ଭବାନୀପାଟଣା : କଳାହାଣ୍ଡି ଜିଲ୍ଲାରେ ଜଳସେଚନର ସୁବିଧା ହେବାପରେ ଧାନଚାଷ ଓ ଉତ୍ପାଦନ ବୃଦ୍ଧି ପାଇବାରେ ଲାଗିଛି। ଧାନ ଉତ୍ପାଦନ ଅଧିକ ଯୋଗୁଁ ଚାଷୀ ମଣ୍ଡିରେ ଅଭାବି ବିକ୍ରିର ଶିକାର ହେଉଛନ୍ତି । ତେଣୁ ବର୍ତ୍ତମାନ ଚାଷୀମାନେ ମକା ଚାଷ ପାଇଁ ଆଗ୍ରହ ଦେଖାଉଥିବା ଜଣାପଡିଛି । କୃଷି ବିଭାଗ ପକ୍ଷରୁ ମଧ୍ୟ ମକା ଚାଷୀ ମାନଙ୍କୁ ଉତ୍ସାହିତ କରି ଚଳିତ ବର୍ଷ ପ୍ରାୟ ୩ ଲକ୍ଷ କୁଇଣ୍ଟାଲ ମକା ଉତ୍ପାଦନ ଧାର୍ଯ୍ୟ ରଖାଯାଇଛି । ମକା ଉତ୍ପାଦନ ବୃଦ୍ଧି ପାଉଥିବା ଯୋଗୁଁ ରାଜ୍ୟ ସରକାର ମକା ମଣ୍ଡି ଖୋଲିବାକୁ ସାଧାରଣରେ ଦାବୀ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ପ୍ରାପ୍ତ ସୂଚନାରୁ ପ୍ରକାଶ ଯେ, କଳାହାଣ୍ଡି ଜିଲ୍ଲାରେ ଦିନ ଥିଲା ଜଳସେଚନ ଅଭାବ ଯୋଗୁଁ ଚାଷୀମାନେ ଦୋ ଫସଲି ଧାନ ଚାଷ କରିବାକୁ ମଙ୍ଗୁ ନଥିଲେ । ଧାନର ବିକଳ୍ପ ଭାବରେ ମକା ସମେତ ଅନ୍ୟ ଚାଷ ପ୍ରତି ଆଗ୍ରହ ବଢ଼ୁଥିଲା । ଜିଲ୍ଲାରେ ଇନ୍ଦ୍ରାବତୀ ସମେତ ବିଭିନ୍ନ ଅଞ୍ଚଳରେ ଜଳସେଚନର ସୁବିଧା ଯୋଗୁଁ ଚାଷୀମାନେ କେବଳ ଧାନ ଚାଷ କରିବା ପାଇଁ ଆଗଭର ହୋଇଥିଲେ। ଅଧିକ ଧାନ ଉତ୍ପାଦନ ଯୋଗୁଁ ମଣ୍ଡି ମାନଙ୍କରେ ଚାଷୀମାନେ ଧାନର ଅଭାବି ବିକ୍ରିର ଶିକାର ହେଉଛନ୍ତି । ଅଣ ଜଳସେଚିତ ଅଞ୍ଚଳରେ ଧାନର ଅଭାବି ବିକ୍ରି ପାଇଁ ପୁର୍ନବାର ଧାନ ଚାଷ ପ୍ରତି ବିମୁଖ ହୋଇ ମକା ଚାଷ ପାଇଁ ଆଗ୍ରହ ଦେଖାଉଛନ୍ତି ।
ବର୍ତ୍ତମାନ କୋଭିଡ ସମୟରେ ଜିଲ୍ଲାରେ ଚଳିତ ବର୍ଷ ୩ ଲକ୍ଷ କୁଇଣ୍ଟାଲ ମକା ଚାଷ ମକା ଉତ୍ପାଦନ ପାଇଁ କୃଷି ବିଭାଗ ଧାର୍ଯ୍ୟ କରିଛି । ଏଥି ପାଇଁ ରାଜ୍ୟ ସରକାରଙ୍କ ଜାତୀୟ ଖାଦ୍ୟ ସୁରକ୍ଷା ମିଶନ ତରଫରୁ ଜିଲ୍ଲାର ୫ ଟି ବ୍ଲକରେ ଏହି ଯୋଜନାରେ ଚାଷୀଙ୍କୁ ସହାୟତା ପ୍ରଦାନ କରାଯାଇଛି । କେସିଙ୍ଗା ବ୍ଲକର ବ୍ରାହ୍ମଣୀ ଓ ଗୋକୁଳେଶ୍ଵର ଗାଁରେ ଏହି ମକା ଚାଷୀମାନେ ହେକ୍ଟର ପିଛା ୩୯ ରୁ ୫୦ କୁଇଣ୍ଟାଲ ଉତ୍ପାଦନ କରିଛନ୍ତି । ଏହି ଗାଁରେ କେସିଙ୍ଗା ବ୍ଲକ କୃଷି ଅଧିକାରୀ, ସହକାରୀ କୃଷି ଅଧିକାରୀ ଓ ପରିସଂଖ୍ୟାନ ବିଭାଗର ଅଧିକାରୀମାନଙ୍କ ଉପସ୍ଥିତିରେ ମକାର କ୍ରପ କଟିଂ କରାଯାଇଥିଲା । ଏହାର ଭିଡ଼ିଓ ଡକୁମେଣ୍ଟସନ ମଧ୍ୟ କରାଯାଇଥିଲା । ଯାହା ଫଳରେ ମକା ଚାଷ ପାଇଁ ଆଗ୍ରହୀ ଥିବା ଅନ୍ୟ ଚାଷୀମାନେ ମଧ୍ୟ ପ୍ରେରଣା ପାଇବେ । କଳାହାଣ୍ଡି ଜିଲ୍ଲାରେ କୃଷି ବିଭାଗ ପକ୍ଷରୁ ୨୦ ହଜାର ହେକ୍ଟରରେ ମକା ଚାଷ ଡେମୋଷ୍ଟ୍ରେସନ କରାଯାଇଥିଲା । ଏହା ବ୍ୟତୀତ ଜିଲ୍ଲାର ବିଭିନ୍ନ ଅଞ୍ଚଳରର ଚାଷୀମାନେ ନିଜ ଉଦ୍ୟମରେ ମଧ୍ୟ ମକା ଚାଷ କରିଛନ୍ତି ।
କେବଳ କୃଷି ବିଭାଗ ଦ୍ଵାରା ହୋଇଥିବା ଚାଷୀମାନଙ୍କ ପାଇଁ ସବସିଡ଼ି ଓ ମାଗଣାରେ ହାଇବ୍ରିଡ଼ ମକା ବିହନ ଏବଂ ରୋଗପୋକ ନିରାକରଣ ପାଇଁ ତାଲିମ ପ୍ରଦାନ କରାଯାଇଥିଲା । ବର୍ତ୍ତମାନ ମକାର ସର୍ବନିମ୍ନ ମୂଲ୍ୟ କୁଇଣ୍ଟାଲ ପ୍ରତି ୧୭୫୦ ଟଙ୍କା ଥିବା ବେଳେ ଗତବର୍ଷ କୁଇଣ୍ଟାଲ ପ୍ରତି ୧୮୦୦ ଟଙ୍କା ରୁ ୨୩୦୦ ଟଙ୍କା ମଧ୍ୟରେ ବିକ୍ରି କରିଥିଲେ । ବର୍ତ୍ତମାନ କୋଭିଡ ସମୟରେ ଧାନ ଛାଡି ମକା ପ୍ରତି ଚାଷୀ ଆଗ୍ରହୀ ହେଉଥିବା ବେଳେ ଅଧିକ ଉତ୍ପାଦନ ଯୋଗୁଁ ଲାଭବାନ ମଧ୍ୟ ହେଉଛନ୍ତି । ବର୍ତ୍ତମାନ ମକାର ଉତ୍ପାଦନ ଅହେତୁକ ବୃଦ୍ଧି ପାଇଥିବା ଯୋଗୁଁ ପର୍ଯ୍ୟାପ୍ତ ବଜାର ସୁବିଧା ନ ଥିବା ଯୋଗୁଁ ଚାଷୀମାନେ ମକା ମଣ୍ଡି ପାଇଁ ଦାବୀ କରିଛନ୍ତି ।
ଓରମାସ, ଓଏଲଏମ୍, ଆରଏମସି ଓ ଆତ୍ମା ପକ୍ଷରୁ ମକା ଚାଷୀ ମାନଙ୍କ ଗୋଷ୍ଠୀ ତିଆରି କରି ପ୍ରଡ୍ୟୁସର କମ୍ପାନୀ ଗଠନ ପାଇଁ ପ୍ରକ୍ରିୟା ଆରମ୍ଭ ହୋଇଥିବା ଜଣାପଡିଛି । କଳାହାଣ୍ଡି ମୁଖ୍ୟ କୃଷି ଅଧିକାରୀଙ୍କ ଭେରିଫିକେସନ ସହିତ ସମସ୍ତ ବ୍ଲକରେ ମକା ଚାଷର ଭିଡିଓ ଡ଼କୁମେଣ୍ଟେସନ କରାଯାଉଛି। ଏହା ଦ୍ୱାରା ମକା ଚାଷ ପାଇଁ ଆଗ୍ରହ ଦେଖାଉଥିବା ଚାଷୀମାନେ ଉପକୃତ ହୋଇପାରିବେ । ମକା ଉତ୍ପାଦନ ବୃଦ୍ଧି ପାଉଥିବା ଯୋଗୁଁ ରାଜ୍ୟ ସରକାର ମକା ମଣ୍ଡି ଖୋଲିବାକୁ ଚାଷୀ ମହଲ ରେ ଦୃଢ଼ ଦାବୀ ହୋଇଛି ।