ଜନ୍ମ ହେଲେ ମିଳିବ ୧୨ ହଜାର: ସରକାରଙ୍କ ଘୋଷଣା ସାଜିବ କି ସଞ୍ଜିବନୀ?

ଭୁବନେଶ୍ବର: ରାଜ୍ୟର ୧୧ଟି ଜିଲ୍ଲାରେ ପୁଅଙ୍କ ତୁଳନାରେ ଝିଅଙ୍କ ସଂଖ୍ୟା ଯଥେଷ୍ଟ କମ୍ ରହିଛି। ବେଆଇନ ଲିଙ୍ଗ ନିରୂପଣ ଓ ଭ୍ରୂଣ ହତ୍ୟା ଯୋଗୁଁ ଏଭଳି ପରିସ୍ଥିତି ଉପୁଜୁଛି। ରାଜ୍ୟ ସରକାରଙ୍କ ବ୍ୟାପକ ସଚେତନତା କାର୍ଯ୍ୟକ୍ରମରେ ଏଥିରେ କୌଣସି ପ୍ରକାର ସୁଧାର ଆଣିପାରୁନାହିଁ। ଦୁଇଦିନ ତଳେ ରାଜ୍ୟ ସରକାର ଝିଅ ଜନ୍ମ ହେଲେ ୧୨ହଜାର ଟଙ୍କା ଗର୍ଭବତୀ ମହିଳାଙ୍କୁ ମିଳିବ ବୋଲି ଘୋଷଣା କରିଛନ୍ତି। ଯଦିଓ ଏଥିରେ ସଙ୍ଗେ ସଙ୍ଗେ‌ କୌଣସି ପରିବର୍ତ୍ତନ ସମ୍ଭାବନା କମ୍। ମାତ୍ର ଏହାର ଏକ ସୁଦୂରପ୍ରସାରୀ ପ୍ରଭାବ ପଡ଼ିପାରେ ବୋଲି ଆଶା କରାଯାଉଛି। 

ସିଭିଲ ରେଜିଷ୍ଟ୍ରସନ୍ ସିଷ୍ଟମ ୨୦୨୩ ଅନୁସାରେ, ରାଜ୍ୟର ପ୍ରତି ହଜାର ପୁଅଙ୍କ ତୁଳନାରେ ୯୧୩ଜଣ ଝିଅ ରହିଛନ୍ତି। ହେଲେ ଉପକୂଳ ଓଡ଼ିଶାର ଅଧିକାଂଶ ଜିଲ୍ଲାରେ ଏହି ସ୍ଥିତି ବେଶ ଖରାପ ରହିଛି। ବିଶେଷକରି ନୟାଗଡ଼ ଜିଲ୍ଲାରେ ପ୍ରତି ହଜାର ପୁଅଙ୍କ ତୁଳନାରେ ମାତ୍ର ୭୫୮ଜଣ ଝିଅ ରହିଛନ୍ତି। ନବରଙ୍ଗପୁର, କଳାହାଣ୍ଡି, ମାଲକାନଗିରି, ସମ୍ବଲପୁର, ବରଗଡ଼, ସୁନ୍ଦରଗଡ଼, ଦେବଗଡ଼ ଜିଲ୍ଲାରେ ଝିଅଙ୍କ ସଂଖ୍ୟା ଓଡ଼ିଶାର ହାରଠାରୁ ଅଧିକ। ତେବେ ବଲାଙ୍ଗୀର, କେନ୍ଦୁଝର, ବୌଦ୍ଧ, ମୟୂରଭଞ୍ଜ, କୋରାପୁଟ, ରାୟଗଡ଼ା, ଗଜପତି, ନୂଆପଡ଼ା ଓ କନ୍ଧମାଳକୁ ମିଶାଇ ୯ଟି ଜିଲ୍ଲାରେ ଲିଙ୍ଗ ଆନୁପାତିକ ହାର ବେଶ୍‌ ଭଲ ଦେଖିବାକୁ ମିଳିଛି। 
୨୦୨୧ରେ ପ୍ରକାଶିତ ହୋଇଥିବା ଜାତୀୟ ପରିବାର ସ୍ବାସ୍ଥ୍ୟ ସର୍ବେକ୍ଷଣ(ଏନ୍‌ଏଫ୍‌ଏଚ୍‌ଏସ୍‌)-୫ ଅନୁସାରେ, ଦେଶରେ କେରଳରେ ପୁଅଙ୍କ ତୁଳନାରେ ଝିଅଙ୍କ ସଂଖ୍ୟା ଅଧିକ ରହିଛି। ଏଠାରେ ପ୍ରତି ହଜାର ପୁଅଙ୍କ ତୁଳନାରେ ୧୦୪୭ଜଣ ଝିଅ ରହିଛନ୍ତି। ଓଡ଼ିଶାରେ ଏହି ସଂଖ୍ୟା ୮୯୪ ରହିଥିବା ଦର୍ଶାଯାଇଛି।

୧୧ ଜିଲ୍ଲାରେ ଝିଅଙ୍କ ସ୍ଥିତି ଦୟନୀୟ, ନୟାଗଡ଼ରେ ସର୍ବାଧିକ
ମାନସିକତାରେ ପରିବର୍ତ୍ତନ ନ ଆସିଲେ ସୁଧାର କଷ୍ଟକର

ଯାହାକି ଏନ୍‌ଏଫ୍‌ଏଚ୍‌ଏସ୍‌-୪ରେ ୯୩୨ ରହିଥିଲା। ଭାରତର ଲିଙ୍ଗ ଅନୁପାତ ହାର ୯୨୯ ରହିଛି। ରାଜ୍ୟ ପରିବାର କଲ୍ୟାଣ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି, ଲୋକଙ୍କ ମାନସିକତାରେ ପରିବର୍ତ୍ତନ ନ ଆସିବା ପର୍ଯ୍ୟନ୍ତ ଏଥିରେ ପରିବର୍ତ୍ତନ ହେବା କଷ୍ଟକର। ରାଜ୍ୟ ସରକାର ସମସ୍ତ ପ୍ରକାର ସଚେତନତା କାର୍ଯ୍ୟକ୍ରମ ଜାରି ରଖିଛନ୍ତି। ତଥାପି ଝିଅମାନଙ୍କୁ ଭେଦଭାବ ନଜରରେ ଦେଖାଯାଉଛି। ଏହାସହ କ୍ବାକ୍‌ମାନଙ୍କ ପ୍ରାଦୁର୍ଭାବ ମଧ୍ୟ ଲିଙ୍ଗ ନିରୂପଣରେ କିଛି କମ୍ ନୁହେଁ। ଧରପଗଡ଼ ସତ୍ତ୍ବେ ସେମାନେ ଲିଙ୍ଗ ନିରୂପଣ ଯନ୍ତ୍ରପାତି ଆଣି ଏହି କାର୍ଯ୍ୟରେ ଲାଗିଛନ୍ତି। ବେଆଇନ ଲିଙ୍ଗ ନିରୂପଣ କ୍ଲିନିକ୍‌କୁ ଚିହ୍ନଟ କରିବା ପାଇଁ ଅପରେସନ୍ ‘ଡିକୟ’ ମଧ୍ୟ ହୋଇପାରୁନାହିଁ। ଏହାସହ ଲିଙ୍ଗ ନିରୂପଣ ସଂପର୍କରେ ସୂଚନା ଦେଲେ ସରକାର ୨୫ହଜାର ଟଙ୍କା ଘୋଷଣା କରିଛନ୍ତି। ହେଲେ ଆଜି ପର୍ଯ୍ୟନ୍ତ ଜଣେ କିମ୍ବା ଦୁଇ ଜଣ ଏହି ସୂଚନା ଦେଇ ପୁରସ୍କାର ପାଇଛନ୍ତି। ଦୁଇଦିନ ତଳେ ରାଜ୍ୟ ସରକାରଙ୍କ ‘ମମତା’ ଯୋଜନା ସହିତ ପ୍ରଧାନମନ୍ତ୍ରୀ ‘ମାତୃ ବନ୍ଦନା’ ଯୋଜନା ମିଳିତ ଭାବେ କାର୍ଯ୍ୟକାରୀ ହେବ ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଘୋଷଣା କରିଛନ୍ତି। ପୁଅ ଜନ୍ମ ହେଲେ ୧୦ହଜାର ଓ ଝିଅ ଜନ୍ମ ହେଲେ ଅଧିକ ୨ହଜାର ଅର୍ଥାତ୍ ୧୨ହଜାର ଟଙ୍କା ମିଳିବ। ଉଭୟ ଯୋଜନାର ସମ୍ମିଳିତ କାର୍ଯ୍ୟକାରିତା ପାଇଁ ଆସନ୍ତା ଆର୍ଥିକ ବର୍ଷରେ ପ୍ରାୟ ୫୧୧ କୋଟି ଟଙ୍କା ଖର୍ଚ୍ଚ ହେବ। ଏହାଦ୍ୱାରା ପ୍ରାୟ ୪ ଲକ୍ଷ ୫୦ ହଜାର ଗର୍ଭବତୀ ଓ ପ୍ରସୂତି ମହିଳା ଉପକୃତ ହେବେ ବୋଲି ରାଜ୍ୟ ସରକାରଙ୍କ ପକ୍ଷରୁ ସୂଚନା ଦିଆଯାଇଛି।