ତିନିଦିନ ହେଲା କଏଦୀର ପତ୍ତା ମିଳୁନି: ପହରା ଦୁର୍ଗରେ ୫ ଯବାନ, ଖସାଇଦେଲେ!

ବ୍ରହ୍ମପୁର/ବାଲିଗୁଡ଼ା : କନ୍ଧମାଳ ଜିଲ୍ଲା ବାଲିଗୁଡ଼ା ସବ୍‌ଜେଲ୍‌ରୁ ବିଚରାଧୀନ କଏଦୀ ଟୁକୁନା ମାଳି ଚମ୍ପଟ୍‌ ମାରିବା ଘଟଣାରୁ ଆଉ ଏକ ତଥ୍ୟ ସାମ୍‌ନାକୁ ଆସିଛି। ଯେଉଁ ସମୟରେ ଏହି ଘଟଣା ଘଟିଥିଲା ୱାଚ୍‌ ଟାୱାର ବା ପହରା ଦୁର୍ଗରେ ସବୁଦିନ ଭଳି ୫ ଜଣ ଆର୍‌ଆର୍‌ବି ଯବାନ ମୁତୟନ ଥିଲେ। ତଥାପି, ଜଣେ ହତ୍ୟା ଅଭିଯୁକ୍ତ ଖସିଗଲା। ଖସିଗଲା ନା ଖସାଇଦେଲେ, ତାହା ଏବେ ବି ଅସମାହିତ ପ୍ରଶ୍ନ ହୋଇରହିଛି। ମାତ୍ର, ଘଟଣାର ତିନିଦିନ ପରେ ବି ଟୁକୁନାର ପତ୍ତା‌ ମିଳୁନି। ବିଭିନ୍ନ ସ୍ଥାନରେ ଛାନ୍‌ଭିନ୍‌ କରି ସୁଦ୍ଧା ପୁଲିସର ୪ଟି ଟିମ୍‌କୁ ନିରାଶ ହେବାକୁ ପଡ଼ିଛି।

ସୂଚନା ଅନୁସାରେ, ତିନିଟି ପାଳିରେ ୫ ଜଣ ଲେଖାଏଁ ଆଇଆର୍‌ବି ଯବାନ୍‌ ପହରା ଦୁର୍ଗରେ ମୁତୟନ ଥାଆନ୍ତି। ଟୁକୁନା ଅପରାହ୍‌ଣ ୪ଟାରେ ନିଖୋଜ ହେବାବେଳେ ସମସ୍ତ ପାଞ୍ଚ ଜଣ ଯବାନ ହିଁ ଡ୍ୟୁଟିରେ ଥିଲେ। ଏହାସତ୍ତ୍ବେ ବି ଟୁକୁନା କିଭଳି ଚମ୍ପଟ୍‌ ମାରିଲା, ତାହା ଏବେ ପ୍ରଶ୍ନବାଚୀ ସୃଷ୍ଟି ହୋଇଛି। ଏହି ଘଟଣାରୁ ହୁଏତ ଦୁଇଟି ଦିଗ ଥାଇପାରେ ବୋଲି ଆଲୋଚନା ହେଉଛି। ପ୍ରଥମ, ଯବାନ ମାନେ ନିଜର କର୍ତ୍ତବ୍ୟକୁ ସଠିକ୍‌ ରୂପେ ସମ୍ପାଦନ କରୁନାହାନ୍ତି। ପହରା ଦୁର୍ଗରେ ଠିଆ ହେଉଛନ୍ତି ସତ କାହାର ଗତିବିଧି ଉପରେ ନିରୀକ୍ଷଣ କରୁନାହାନ୍ତି। ଦ୍ବିତୀୟ, ହୁଏତ କଏଦୀକୁ ଖସି ଚାଲିବା ପାଇଁ ବାଟ କରିଛନ୍ତି ଏବଂ ସେହି ବାଟ ହେଉଛି ଢିଲା ସୁରକ୍ଷା ବ୍ୟବସ୍ଥା। ଏବେ ସାଧାରଣରେ ଏହିଭଳି ଆଲୋଚନା ଶୁଣିବାକୁ ମିଳୁଛି। ଖାଲି ଯବାନ ନୁହନ୍ତି, ମୁଖ୍ୟ ଫାଟକରେ ଜଣେ ବରିଷ୍ଠ ୱାର୍ଡ଼ର ଏବଂ ଭିତରେ ୩ରୁ ୪ ଜଣ ୱାର୍ଡ଼ର ଘଟଣାଦିନ ପଇଁତରା ମାରୁଥିଲେ। ତଥାପି, ସବୁ ସୁରକ୍ଷା ବଳୟକୁ ଭେଦକରି ଟୁକୁନା ଷ୍ଟୋର୍‌ ରୁମ୍‌ ଝରକା ଗ୍ରୀଲ୍‌କୁ ଗ୍ୟାସ୍‌ କଟର୍‌ରେ କାଟି ଫେରାର୍‌ ହୋଇଯିବାରେ ଏମା‌ନଙ୍କର ସମ୍ପୃକ୍ତି ନାହିଁ ? ସାଧାରଣ ଲୋକଙ୍କ ଚର୍ଚ୍ଚା ଓ ସନ୍ଦେହ ବଳୟରେ ବି ଏମାନେ ରହିଯାଇଛନ୍ତି।