ଭୁବନେଶ୍ବର: ରାଜ୍ୟରେ ଆଉ ୫ଟି ‌ଘରୋଇ ବିଶ୍ବବିଦ୍ୟାଳୟ ଖୋଲିବ। ରାଉରକେଲାରେ ଗୋଟିଏ ଖୋଲିବାକୁ ଆଗ୍ରହ ପ୍ରକାଶ କରିଥିବା ବେଳେ ଭୁବନେଶ୍ବରରେ କ୍ୟାମ୍ପସ କରିବାକୁ ଏକାଧିକ ଶିକ୍ଷାନୁଷ୍ଠାନ ଆଗ୍ରହ ପ୍ରକାଶ କରିଛନ୍ତି। ସାଧାରଣ ପାଠ୍ୟକ୍ରମ ସହ ଇଞ୍ଜିନିୟରିଂ, ଏମ୍‌ବିଏ, ଏମ୍‌ସିଏ ପରି ବିଷୟରେ ଛାତ୍ରଛାତ୍ରୀଙ୍କୁ ଶିକ୍ଷା ପ୍ରଦାନ କରିବେ। ପ୍ରଥମ ପର୍ଯ୍ୟାୟରେ ୧୦୦୦ ଛାତ୍ରଛାତ୍ରୀଙ୍କ ଶିକ୍ଷାଦାନ ପାଇଁ ଅନୁମତି ଦେବାକୁ ୩ଟି ଶିକ୍ଷାନୁଷ୍ଠାନ ରାଜ୍ୟ ସରକାରଙ୍କ ନିକଟରେ ଆବେଦନ କରିଛନ୍ତି। ଓଡ଼ିଶାରେ ନିଜସ୍ବ ପରିଚୟ ସୃଷ୍ଟି କରିଥିବା ଏକ ବିଦ୍ୟାଳୟ ସଙ୍ଗଠନ ରାଉରକେଲାରେ ବିଶ୍ବବିଦ୍ୟାଳୟ କ୍ୟାମ୍ପସ କରିବାକୁ ଆଗ୍ରହ ପ୍ରକାଶ କରିଥିବା ଜଣାପଡ଼ିଛି। ଆବେଦନ କରିଥିଲେ ମଧ୍ୟ ଡିପିଆର୍‌ ଚୂଡ଼ାନ୍ତ କରି ନ ଥିବାରୁ ଏବେ ସମସ୍ୟା ସୃଷ୍ଟି ହୋଇଛି। ବିନା ଡିପିଆର୍‌ରେ ଅନୁମତି ପ୍ରଦାନ ନ କରିବାକୁ ଉଚ୍ଚଶିକ୍ଷା ବିଭାଗର ଉଚ୍ଚସ୍ତରୀୟ କମିଟି ବୈଠକରେ ନିଷ୍ପତ୍ତି ହୋଇଛି।

Advertisment

ଗତ ସପ୍ତାହରେ ଦୁଇ ଦିନ ଧରି ଅନୁଷ୍ଠିତ ବୈଠକ ଅନୁଯାୟୀ ବିଶ୍ବବିଦ୍ୟାଳୟ ପ୍ରତିଷ୍ଠା କରିବାକୁ ଆଗ୍ରହ ଦେଖାଇଥିବା ଶିକ୍ଷାନୁଷ୍ଠାନଗୁଡ଼ିକର ଡିପିଆର ଅନୁଧ୍ୟାନ କରିବାକୁ ଏକ ସବ୍‌ କମିଟି ଗଠନ ‌କରାଯିବ। ସବ୍‌-କମିଟିରେ ଉଚ୍ଚଶିକ୍ଷା ବିଭାଗର ଅଧିକାରୀଙ୍କ ସମେତ ଶିକ୍ଷା‌ବିତ୍‌, କୁଳପତି, ପ୍ରଫେସର ସଦସ୍ୟ ରହିବେ। କମିଟି ଯେଉଁ ନିଷ୍ପତ୍ତି ନେବ ସେହି ଅନୁଯାୟୀ ବିଶ୍ବବିଦ୍ୟାଳୟ କ୍ୟାମ୍ପସ ଖୋଲିବାକୁ ଅନୁମତି ଦିଆଯିବ। ଆଉ ଏକ ନିଷ୍ପତ୍ତି କ୍ରମେ ୨୦୨୫-୨୬ ଶିକ୍ଷାବର୍ଷରେ ରାଜ୍ୟରେ ନୂଆ ଡିଗ୍ରି କଲେଜ ଖୋଲିବ ନାହିଁ। ବରଂ ଯେଉଁ ବ୍ଲକରେ ବିଜ୍ଞାନ ଓ ବାଣିଜ୍ୟ ପରି ପାଠ୍ୟକ୍ରମ ନାହିଁ ସେଠାରେ ଖୋଲିବାକୁ ସ୍ଥିର ହୋଇଛି। ଉପାନ୍ତ ଅଞ୍ଚଳକୁ ଅଧିକ ଗୁରୁତ୍ବ ଦିଆଯାଇଛି।

ପାଖାପାଖି ବର୍ଷକ ପରେ ବସିଥିବା ଏହି ଉଚ୍ଚସ୍ତରୀୟ କମିଟିରେ ସ୍ଥାୟୀ ଓ ଅସ୍ଥାୟୀ ଅନୁମତି ଲୋଡ଼ିଥିବା ଶତାଧିକ କଲେଜ ଉପରେ ଆଲୋଚନା ହୋଇଛି। କେଉଁ କଲେଜକୁ ଅନୁମତି ମିଳିବ ଏବଂ କାହାକୁ ମିଳିବ ନାହିଁ ସେନେଇ ମାନସମନ୍ଥନ ହୋଇଛି। ଏମ୍‌ବିଏ ପାଠ୍ୟକ୍ରମରେ ଖୋଲିବାକୁ କେତେକ କଲେଜ ଆବେଦନ କରିଥିଲେ। ଆରମ୍ଭରୁ ହିଁ ସେମାନେ ୧୨୦ ସିଟ୍‌ ଖୋଲିବାକୁ ଅନୁମତି ଲୋଡ଼ିଥିବାରୁ ବୈଠକରେ ତାହାକୁ ବିରୋଧ କରାଯାଇଥିଲା। ଏତେ ସଂଖ୍ୟକ ସିଟ୍‌ ଅନୁମତି ଦିଆଯାଇପାରିବ ନାହିଁ ବୋଲି କୁହାଯାଇଛି। ପାଠ୍ୟକ୍ରମ ଆରମ୍ଭରୁ ୩୨ ସିଟ୍‌ ପାଇଁ ଅନୁମତି ପାଇଁ ନିଷ୍ପତ୍ତି ହୋଇଥିବା ଜଣାପଡ଼ିଛି। ବୈଠକର ମିନିଟ୍‌ ଟୁ ମିନିଟ୍‌ ବିଜ୍ଞପ୍ତି ଆସିବା ପରେ ପ୍ରକୃତ ତଥ୍ୟ ଜଣାପଡ଼ିବ ବୋଲି ଉଚ୍ଚଶିକ୍ଷା ବିଭାଗର ଜଣେ ଅଧିକାରୀ କହିଛନ୍ତି।