କାଳିଆପାଣି : କୁନିଝିଅର ବୁକୁଫଟା କାନ୍ଦ। ‘ବାପା ବାପା’ର ବିକଳ ଡାକ। ରାସ୍ତା ଉପରେ ଆହତ ହୋଇ ସହାୟତା ଅପେକ୍ଷାରେ ପଡ଼ିଥିଲେ ବାପା। କୁନିଝିଅର କାନ୍ଦ ଛାତି ଥରାଇ ଦେଉଥିଲା। ସଂଜ୍ଞାହୀନ ବାପାଙ୍କୁ ଉଠାଇବାକୁ ଚେଷ୍ଟା କରି ବି ପାରୁ ନଥିଲା କୁନି ହାତ ଦୁଇଟି। ରାସ୍ତାରେ ଯାଉଥିବା ସମସ୍ତେ ଦେଖୁଥିଲେ ଏ ଦୃଶ୍ୟ। ପୁଣି ନିଜ ବାଟରେ ଚାଲିଯାଉଥିଲେ। ସେମାନଙ୍କୁ ଉଠାଇଥିଲେ ଯେମିତି କରୋନା ସଂକ୍ରମଣ ହୋଇଯିବ! ଏମିତି ହୃଦୟ ବିଦାରକ ଦୃଶ୍ୟ ଆଜି ଯାଜପୁର ଜିଲ୍ଲା ଅନ୍ତର୍ଗତ କାଳିଆପାଣି ଖଣି ଅଞ୍ଚଳ ଟମକା-ମଙ୍ଗଳପୁରର କୁସୁମୁଣ୍ଡିଆ ବାଘପଡ଼ିଆ ରାସ୍ତାରେ ଦେଖିବାକୁ ମିଳିଛି।
Sambad is now on WhatsApp
Join and get latest news updates delivered to you via WhatsApp
ଆହତ ଦ୍ବୟ ହେଉଛନ୍ତି କାଳିଆପାଣି କ୍ରୋମାଇଟ୍ ଖଣି କର୍ମଚାରୀ ସୂର୍ଯ୍ୟମଣି ହାଁସଦା(୪୦) ଓ ତାଙ୍କ ୬ ବର୍ଷର ଝିଅ ଜବା। ଖବର ଅନୁସାରେ, ଆଜି ପୁଅ ଲକିର ପ୍ରଥମ ଜନ୍ମଦିନ ଥିଲା। ଏଣୁ ବାପା ସୂର୍ଯ୍ୟମଣି ହାଁସଦା ଝିଅ ଜବାକୁ ଧରି ଓଏମ୍ସି କାଳିଆପାଣି କଲୋନିସ୍ଥିତ କ୍ବାର୍ଟର୍ସରୁ ୯ କିଲୋମିଟର ଦୂର ମହୁଲଖାଲ ଗାଁର ଶ୍ବଶୁର ଘରକୁ ସ୍କୁଟିରେ ବାହାରିଥିଲେ। ସାଙ୍ଗରେ ନୂଆ ପୋଷାକପତ୍ର, କେକ୍, ବେଲୁନ ଓ ଅନ୍ୟାନ୍ୟ ଉତ୍ସବ ସାମଗ୍ରୀ ନେଉଥିଲେ। କିନ୍ତୁ ବାଟରେ କୌଣସି କାରଣରୁ ସ୍କୁଟି ଦୁର୍ଘଟଣାଗ୍ରସ୍ତ ହୋଇଥିଲା। ପରିବାରର ଖୁସି ହଠାତ୍ ମିଳାଇ ଯାଇଥିଲା। ପରେ ବାପଝିଅଙ୍କୁ ଉଦ୍ଧାର କରାଯାଇ ଡାକ୍ତରଖାନାକୁ ପଠାଯାଇଛି।