ଭାରତର ପ୍ରଥମ ମହିଳା ବିଜନେସ୍ ମେଳା ଆରମ୍ଭ, ଏହା ହେବ ମହିଳାଙ୍କ ଶତାବ୍ଦୀ: ମୁଖ୍ୟମନ୍ତ୍ରୀ
ପାଞ୍ଚ ଦିନିଆ ମେଳା ୪ରୁ ୮ ପର୍ଯ୍ୟନ୍ତ ଚାଲିବ, ୧୦୦ରୁ ଅଧିକ ଷ୍ଟଲ୍ ରହିଛି, ଯୋଗ ଦେବେ ବଲିଉଡ୍ କଳାକାର
ଭୁବନେଶ୍ବର : ମହିଳାମାନେ ହେଉଛନ୍ତି ଶକ୍ତିର ପ୍ରତୀକ। ଏହି ଶତାବ୍ଦୀ ମହିଳାମାନଙ୍କ ଶତାବ୍ଦୀ ହେବ। ବୁଧବାର ଠାରୁ ଜନତା ମଇଦାନଠାରେ ଆରମ୍ଭ ହୋଇଥିବା ଭାରତର ପ୍ରଥମ ମହିଳା ବିଜନେସ୍ ମେଳାକୁ ଭର୍ଚୁଆଲ ମାଧ୍ୟମରେ ଉଦଘାଟନ କରି ଏହା କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ସେ କହିଛନ୍ତି, ଓଡ଼ିଶାରେ ମିସନ ଶକ୍ତି କାର୍ଯ୍ୟକ୍ରମ ହେଉଛି ମହିଳା ସଶକ୍ତୀକରଣର ହଲମାର୍କ ସଦୃଶ। ଏହା ଜରିଆରେ ଗ୍ରାମୀଣ ଓଡ଼ିଶାରେ ମହିଳାମାନଙ୍କ ମଧ୍ୟରେ ବୈପ୍ଳବିକ ପରିବର୍ତ୍ତନ ଆସିପାରିଛି। ଦେଶର ପ୍ରଥମ ମହିଳା ବିଜନେସ୍ ମେଳା ଆୟୋଜନ କରିଥିବାରୁ ସେ ଇଣ୍ଡିଆନ ଚାମ୍ବର ଅଫ୍ କମର୍ସ (ଆଇସିସି)ର ମହିଳା ଉଦ୍ୟୋଗୀ ପରିଷଦ (ଆଇଡବ୍ଲୁଇସି)କୁ ଅଭିନନ୍ଦନ ଜଣାଇଛନ୍ତି। ଏବେ ପରିଷଦରେ ୧୨୦ରୁ ଅଧିକ ମହିଳା ଉଦ୍ୟୋଗୀ ସଦସ୍ୟ ଅଛନ୍ତି। ଆଗାମୀ ଦିନରେ ସେମାନଙ୍କ ସଂଖ୍ୟା ୫୦୦ରୁ ଅଧିକ ହେଉ ବୋଲି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କାମନା କରିଛନ୍ତି। ମହିଳା ଉଦ୍ୟୋଗୀମାନଙ୍କୁ ସରକାର ସର୍ବଦା ସହାୟତା ପ୍ରଦାନ କରିବାକୁ ପ୍ରସ୍ତୁତ ରହିଛନ୍ତି ବୋଲି ସେ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଏହି ଅବସରରେ ଅତିଥି ଭାବେ ଯୋଗ ଦେଇ ଉଚ୍ଚ ଶିକ୍ଷା ଓ କୃଷି ମନ୍ତ୍ରୀ ଡ. ଅରୁଣ ସାହୁ କହିଛନ୍ତି ଯେ ମହିଳା ଉଦ୍ୟୋଗୀମାନେ ରାଜ୍ୟ ପାଇଁ ଗୌରବ ଆଣିଛନ୍ତି। ସେମାନେ ଯେଉଁ ଅଭିଯାନ ଆରମ୍ଭ କରିଛନ୍ତି ତାହା ହେଉଛି ଏକ ବିପ୍ଳବ। ସେ କହିଛନ୍ତି ଯେ ୫୦ ପ୍ରତିଶତ ଶ୍ରମ ଶକ୍ତି କୃଷି କ୍ଷେତ୍ରରେ ନିୟୋଜିତ ହୋଇଛନ୍ତି। ଗତ ୨୦ ବର୍ଷ ଭିତରେ ରାଜ୍ୟରେ ଅନେକ ପରିବର୍ତ୍ତନ ଘଟିଛି। ୨୦୨୦ରେ ଦୈନିକ ୨୦ ଲକ୍ଷ ଅଣ୍ଡା ଉତ୍ପାଦନ ହେଉଥିବା ବେଳେ ଏବେ ତାହା ୮୦ ଲକ୍ଷକୁ ବୃଦ୍ଧି ପାଇଛି। ମାଛ ଉତ୍ପାଦନ ଏହି ସମୟରେ ୨.୫୦ ଲକ୍ଷ ଟନ୍ରୁ ବୃଦ୍ଧି ପାଇ ୮ ଲକ୍ଷ ଟନ୍ ହୋଇଛି। ଚାଉଳରେ ଓଡ଼ିଶା ବଳକା ରାଜ୍ୟ ହୋଇପାରିଛି। ରାଜ୍ୟରୁ ୧୦୦୦ ଟନ୍ ଚାଉଳ ଉପସାଗରୀୟ ଦେଶଗୁଡ଼ିକୁ ରପ୍ତାନି କରାଯାଇଛି ବୋଲି ସେ କହିଛନ୍ତି। ରାଜ୍ୟର ମୋଟ ଘରୋଇ ଉତ୍ପାଦକୁ କୃଷି କ୍ଷେତ୍ରର ଅବଦାନ ୨୮% ରହିଛି ଯାହା ଜାତୀୟ ହାର (୧୯-୨୦%) ଠାରୁ ଅଧିକ। ଯଦି ଏହି ହାର ଆହୁରି ବଢ଼ିବ ତେବେ ଅଧିକରୁ ଅଧିକ ଶ୍ରମ ଶକ୍ତି କୃଷି ଓ ତତ୍ ସଂକ୍ରାନ୍ତୀୟ କ୍ଷେତ୍ରରେ ନିୟୋଜିତ ହୋଇପାରିବେ ବୋଲି ସେ କହିଛନ୍ତି।
ଆଇସିସିର ସଭାପତି ପ୍ରଦୀପ ସୁରେଖା କହିଛନ୍ତି ଯେ ଦେଶର ୪୫% ଷ୍ଟାର୍ଟଅପ୍ ସଂସ୍ଥା ମହିଳାମାନଙ୍କ ଦ୍ବାରା ସ୍ଥାପିତ ଓ ପରିଚାଳିତ ହେଉଛି। ନାଏକା ଭଳି ପ୍ରତିଷ୍ଠିତ ସଂସ୍ଥା ଜଣେ ମହିଳାଙ୍କ ନେତୃତ୍ବରେ ଚାଲିଛି। ମହିଳାମାନେ ବଡ଼ ନିଯୁକ୍ତି ସୃଷ୍ଟିକାରୀ ଭାବେ ଉଭା ହୋଇପାରିବେ ବୋଲି ସେ କହିଛନ୍ତି। ଆଇସିସି ଓଡ଼ିଶାର ଅଧ୍ୟକ୍ଷ ଜେ ବି ପାଣି କାର୍ଯ୍ୟକ୍ରମ ବିଷୟରେ ଆଲୋକପାତ କରିଥିବା ବେଳେ ସହ ଅଧ୍ୟକ୍ଷଏମ୍ କେ ଗୁପ୍ତା ସ୍ବାଗତ ଭାଷଣ ଦେଇଥିଲେ। ଆଇଡବ୍ଲୁଇସିର ସଂଯୋଜିକା ସୁକୀର୍ତି ପଟ୍ଟନାୟକ ମେଳା ସମ୍ପର୍କିତ ବିବରଣୀ ପ୍ରଦାନ କରିଥିଲେ ଓ ସହ ସଂଯୋଜିକା ତନୟା ପଟ୍ଟନାୟକ ଧନ୍ୟବାଦ ଅର୍ପଣ କରିଥିଲେ।
ଏହି ମହିଳା ଉଦ୍ୟୋଗୀ ମେଳାରେ ୧୦୦ରୁ ଅଧିକ ଷ୍ଟଲ୍ ସ୍ଥାପନ କରାଯାଇଛି। ଏହା ସହିତ ଏଥିରେ ୩୪ଟି ଖାଇବା ଷ୍ଟଲ୍, ପିଲାଙ୍କ ଖେଳିବା ଲାଗି ସ୍ବତନ୍ତ୍ର ବ୍ୟବସ୍ଥା ଓ ସେଲ୍ଫି ଜୋନ୍ ମଧ୍ୟ ରହିଛି। ଆଜି ଚାରିଟି ସ୍ବତନ୍ତ୍ର ଅଧିବେଶନ ମଧ୍ୟ ଅନୁଷ୍ଠିତ ହୋଇଛି। ପ୍ରଥମ ଅଧିବେଶନରେ ରାଜ୍ୟ ଏସ୍ସି, ଏସ୍ଟି ବିଭାଗ ସଚିବ ରଞ୍ଜନା ଚୋପ୍ରା ଓ ବେଦିକା ସ୍କଲାର୍ସ ପ୍ରୋଗ୍ରାମ ଫର ଓମେନ୍ର ପ୍ରତିଷ୍ଠାତା ଡିନ୍ ଅନୁରାଧା ଦାସ ମାଥୁର ଯୋଗ ଦେଇ ତନୟା ପଟ୍ଟନାୟକଙ୍କ ସହ ‘ବ୍ୟବସାୟରେ ମହିଳା: ନୂଆ ସୁଯୋଗ ଓ ଆହ୍ବାନ’ ବିଷୟ ଉପରେ ଆଲୋଚନା କରିଥିଲେ। ଦ୍ବିତୀୟ ଅଧିବେଶନରେ ଓଡ଼ିଶା ଦକ୍ଷତା ବିକାଶ କର୍ତ୍ତୃପକ୍ଷର ଅଧ୍ୟକ୍ଷ ସୁବ୍ରତ ବାଗ୍ଚୀ ମହିଳା ଉଦ୍ୟମିତାକୁ ସୁଦୃଢ଼ କରିବା ବିଷୟରେ ଆଲୋଚନା କରିଛନ୍ତି। ଏହା ପରେ ଏକ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ଯେଉଁଥିରେ ପଦ୍ମିନୀ ପାଣିଗ୍ରାହୀ ଓ ଗ୍ରୁପ୍ ଓଡ଼ିଶୀ ନୃତ୍ୟ ପରିବେଶ କରିଥିବା ବେଳେ ଜଣାଶୁଣା ଗାୟିକା ସୁସ୍ମିତା ଦାସ ସଙ୍ଗୀତ ପରିବେଶ କରିଥିଲେ। ଶେଷ ଅଧିବେଶନରେ ବଲିଉଡ୍ ଅଭିନେତ୍ରୀ ଲାରା ଦତ୍ତା ‘ସେ ଅମୀମିତ: ବ୍ରହ୍ମାଣ୍ଡକୁ ବିଜୟ କରିବା’ ବିଷୟ ଉପରେ ଆଲୋଚନା କରିଥିଲେ।
ଏହି ପାଞ୍ଚଦିନିଆ କାର୍ଯ୍ୟକ୍ରମରେ ଅନ୍ୟତମ ବଲିଉଡ୍ କଳାକାର ଅର୍ଜୁନ ରାମପାଲ୍, ବଲିଉଡ୍ ନିର୍ଦେଶକ ଇମ୍ତିଆଜ ଅଲ୍ଲୀ, ପ୍ରେରଣାଦାୟୀ ବକ୍ତା ଗୌରାଙ୍ଗ ଦାସ, ଜୀବନଶୈଳୀ ପ୍ରଶିକ୍ଷକ ଲ୍ୟୁକ୍ କୌଟିହୋ, ଫିଟ୍ନେସ୍ ବିଶେଷଜ୍ଞ ସମିର ପୁରୋହିତ ପ୍ରମୁଖ ଯୋଗଦେବାର କାର୍ଯ୍ୟକ୍ରମ ରହିଛି। ମେଳାରେ ଓଲିଉଡ୍ ସନ୍ଧ୍ୟା, ଫେସନ ସୋ’, ଆଇଡବ୍ଲୁଇସି ଆୱାର୍ଡସ୍, ସାଂସ୍କୃତିକ ଓ ସଙ୍ଗୀତ କାର୍ଯ୍ୟକ୍ରମ ଆଦି ଆୟୋଜନ କରାଯିବ। ପ୍ରତିଦିନ ବ୍ୟବସାୟୀ, ନୀତି ନିର୍ଧାରକ ଆଦି ବିଶିଷ୍ଟ ବ୍ୟକ୍ତିମାନଙ୍କୁ ନେଇ ବିଭିନ୍ନ ବିଷୟରେ ସେମିନାର ଆୟୋଜନ କରାଯିବ। ଓଡ଼ିଶା ସରକାର, ଏମ୍ଏସ୍ଏମ୍ଇ-ଡିଆଇ, କଟକ ଓ ଅନ୍ୟାନ୍ୟ ବ୍ୟବସାୟିକ ପ୍ରତିଷ୍ଠାନ ଆନୁକୂଲ୍ୟରେ ଏହି ମେଳା ଆୟୋଜନ କରାଯାଇଛି। ମିସନ ଶକ୍ତି ଦ୍ବାରା ପରିଚାଳିତ ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି)ଗୁଡ଼ିକ ମେଳାର ଏକ ସ୍ବତନ୍ତ୍ର ଅଂଶ ଭାବେ ଯୋଗ ଦେଇଛନ୍ତି। ଆଦିବାସୀ ଜନଜାତି ବର୍ଗର ମହିଳା ଉଦ୍ୟୋଗୀମାନଙ୍କର ମଧ୍ୟ ଉତ୍ସର୍ଗୀକୃତ ଷ୍ଟଲ୍ ରହିଛି। ଏଥିରେ ଥିବା ସମସ୍ତ ଷ୍ଟଲ୍ ଶୀତତାପ ନିୟନ୍ତ୍ରିତ ହୋଇଥିବା ବେଳେ ପ୍ରବେଶକୁ ନିଶୁଳ୍କ ରଖାଯାଇଛି। ଫାଲ୍କନ୍ ଗ୍ରୁପ୍, ମିସନ ଶକ୍ତି ଓ ଜ୍ୟୋତି ମୋଟର୍ସ ହେଉଛନ୍ତି ମେଳାର ପ୍ରମୁଖ ପ୍ରାୟୋଜକ।
ବ୍ୟବସାୟରେ ୩୫ ଥର ବିଫଳ ହୋଇଛି: ମନ୍ତ୍ରୀ
ଭୁବନେଶ୍ବର : ନିଜକୁ ଜଣେ ବ୍ୟବସାୟୀ ଭାବେ ପ୍ରତିଷ୍ଠିତ କରିବାକୁ ଚାହୁଥିଲେ ରାଜ୍ୟ ଉଚ୍ଚ ଶିକ୍ଷା ଓ କୃଷି ମନ୍ତ୍ରୀ ଡ. ଅରୁଣ ସାହୁ। ବିଭିନ୍ନ ପ୍ରକାର କାରବାର କରିବାକୁ ଉଦ୍ୟମ କରିଥିଲେ। ତାଙ୍କର ସବୁ ଉଦ୍ୟମ ବିଫଳ ହୋଇଥିଲା। ସେ ବ୍ୟବସାୟରେ ୩୫ ଥର ବିଫଳ ହୋଇଥିଲେ ବୋଲି କହିଛନ୍ତି। ଆଜିଠାରୁ ଜନତା ମଇଦାନରେ ଆରମ୍ଭ ହୋଇଥିବା ମହିଳା ବିଜନେସ୍ ମେଳାର ଉଦଘାଟନୀ ସମାରୋହକୁ ସମ୍ବୋଧିତ କରିବା ଅବସରରେ ସେ ଏହା କହିଛନ୍ତି। ସେ କହିଲେ, ପାଠପଢ଼ା ପରେ ମୁଁ ବ୍ୟବସାୟ କରିବାକୁ ଚାହୁଥିଲି। ଗୋଟିଏ ବ୍ୟବସାୟ ବିଫଳ ହେବା ପରେ ଆଉ ଗୋଟିଏ ଆରମ୍ଭ କରୁଥିଲି। ଏମିତି ୩୫ ଥର ମୁଁ ବ୍ୟବସାୟରେ ବିଫଳ ହୋଇଛି। ରାଜନୀତିରେ ଯୋଗ ଦେବା ପରେ ଉଦ୍ୟୋଗୀ ହେବା ଲାଗି ଉଦ୍ୟମ କରିବାକୁ ସମୟ ଦେଇପାରୁନାହିଁ। ଏହି ମେଳାରୁ ମୁଁ ଶିଖିବି। ବ୍ୟବସାୟ ବିଷୟରେ ମହିଳାମାନଙ୍କ ଠାରୁ ଶିଖିବି। ବ୍ୟବସାୟୀ ହେବା ପାଇଁ ନିଜ ଅଭିଳାଷ ପୂରଣ କରିବା ଲାଗି ସେ ଉପସ୍ଥିତ ମହିଳା ଉଦ୍ୟୋଗୀମାନଙ୍କ ସହଯୋଗ ଲୋଡ଼ିଛନ୍ତି।