ଭରସା ଜିଣୁଛି ଏମ୍‌ସ ଭୁବନେଶ୍ବର: ପ୍ରତିବର୍ଷ ବଢ଼ୁଛନ୍ତି ୨ଲକ୍ଷ ‌ରୋଗୀ

ଖଣ୍ଡଗିରି: ଆସନ୍ତାକାଲି ଭୁବନେଶ୍ବର ଏମ୍‌ସ  ୧୩ତମ ପ୍ରତିଷ୍ଠା ଦିବସ ପାଳିବାକୁ ଯାଉଛି। ଏହି ୧୩ ବର୍ଷର ଯାତ୍ରା ମଧ୍ୟରେ ଏମ୍‌ସ ଭୁବନେଶ୍ବର ଭାରତର ଚିକିତ୍ସା ସେବା କ୍ଷେତ୍ରରେ ନିଜର ପରାକାଷ୍ଠା ପ୍ରଦର୍ଶନ କରିପାରିଛି। ୧୪ ଅଗଷ୍ଟ ୨୦୧୨ ମସିହାରେ ୭୫୦ ବର୍ଗଫୁଟର ଏକ ଟିଣଛପର ସିମେଣ୍ଟ ଗୋଦାମରେ ଆରମ୍ଭ ହୋଇଥିବା ଏହି ମେଡିକାଲ କଲେଜ ବର୍ତ୍ତମାନ ନିଜର ପରିସୀମା ୧୨୬ ଏକରକୁ ବିସ୍ତାର କରିପାରିଛି। ୧୩ ବର୍ଷ ତଳେ ଜଙ୍ଗଲ ଥିବା ଏହି ସ୍ଥାନ ବର୍ତ୍ତମାନ ୧୩୫୨ ଶଯ୍ୟା ବିଶିଷ୍ଟ ଦେଶର ଶ୍ରେଷ୍ଠ ମେଡିକାଲ୍‌ କଲେଜ ଓ ହସ୍‌ପିଟାଲ ଭାବେ ନିଜକୁ ପ୍ରତିଷ୍ଠିତ କରିଛି। ଏପରିକି କେବଳ ଓଡ଼ିଶା ନୁହେଁ ପଡ଼ୋଶୀ ରାଜ୍ୟବାସୀଙ୍କର ଆସ୍ଥାଭାଜନ ହୋଇଛି ଏମ୍‌ସ।

ପ୍ରତିବର୍ଷ ଏମ୍‌ସରେ ରୋଗୀ ସଂଖ୍ୟା  ୨ଲକ୍ଷ ଲେଖାଏଁ ବଢ଼ିବଢ଼ି ଚାଲିଛି। ପ୍ରତିଦିନ ୩ହଜାରରୁ ଅଧିକ ରୋଗୀ ଏମ୍‌ସ ଓପିଡିରେ ଚିକିତ୍ସିତ ହେଉଛନ୍ତି। ୨୦୨୧ ମସିହାରେ ଓପିଡିରେ ୮ଲକ୍ଷ ରୋଗୀ ଚିକିତ୍ସିତ ହୋଇଥିଲା ବେଳେ ୨୦୨୨ରେ ୧୦ଲକ୍ଷ, ୨୦୨୩ରେ ୧୨ଲକ୍ଷ, ୨୦୨୪ରେ ୧୨ ଲକ୍ଷ ଓ ୨୦୨୫ରେ ବର୍ତ୍ତମାନ ସୁଦ୍ଧା ୭ଲକ୍ଷରୁ ଅଧିକ ରୋଗୀ ଓପିଡି ଚିକିତ୍ସା ସୁବିଧା ପାଇଛନ୍ତି। ସେହିପରି ବାର୍ଷିକ ୨୬ହଜାରରୁ ଅଧିକ ଅସ୍ତ୍ରୋପଚାର କରିବାରେ ଏମ୍ସ ଭୁବନେଶ୍ବର ସକ୍ଷମ ହୋଇଛି।

ସେହିପରି ପ୍ରଥମ ବର୍ଷ ମାତ୍ର ୭ଜଣ ଅଧ୍ୟାପକ ଓ ୫୦ଜଣ ଛାତ୍ରଛାତ୍ରୀଙ୍କୁ ନେଇ ପ୍ରତିଷ୍ଠାନ ଆରମ୍ଭ ହୋଇଥିଲା। ଏମ୍‌ସରେ ବର୍ତ୍ତମାନ ୨୩୪ଜଣ ଅଧ୍ୟାପକ ରହିଥିଲା ବେ‌ଳେ ବିଭିନ୍ନ ବିଭାଗକୁ ମିଶାଇ ଛାତ୍ରଛାତ୍ରୀଙ୍କ ସିଟ୍‌ ସଂଖ୍ୟା ୧୪୭୮କୁ ବୃଦ୍ଧି ପାଇଛି। ଏଥିରେ ଏମ୍‌ବିବିଏସ୍‌, ବିଏସ୍‌ସି(ସମ୍ମାନ) ନର୍ସିଂ, ଏମ୍‌ଏସ୍‌ସି ନର୍ସିଂ ଓ ୭ଟି ପାରାମେଡିକାଲ ସାଇନ୍ସ ରହିଛି। ସେହିପରି ମୋଟ୍‌ ୪୫ ବିଭାଗରେ ରୋଗୀଙ୍କୁ ସ୍ବାସ୍ଥ୍ୟସେବା ପ୍ରଦାନ କରାଯାଉଛି। ୨୫ଟି ମୋଡ୍ୟୁଲାର୍‌ ଅପରେସନ୍‌ ଥିଏଟର୍‌, ବର୍ଣ୍ଣ ୟୁନିଟ୍‌, ଲେଭଲ୍‌-୧ ଟ୍ରମା ସେଣ୍ଟର, ୫୦୬ ବେଡ୍‌ ବିଶିଷ୍ଟ ଧର୍ମଶାଳା ସହିତ ଛାତ୍ରାବାସ ରହିଛି।  ସ୍କିନ୍‌ ବ୍ୟାଙ୍କ, ଲିଭର୍‌ ଟ୍ରାନ୍ସପ୍ଲାଣ୍ଟ, ସେଣ୍ଟର ଅଫ ଏକ୍ସଲେନ୍ସ, ଆଡ୍‌ଭାନ୍ସ ସେଣ୍ଟର ଆଦିର ନିର୍ମାଣ ଖୁବ୍‌ଶୀଘ୍ର ହେବ ବୋଲି ଏମ୍‌ସ ଭୁବନେଶ୍ବରର କାର୍ଯ୍ୟନିର୍ବାହୀ ନିର୍ଦ୍ଦେଶକ ଡା. ଆଶୁତୋଷ ବିଶ୍ବାସ ମତ ଦେଇଛନ୍ତି।