ଦାଦନ ହେଲା କାଳ: ଦୁର୍ଘଟଣାରେ ସ୍ବାମୀ ମୃତ, ସମସ୍ୟାରେ ପରିବାର
ନୂଆପଡା: କରୋନା କାଳରେ ପରିବାର ମୁହଁରେ ଦୁଇ ମୁଠା ଦାନା ଯୋଗାଡ କରିବା ପାଇଁ ଦାଦନ ଯାଇ ଥିଲେ । ପରିବାର ପାଇଁ ଯେଉଁ ଆଶା ନେଇ ଦାଦନ ଖଟି ଯାଇଥିଲେ, ତାହା ମଉଳି ଗଲା। ଟ୍ରାକ୍ଟର ଦୁର୍ଘଟଣାରେ ସ୍ବାମୀଙ୍କ ମୃତ୍ୟୁ ହେବା ପରେ ସ୍ତ୍ରୀ ଖାଲି ହାତରେ ଗାଁକୁ ଫେରିଛନ୍ତି। ରୋଜଗାରକ୍ଷମ ସ୍ବାମୀଙ୍କ ମୃତ୍ୟୁ ହେବା ପରେ ସମସ୍ୟାରେ ପଡିଛନ୍ତି ୫ ପରିବାର ସଦସ୍ୟ ।
Sambad is now on WhatsApp
Join and get latest news updates delivered to you via WhatsApp
କରୋନା କାଳରେ କାମ ଧନ୍ଦା ଅଭାବ ହେବାରୁ ନୂଆପଡା ଜିଲ୍ଲା କୋମନା ବ୍ଲକ ଜଟଗଡ ପଞ୍ଚାୟତ ବାବେଘାଟି ଗାଁର ଦିଗବଲ୍ ଅଦା (୩୮) ନିଜ ସ୍ତ୍ରୀ ପ୍ରିୟତମାଙ୍କ ସହ ଗତ ଡିସେମ୍ବର ମାସରେ ଦାଦନ ଖଟି ଯାଇଥିଲେ । ତେଲେଙ୍ଗାନାର ନାଲଗୋଣ୍ତାର ଏକ ଇଟାଭାଟିରେ ପ୍ରିୟତମା ଇଟା ତିଆରି କାମ କରୁ ଥିଲେ । ଦିଗବଲ ଲରି ଗାଡି ଚଳାଉ ଥିଲେ । ଦିନେ ଦିଗବଲ୍ ଲରି ଗାଡି ବଦଳରେ ଟ୍ରାକ୍ଟର ଚଳାଇଲେ । ସେଦିନ ଟ୍ରାକ୍ଟର ଦୁର୍ଘଟଣାଗ୍ରସ୍ତ ହେବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା । ଅର୍ଥାଭାବରୁ ଶବ ଗାଁକୁ ଆସି ପାରି ନ ଥିଲା । ସେଠାରେ ହିଁ ଶବ ସତ୍କାର କରା ଯାଇଥିଲା । ଖାଲି ହାତରେ ପ୍ରିୟତମା ଘରକୁ ଫେରିଥିଲେ ।
ପୁଣି ଗାଁକୁ ଆସିଲା ପରେ ଆରମ୍ଭ ହୋଇ ଯାଇଛି ସମସ୍ୟା । କାମ ଧନ୍ଦା ଅଭାବ ଯୋଗୁଁ ପରିବାର ଚଳାଇବା କଷ୍ଟକର ହୋଇ ପଡିଛି । ଘରେ ମାଟ୍ରିକ ଫେଲ ପୁଅ ଝିଅ ନେପୁର ଅଦା, ଚନ୍ଦ୍ରଶେଖର ଅଦା, ଅଷ୍ଟମ ଶ୍ରେଣୀରେ ପଢୁଥିବା ପରମେଶ୍ବର ଏବଂ ଦ୍ବିତୀୟ ଶ୍ରେଣୀରେ ପଢୁଥିବା ବେଳମତୀ ଅଛନ୍ତି । ସମସ୍ୟା ସଂପର୍କରେ କୋମନା ବିଡିଓ ସଦାଶିବ ଭତ୍ରାଙ୍କୁ ଜଣାଇବା ପରେ ଆବଶ୍ୟକ ସମସ୍ତ ସରକାରୀ ସୁବିଧା ସହ ସହାୟତା ଯୋଗାଇ ଦେବାକୁ ପ୍ରତିଶ୍ରୁତି ଦେଇଛନ୍ତି ।