ବହୁଚର୍ଚ୍ଚିତ ନବ ଦାସ ହତ୍ୟା ମାମଲା: ମୁଖ୍ୟ ସାକ୍ଷୀଙ୍କ ସାକ୍ଷ୍ୟ ଗ୍ରହଣ ଆଜି

ଝାରସୁଗୁଡ଼ା: ବହୁଚର୍ଚ୍ଚିତ ନବ ଦ‌ାସ ହତ୍ୟା ମାମଲାରେ ବୁଧବାର ଝାରସୁଗୁଡ଼ା ଏଡିଜେ କୋର୍ଟରେ ଶୁଣାଣି ରହିଛି। ବୁଧବାର ଏହି ଘଟଣାର ଅନ୍ୟତମ ମୁଖ୍ୟ ସାକ୍ଷୀ କହାଯାଉଥିବା ତତ୍କାଳୀନ ବ୍ରଜରାଜନଗର ଥାନାଅଧିକାରୀ ପ୍ରଦ୍ୟୁମ୍ନ କୁମାର ସ୍ବାଇଁଙ୍କର ସାକ୍ଷ୍ୟ ଗ୍ରହଣ ହେବ। ଗତ ମାର୍ଚ୍ଚରେ କ୍ରାଇମ୍‌ବ୍ରାଞ୍ଚ ପକ୍ଷରୁ ସାନି ତଦନ୍ତ ଆରମ୍ଭ ହୋଇଥିବାବେଳେ ଘଟଣା ଦିନ ପୁଲିସର ବନ୍ଧୁକ ଛଡ଼ାଇଥିବା ବିଜେଡି କର୍ମୀ ସରୋଜ ସା’ ଦେଇଥିବା ବୟାନ ଶ୍ରୀ ସ୍ବାଇଁଙ୍କୁ ବିବାଦ ଘେରକୁ ଟାଣି ଆଣିଥିଲା। ବ୍ରଜରାଜନଗର ଥାନା ଅନ୍ତର୍ଗତ ଗାନ୍ଧୀଛକ ଫାଣ୍ଡିରେ ସେତେବେଳେ କାର୍ଯ୍ୟ କରୁଥିବା ଅଭି‌ଯୁକ୍ତ ଗୋପାଳ ଦାସ ଗୁଳିମାଡ଼ କରିଥିବା ନେଇ କ୍ରାଇମ୍‌ବ୍ରାଞ୍ଚ ନିଜ ରିପୋର୍ଟରେ ଦର୍ଶାଇଥିବାବେଳେ ଘଟଣା ଦିନ ଆଇଆଇସି ଶ୍ରୀ ସ୍ବାଇଁ କାହିଁକି ନିଜର ପିସ୍ତଲ ହୋଲ୍‌ଷ୍ଟର ଖୋଲା ରଖିଥିଲେ ତାକୁ ନେଇ ବି ପ୍ରଶ୍ନ ଉଠିଥିଲା। ଏ ନେଇ ଗୋପାଳର ଓକିଲ ନରେଶ ନାୟକଙ୍କୁ ପଚରାଯିବାରୁ, ସାକ୍ଷ୍ୟ ଗ୍ରହଣ ସମୟରେ ତମାମ ପ୍ରସଙ୍ଗରେ ଶ୍ରୀ ସ୍ବାଇଁଙ୍କୁ ଜେରା କରାଯାଇପାରେ ବୋଲି କହିଛନ୍ତି। 

୨୦୨୩ ମସିହା ଜାନୁଆରି ୨୯ ତାରିଖରେ ବ୍ରଜରାଜନଗର ଗାନ୍ଧୀ ଛକରେ ନବ ଦାସଙ୍କୁ ଗୁଳିମାଡ଼ କରାଯିବାବେଳେ ଘଟଣାସ୍ଥଳରେ ଅଭିଯୁକ୍ତ ଗୋପାଳ ଦାସ ହାତରେ ବନ୍ଧୁକ ଧରି ଛିଡ଼ା ହୋଇଥିବା ଦୃଶ୍ୟ ଭିଡିଓରେ ଉତ୍ତୋଳିତ ହୋଇଥିଲା। ଠିକ୍‌ ସେହି ସମୟରେ କିଛି ବ୍ୟକ୍ତିଙ୍କ ମୋବାଇଲ୍‌ରେ ଆଉ ଏକ ଦୃଶ୍ୟ ବି କଏଦ୍‌ ହୋଇଥିଲା। ତତ୍କାଳୀନ ଥାନାଧିକାରୀ ପ୍ରଦ୍ୟୁମ୍ନ ସ୍ବାଇଁ ଓ ଅନ୍ୟ ପୁଲିସ କର୍ମଚାରୀ ଗୋପାଳର କଲର ଧରି ତାକୁ କାବୁ କରିଥିବାବେଳେ ସେହି ଭିଡ଼ ଭିତରୁ ଜଣେ ଯୁବକ ଆଉ ଏକ ବନ୍ଧୁକ ଧରି ବାହାରିବା ସହ ତାକୁ ପ୍ରଦର୍ଶନ କରି ବୁଲୁଥିବା ଦେଖିବାକୁ ମିଳିଥିଲା। କିନ୍ତୁ ଉକ୍ତ ବନ୍ଧୁକ ସଂପର୍କରେ ପୁଲିସ ନିଜ ତଦନ୍ତ ରିପୋର୍ଟରେ କୌଣସି ତଥ୍ୟ ପ୍ରକାଶ କରିନଥିଲା। କିନ୍ତୁ ପରେ ବିଜେଡି କର୍ମୀ ସରୋଜ ସା’ ନିଜେ ତତ୍କାଳୀନ ଆଇଆଇସି ଶ୍ରୀ ସ୍ବାଇଁ କାଳେ ଗୁଳିମାଡ଼ କରିବେ ସେହି ଆଶଙ୍କାରେ ତାଙ୍କ ବନ୍ଧୁକ ଛଡ଼ାଇ ନେଇଥିଲେ ବୋଲି ଗଣମାଧ୍ୟମ ସମ୍ମୁଖରେ କହିଥିଲେ। ହେଲେ ବନ୍ଧୁକ ଛଡ଼ାଯିବା ଘଟଣାରେ ଶ୍ରୀ ସ୍ବାଇଁଙ୍କ ବିରୋଧରେ ବିଭାଗୀୟ ପ୍ରୋସିଡିଂ ବି ହୋଇନଥିଲା। ଦ୍ବିତୀୟରେ ଗୁଳିକାଣ୍ଡ ପରେ ଗୋପାଳ ଦାସକୁ ୨ ଜଣ କନେଷ୍ଟବଳ କାବୁ କରିଥିବା ଦୃଶ୍ୟ ଭିଡିଓରେ ଦେଖା ଯାଉଥିବାବେଳେ କିଭଳି ଗୋପାଳର ଗୁଳିରେ ଆଇଆଇସିଙ୍କ ଆଙ୍ଗୁଠି ଖଣ୍ଡିଆ ହେଲା ତାହା ମଧ୍ୟ ରହସ୍ୟାବୃତ୍ତ ହୋଇ ରହିଯାଇଛି।

ତୃତୀୟରେ ନବ ଦାସ ହତ୍ୟା ମାମଲାରେ ଏସ୍‌ଏଫ୍‌ଏସ୍‌ଏଲ୍‌ ରିପୋର୍ଟ ସାମନାକୁ ଆସିବା ପରେ ଦ୍ବିତୀୟ କାର୍‌ରେ ହୋଇଥିବା ଗୁଳିମାଡ଼ ଘଟଣା ଲୋକଲୋଚନକୁ ଆସିଥିଲା। କିନ୍ତୁ ତତ୍କାଳୀନ ବ୍ରଜରାଜନଗର ଥାନାଧିକାରୀ ଶ୍ରୀ ସ୍ବାଇଁ ସାଦାକାଗଜରେ ଦେଇଥିବା  ଏଫ୍‌ଆଇଆର୍‌ରେ ଏ ସଂକ୍ରାନ୍ତରେ କୌଣସି ସୂଚନା ପ୍ରଦାନ କରିନଥିଲେ। ଚତୁର୍ଥରେ କୌଣସି ମାମଲାରେ ଅଭିଯୋଗକାରୀ ନ ଥିଲେ ବା ଏତଲା ଦେବା ଅବସ୍ଥାରେ ନଥିଲେ ପୁଲିସ ନିଜ ଆଡ଼ୁ ସାଦାକାଗଜରେ ଏଫ୍‌ଆଇଆର୍‌ କରିଥାଏ। ମାତ୍ର ଏହି ଘଟଣାରେ ନବ ଦାସଙ୍କ ପରିବାର ଲୋକ, ତାଙ୍କ ସହକର୍ମୀ ଉପସ୍ଥିତ ଥାଇ ମଧ୍ୟ ତତ୍କାଳୀନ ଆଇଆଇସି ଶ୍ରୀ ସ୍ବାଇଁ କାହିଁକି ନିଜ ଆଡ଼ୁ ସାଦାକାଗଜରେ ଏଫ୍‌ଆଇଆର୍‌ କରିଥିଲେ ଓ ପରବର୍ତ୍ତୀ ସମୟରେ ପରିବାର ଲୋକଙ୍କଠାରୁ ବି ଏତଲା ନିଆଯାଇନଥିଲା ତାହାର ଉତ୍ତର ବି ଆଜିଯାଏଁ ରହସ୍ୟାବୃତ୍ତ ହୋଇରହିଛି। ତେବେ ଆସନ୍ତାକାଲିର ସାକ୍ଷ୍ୟ ଗ୍ରହଣ ସମୟରେ ଶ୍ରୀ ସ୍ବାଇଁଙ୍କୁ ଏ ସମ୍ପର୍କିତ ପ୍ରଶ୍ନର ସାମନା କରିବାକୁ ପଡ଼ିପାରେ ବୋଲି ବିଭିନ୍ନ ମହଲରେ ମତପ୍ରକାଶ ପାଉଛି।