା ସହ ବିକ୍ଷୋଭ ପ୍ରଦର୍ଶନ କରିଥିଲେ। କଂଗ୍ରେସ ନେତା ଓ କର୍ମୀଙ୍କ ସମାଗମ ବଢ଼ୁଥିବାରୁ ବିଧାନସଭା ଫାଟକ ନିକଟସ୍ଥ ରାସ୍ତାଗୁଡ଼ିକୁ ସିଲ୍‌ କରାଯିବା ସହ ପୁଲିସ ଛାଉଣି କରିଦିଆଯାଇଥିଲା। ପ୍ରଥମେ ବିକ୍ଷୋଭ ପ୍ରଦର୍ଶନ କରୁଥିବା କର୍ମୀମାନଙ୍କୁ ପୁଲିସ ଉଠାଇ ନେଇଥିଲା। ପରେ ରାତି ପ୍ରାୟ ୧୧ଟା ବେଳକୁ ବରିଷ୍ଠ ନେତାମାନଙ୍କୁ ମଧ୍ୟ ପୁଲିସ ନେଇ କ୍ୟାପିଟାଲ୍‌ ଥାନାରେ ଛାଡ଼ିଥିଲା।