କରୋନା ସଂକ୍ରମିତ ଜ୍ୱର ମାପିବା ପାଇଁ ବ୍ୟବହାର କରାଯିବ ଇନ୍ଫ୍ରାରେଡ୍ ଥର୍ମୋମିଟର୍
ଭୂତାଣୁ ସଂକ୍ରମଣ ନେଇ ୫ଟି ନମୁନାରୁ ୪ଟି ନେଗେଟିଭ୍: ଡିଏମ୍ଇଟି
ଭୁବନେଶ୍ବର : କରୋନା ଭୂତାଣୁ ସଂକ୍ରମିତ ଲକ୍ଷଣ ଦେଖାଦେଉଥିବା ରୋଗୀଙ୍କ ଜ୍ବର ମାପିବା ପାଇଁ ଇନ୍ଫ୍ରାରେଡ୍ ଥର୍ମୋମିଟର୍ ବ୍ୟବହାର କରାଯିବ। ଏଥିପାଇଁ ଆଜି କଟକ ଏସ୍ସିବି ମେଡିକାଲକୁ ୨ଟି ଓ ଭୁବନେଶ୍ବର କ୍ୟାପିଟାଲ୍ ହସ୍ପିଟାଲକୁ ଗୋଟିଏ ଇନ୍ଫ୍ରାରେଡ୍ ଥର୍ମୋମିଟର ଯୋଗାଇ ଦିଆଯାଇଛି। ରୋଗୀକୁ ନ ଛୁଇଁ କିଛି ଦୂରତାରୁ ଏହି ଥର୍ମୋମିଟର ଜରିଆରେ ଜ୍ବର ମାପି ହେବ। କରୋନା ସ୍ଥିତି ନେଇ ଡିଏମ୍ଇଟି ପ୍ରଫେସର୍ ସି.ବି.କେ ମହାନ୍ତି ସୂଚନା ଦେଇ କହିଛନ୍ତି ଯେ ମୁମ୍ବାଇସ୍ଥିତ ଏନ୍ଆଇଭିକୁ ପଠାଯାଇଥିବା ୫ ଜଣଙ୍କ ରକ୍ତ ନମୁନାରୁ ୪ ଜଣଙ୍କର ନେଗେଟିଭ୍ ରିପୋର୍ଟ ଆସିଛି। ଏସ୍ସିବି ଆଇସୋଲେସନ୍ ଵାର୍ଡ଼ରେ ଚିକିତ୍ସିତ ହେଉଥିବା କନ୍ଧମାଳର ଜନୈକ ବ୍ୟକ୍ତିଙ୍କ ରକ୍ତ ପରୀକ୍ଷା ରିପୋର୍ଟ ଏ ପର୍ଯ୍ୟନ୍ତ ଆସିନାହିଁ। ପରବର୍ତୀ ପର୍ଯ୍ୟାୟରେ ବୁର୍ଲା ଏବଂ ବ୍ରହ୍ମପୁରକୁ ଯୋଗାଇ ଦିଆଯିବ।
Sambad is now on WhatsApp
Join and get latest news updates delivered to you via WhatsApp
ଶ୍ରୀ ମହାନ୍ତି କହିଛନ୍ତି, ୨୦୨୦ ମସିହା ଜାନୁଆରି ୧୫ ତାରିଖ ପରେ ଚୀନ୍, ହଂକଂ, ଥାଇଲାଣ୍ଡ୍ ଓ ସିଙ୍ଗାପୁର ଦେଶରୁ ଫେରିଥିବା ବ୍ୟକ୍ତିମାନଙ୍କ ସମ୍ପର୍କରେ ସୂଚନା ପ୍ରଦାନ କରିବାକୁ ସ୍ବାସ୍ଥ୍ୟ ବିଭାଗର କଣ୍ଟ୍ରୋଲ୍ ରୁମ୍କୁ ୦୬୭୪- ୨୩୯୦୪୬୬/ ୯୪୩୯୯୯୪୮୫୭/ ୯୪୩୭୦୪୦୫୬୪ ନମ୍ବରରେ ଜଣାଇବାକୁ ସମସ୍ତ ଜିଲ୍ଲା ପ୍ରଶାସନକୁ ଜଣାଇ ଦିଆଯାଇଛି। ଏହାସହିତ ବ୍ୟକ୍ତିବିଶେଷ, ଶିକ୍ଷାନୁ୍ଷ୍ଠାନ, ବ୍ୟବସାୟିକ ପ୍ରତିଷ୍ଠାନ ଏବଂ ବିଭିନ୍ନ କର୍ମସଂସ୍ଥାନମାନଙ୍କୁ ମଧ୍ୟ ଏ ବିଷୟରେ ଅବଗତ କରିବାକୁ ଜିଲ୍ଲା ସ୍ବାସ୍ଥ୍ୟ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି। କରୋନା ପାଇଁ ଭାରତ ସରକାର ଜାରି କରିଥିବା ଗାଇଡଲାଇନ୍ ଅନୁଯାୟୀ ଆକ୍ରାନ୍ତଙ୍କ ପରିଚୟ ଗୋପନ ରଖାଯିବ ବୋଲି ଡିଏମ୍ଇଟି କହିଥିଲେ।