ବନ୍ଦଘର ଭିତରେ ୩ ଜଣଙ୍କର ମୃତଦେହ; ହତ୍ୟା ସନ୍ଦେହ, କାରଣ ଅସ୍ପଷ୍ଟ

ଭେଡେନ୍‌/ବରଗଡ଼: ବନ୍ଦଘର ଭିତରୁ ମଙ୍ଗଳବାର ସ୍ବାମୀ ଓ ତାଙ୍କର ଦୁଇ ସ୍ତ୍ରୀଙ୍କ ମୃତଦେହ ରକ୍ତାକ୍ତ ଅବସ୍ଥାରେ ଠାବ ହୋଇଛି। ବରଗଡ଼ ଜିଲ୍ଲା ଭେଡେନ୍‌ ଥାନା ଅଧୀନ ଆଖିପୁଟା ଗାଁରେ ଘଟିଥିବା ଅଘଟଣ ନେଇ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି। ମୃତକମାନେ ହେଲେ ଟଙ୍କଧର ସାହୁ ଓ ତାଙ୍କର ୨ ସ୍ତ୍ରୀ ଦ୍ରୌପଦୀ ଓ ମାଧବୀ।

ସୂଚନା ଅନୁସାରେ ଭେଡେନ୍‌ ଥାନା ଅନ୍ତର୍ଗତ ଆଖିପୁଟା ଗାଁର ଟଙ୍କଧର ସାହୁଙ୍କ ଘର ବହୁ ସମୟ ବନ୍ଦ ଥିବା ନେଇ ପଡୋଶୀ ଲୋକଙ୍କର ସନ୍ଦେହ ହୋଇଥିଲା। ସ୍ଥାନୀୟ ଲୋକଙ୍କ ଠାରୁ ସୂଚନା ମିଳିବା ପରେ ପୁଲିସ ଘଟଣାସ୍ଥଳରେ ପହଞ୍ଚିଛି। ପୁଲିସ ଟଙ୍କଧର ଓ ତାଙ୍କର ୨ ସ୍ତ୍ରୀ ଦ୍ରୌପଦୀ ଓ ମାଧବୀଙ୍କ ମୃତଦେହ ଉଦ୍ଧାର କରିଛି। ତିନି ଜଣଙ୍କର ମୁଣ୍ଡରେ ଗଭୀର କ୍ଷତ ଚିହ୍ନ ରହିଛି। ପାରିପାଶ୍ବିକ ସ୍ଥିତିରୁ ଯାହା ଜଣାପଡ଼ୁଛି, ଏହା ହତ୍ୟାକାଣ୍ଡ। ତେବେ ପୁଲିସ ଘଟଣାର ଅଧିକ ତଦନ୍ତ କରୁଛି। ଅଧିକ ରିପୋର୍ଟକୁ ଅପେକ୍ଷା କରାଯାଇଛି।