ଆଜିଠୁ ବିଶ୍ବକପ୍‌ ଲଢ଼େଇ, ୪୮ ବର୍ଷର ପଦକ ମରୁଡ଼ିର ଅବସାନ ଲକ୍ଷ୍ୟରେ ଭାରତ

ଭୁବନେଶ୍ବର : ଭୁବନେଶ୍ବର ଓ ରାଉରକେଲାରେ ଆୟୋଜିତ ହେବାକୁ ଥିବା ଏଫ୍‌ଆଇଏଚ୍‌ ପୁରୁଷ ହକି ବିଶ୍ବକପ୍‌ର ପଞ୍ଚଦଶତମ ସଂସ୍କରଣ ଶୁକ୍ରବାରଠୁ ଆରମ୍ଭ ‌ହେବ। ଏଥିଲାଗି ଭୁବନେଶ୍ବରର କଳିଙ୍ଗ ଏବଂ ରାଉରକେଲାର ବିର୍ସା ମୁଣ୍ଡା ଷ୍ଟାଡିୟମ ପ୍ରସ୍ତୁତ ରହିଛି। ଅଂଶଗ୍ରହଣକାରୀ ୧୬ ଦଳ ମଧ୍ୟ ନିଜ ନିଜର ପ୍ରଥମ ମ୍ୟାଚ୍‌ ଖେଳିବାକୁ ଉତ୍ସାହର ସହ ଚାହିଁ ରହିଛନ୍ତି। ପ୍ରଥମ ଦିନ ‘ଏ’ ଓ ‘ଡି’ ପୁଲ୍‌‌ରେ ଥିବା ୮ ଦଳ ୪ ମ୍ୟାଚ୍‌ ଖେଳିବେ। କଳିଙ୍ଗ ଷ୍ଟାଡିୟମରେ ଅପରାହ୍ଣ ୧ଟାରେ ଅର୍ଜେଣ୍ଟିନା ଓ ଦକ୍ଷିଣ ଆଫ୍ରିକା ମଧ୍ୟରେ ଏହି ବିଶ୍ବକପ୍‌ର ପ୍ରଥମ ମ୍ୟାଚ୍‌ ଖେଳାଯିବ। ଏହା ପରେ ଅପରାହ୍ଣ ୩ଟାରେ ଏଠାରେ ଏହି ପୁଲ୍‌-ଏ’ର ଅନ୍ୟ ଏକ ମ୍ୟାଚ୍‌ରେ ମୁହାଁମୁହିଁ ହେବେ ବିଶ୍ବର ଏକ ନମ୍ବର ଅଷ୍ଟ୍ରେଲିଆ ଓ ଫ୍ରାନ୍ସ।

ଅପରାହ୍ଣ ୫ଟାରେ ରାଉରକେଲାର ନବ ନିର୍ମିତ ବିର୍ସା ମୁଣ୍ଡା ‌ଷ୍ଟାଡିୟମ ପ୍ରଥମ ବିଶ୍ବକପ୍‌ ମ୍ୟାଚ୍‌ ଆୟୋଜନର ଗୌରବ ପାଇବ। ଏହି ମ୍ୟାଚ୍‌ରେ ମୁହାଁମୁହିଁ ହେବେ ପୁଲ୍‌-ଡି’ରେ ଥିବା ଇଂଲଣ୍ଡ ଓ ୱେଲ୍ସ। ଏହାପରେ ଏହି ପୁଲ୍‌ରେ ଥିବା ଘରୋଇ ଦଳ ଭାରତ ସନ୍ଧ୍ୟା ୭ଟାରେ ସ୍ପେନ୍‌ ସହ ଲଢ଼ିବ। ଶନିବାର ପୁଲ୍‌ ସି’ ଓ ବି’ର ୮ ଦଳ ୪ ମ୍ୟାଚ୍‌ ଖେଳିବେ। ରାଉରକେଲାରେ ଅପରାହ୍ଣ ୧ଟା ଓ ୩ଟାରେ ଯଥାକ୍ରମେ ‌ନ୍ୟୁଜିଲାଣ୍ଡ-ଚିଲି ଏବଂ ନେଦରଲାଣ୍ଡ୍ସ-ମାଲେସିଆ ମୁହାଁମୁହିଁ ହେବେ। ଭୁ‌ବନେଶ୍ବରରେ ଅପରାହ୍ଣ ୫ଟା ଓ ସନ୍ଧ୍ୟା ୭ଟାରେ ଯଥାକ୍ରମେ ଲ‌ଢ଼ିବେ ବିଜେତା ବେଲ୍‌ଜିୟମ ଓ କୋରିଆ ଏବଂ ଜର୍ମାନି ଓ ଜାପାନ୍‌। ପୁଲ୍ ପର୍ଯ୍ୟାୟ ଶେ‌ଷ ହେବା ପରେ ୨୨ ତାରିଖରୁ ନକ୍‌ଆଉଟ୍‌ ପର୍ଯ୍ୟାୟ ଖେଳାଯିବ। ମେଗା ଫାଇନାଲ୍‌ ୨୯ ତାରିଖରେ ଆୟୋଜିତ ହେବ।