ଭୁବନେଶ୍ୱର: ବାହାର ଫେରନ୍ତାଙ୍କୁ ୨୮ ଦିନ ଯାଏଁ ସଙ୍ଗରୋଧରେ ରହିବାକୁ ସରକାର ବାଧ୍ୟତାମୂଳକ କରିଛନ୍ତି । ପ୍ରବାସୀମାନେ ସରକାରୀ ସଂଗରୋଧ କେନ୍ଦ୍ରରେ ୨୧ ଦିନ ରହିବା ପରେ ୭ ଦିନ ନିଜ ଘରେ ସଂଗରୋଧରେ ରହିବେ । ତେବେ ଏହି ୭ ଦିନ ମଧ୍ୟରେ ସରକାରୀ କ୍ୱାରେଣ୍ଟାଇନରୁ ଯାଇଥିବା ବ୍ୟକ୍ତିମାନଙ୍କୁ ସତର୍କତା ପାଳନ କରିବାକୁ ପଡ଼ିବ । ଏହି ସତର୍କତା ସଂପର୍କରେ ରାଜ୍ୟ କୋଭିଡ-୧୯ ମୁଖ୍ୟ ସୁବ୍ରତ ବାଗ୍ଚୀ ଆଜି ସାମ୍ବାଦିକ ସମ୍ମିଳନୀରେ ପରାମର୍ଶ ଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗୀତଗୋବିନ୍ଦ ସଦନରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ସେ କହିଛନ୍ତି, ସରକାରୀ କ୍ୱାରେଣ୍ଟାଇନରୁ ଛୁଟି ମିଳିବା ପରେ ସଂପୃକ୍ତ ବ୍ୟକ୍ତିମାନେ ଘରେ ରହିଲେ ମଧ୍ୟ ଅଲଗା ରହିବାକୁ ପଡ଼ିବ। ସେମାନେ ଗାଁ ଦାଣ୍ଡରେ ବୁଲି ପାରିବେ ନାହିଁ । ସେହିଭଳି ଅସୁସ୍ଥ ବ୍ୟକ୍ତିଙ୍କ ପାଖକୁ ଯିବାକୁ ଅନୁମତି ମିଳିବ ନାହିଁ । ସାମାଜିକ କାର୍ଯ୍ୟ ଯଥା ମନ୍ଦିର, ବିବାହ କାର୍ଯ୍ୟକ୍ରମ, ଅନ୍ୟ ଭୋଜିଭାତ ସ୍ଥଳକୁ ଯାଇପାରିବେ ନାହିଁ । ସରକାରୀ କ୍ୱାରେଣ୍ଟାଇନରୁ ଆସିଥିବା ବ୍ୟକ୍ତି ଘରେ ଥାଇ ମଧ୍ୟ ୭ ଦିନ ଯାଏଁ ମାସ୍କ ପିନ୍ଧିବେ । ଯଦି ଏହାରି ଭିତରେ ଅସୁସ୍ଥ ଅନୁଭବ କରନ୍ତି, ତାହେଲେ ୧୦୪କୁ ଫୋନ କରିବେ । ସଂପୃକ୍ତ ବ୍ୟକ୍ତିଙ୍କ ପାଇଁ ରାଜ୍ୟ ସରକାର ସବୁ ବ୍ୟବସ୍ଥା କରିବେ ।
ସୂଚନାଯୋଗ୍ୟ, କରୋନା ରୋଗର ଲକ୍ଷଣ ୧୪ ଦିନ ମଧ୍ୟରେ ଜଣାପଡୁ ନାହିଁ । ଏହି ମାରାତ୍ମକ ରୋଗ ୨୧ ଦିନ ମଧ୍ୟରେ ବି ଚିହ୍ନଟ ହୋଇପାରୁ ନ ଥିବାରୁ ରାଜ୍ୟ ସରକାର ସଂଗରୋଧ ଅବଧି ୨୮ ଦିନ କରି ଦେଇଛନ୍ତି । କିନ୍ତୁ ଜଣେ ବ୍ୟକ୍ତିଙ୍କୁ ଏଥିରୁ ୨୧ ଦିନ ସରକାରୀ ସଂଗରୋଧ କେନ୍ଦ୍ରରେ ରହିବାକୁ ପଡ଼ିବ । ବାକି ୭ ଦିନ ଘରେ ସଂଗରୋଧରେ ରହିବାକୁ ପଡ଼ିବ । ଗର୍ଭବତୀ ମହିଳା, ଶିଶୁ ଓ ଦିବ୍ୟାଙ୍ଗ ପାଇଁ ସ୍ଥାନୀ ୟ ସରପଞ୍ଚ ବ୍ୟବସ୍ଥା କରିବେ ।