୭ଦିନ ଭିତରେ ବଳଙ୍ଗା ପୀଡ଼ିତାଙ୍କୁ ନ୍ୟାୟ ନ ମିଳିଲେ ଡିଜି କାର୍ଯ୍ୟାଳୟ ଘେରାଉ: ଭକ୍ତ

ଭୁବନେଶ୍ବର: ବଳଙ୍ଗା ପୋଡ଼ି ଘଟଣାକୁ ଦୁଇ ସପ୍ତାହ ବିତିଛି। ଏତେଦିନ ଭିତରେ ଆମ ଶାସନ ବ୍ୟବସ୍ଥା ଦୋଷୀଙ୍କୁ ଗିରଫ କରିପାରିଲା ନାହିଁ। ଏଥିରୁ ଗୃହ ବିଭାଗ କିଭଳି ପରିଚାଳିତ ହେଉଛି ସ୍ପଷ୍ଟ ଜଣାପଡ଼ୁଛି। ମୁଖ୍ୟମନ୍ତ୍ରୀ କେବଳ ଶୋକବାର୍ତ୍ତା ଦେଇଦେଲେ ହେବ ନାହିଁ, କେତେଦିନ ଭିତରେ ଅପରାଧୀଙ୍କୁ ଗିରଫ କରାଯିବ ଓ ପୀଡ଼ିତାଙ୍କୁ ନ୍ୟାୟ ମିଳିବ ସେ ସଂପର୍କରେ ମତ ରଖନ୍ତୁ। ଆସନ୍ତା ୭ଦିନ ଭିତରେ ବଳଙ୍ଗା ପୀଡ଼ିତାଙ୍କୁ ନ୍ୟାୟ ନ ମିଳିଲେ ଡିଜିପି କାର୍ଯ୍ୟାଳୟ ଘେରାଉ ‌କରାଯିବ ବୋଲି କହିଛନ୍ତି ପିସିସି ସଭାପତି ଭକ୍ତଚରଣ ଦାସ।

ଶ୍ରୀ ଦାସ ଗଣମାଧ୍ୟମକୁ କହିଛନ୍ତି ଯେ ପୁଲିସକୁ ରାଜ୍ୟ ସରକାର ଦୁର୍ବଳ କରୁଛନ୍ତି। ଏତେ ବଡ଼ ଘଟଣାକୁ ଘଣ୍ଟ ଘୋଡ଼ାଇ ରାଜ୍ୟ ସରକାର ଖସି ପାରିବେ ନାହିଁ। ଚୋରକୁ ଧରିବା ବଦଳରେ ସରକାର ଚୋର ଭଳି ବ୍ୟବହାର କରୁଛନ୍ତି। ଏହି ଘଟଣାରେ ଷଡ଼୍‌ଯନ୍ତ୍ର ଥିବା ଭଳି ଲାଗୁଛି। ଅନ୍ୟ ମାମଲାରେ ପୁଲିସ ତତ୍ପରତା ଦେଖାଉଥିବା ବେଳେ ଏହି ଘଟଣାରେ କାହିଁକି ତତ୍ପରତା ଦେଖାଉନାହିଁ। ଏ ପରିସ୍ଥିତିରେ ଜନସାଧାରଣଙ୍କ ସନ୍ଦେହ ସିଧାସଳଖ ସରକାରଙ୍କ ଉପରକୁ ଯିବ। ରାଜ୍ୟରେ ନାରୀ ଅତ୍ୟାଚାରରେ ସୀମା ନାହିଁ। ବିଶ୍ବ ଦରବାରରେ ଓଡ଼ିଶା ଲଜ୍ଜିତ ହେଲାଣି। ହେଲେ ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀ ଲଜ୍ଜିତ ଅନୁଭବ କରୁନାହାନ୍ତି। ଠାକୁରଙ୍କ ନାଁରେ ରାଜନୀତି କରି ଶାସନକୁ ଆସିଛନ୍ତି, ଠାକୁର କେବେ କ୍ଷମା ଦେବେନି। 

ସେ ଆହୁରି ମଧ୍ୟ କହିଛନ୍ତି ଯେ ପୀଡ଼ିତାଙ୍କ ବାରମ୍ବାର ବୟାନ ନିଆଗଲା ବୋଲି କୁହାଗଲା। ପ୍ରକୃତରେ ବୟାନ ନିଆଗଲା କି ନାହିଁ ତାହା କିଏ ଜାଣିଛି। ଦୁଇଦିନ ତଳେ ପୀଡ଼ିତା ବୟାନ ଦେଇଥିବା କୁହାଯାଇଥିଲା। ହେଲେ ଆଜି ତାଙ୍କର କିଭଳି ମୃତ୍ୟୁ ହେଲା ? କ୍ଷମତାରେ ଥାଇ ନ୍ୟାୟ ଦେବା ବଦଳରେ ସମବେଦନା ଜଣାଇବାର କିଛି ମୂଲ୍ୟ ନାହିଁ। ତୁରନ୍ତ ଦୋଷୀଙ୍କୁ ଗିରଫ କରି ସରକାର ନିଜ ଉପରେ ଲାଗିଥିବା ଦାଗକୁ ହଟାନ୍ତୁ। ସତ କଥାକୁ ଘଣ୍ଟ ଘୋଡ଼ାଇବା ଲାଗି ପୀଡ଼ିତାଙ୍କୁ ଦିଲ୍ଲୀ ନିଆଯାଇଥିଲା କି ବୋଲି ଶ୍ରୀ ଦାସ ପ୍ରଶ୍ନ କରିଛନ୍ତି।