ଓଡ଼ିଶାରେ ଆଉ ୧ ଲକ୍ଷ କୋଟି ନିବେଶ କରିବ ଇଣ୍ଡିଆନ ଅଏଲ, ଓଡ଼ିଶା ସରକାରଙ୍କ ମଂଜୁରୀ
ଭୁବନେଶ୍ୱର : ରାଷ୍ଟ୍ରାୟତ ତୈଳ କମ୍ପାନି ଇଣ୍ଡିଆଲ ଅଏଲ ଓଡ଼ିଶାରେ ପ୍ରାୟ ୧ ଲକ୍ଷ କୋଟି ନିବେଶ କରିବ ।ଏ ସଂପର୍କିତ ଏକ ପ୍ରସ୍ତାବକୁ ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବସିଥିବା ଉଚ୍ଚସ୍ତରୀୟ କ୍ଲିୟରାନ୍ସ କମିଟି ବୈଠକରେ ମଂଜୁରୀ ଦିଆଯାଇଛି । ଏହାକୁ ମିଶାଇ ମୋଟ ୨.୦୪ ଲକ୍ଷ କୋଟି ଟଙ୍କାର ପ୍ରସ୍ତାବକୁ ମଂଜୁରୀ ଦିଆଯାଇଛି । ଏହା ଦ୍ୱାରା ପ୍ରାୟ ୩୦ ହଜାର ନିଯୁକ୍ତି ସୃଷ୍ଟି ହେବ ବୋଲି ଶିଳ୍ପ ସଚିବ ସଂଜୀବ ଚୋପ୍ରା କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏହା ମାଧ୍ୟମରେ କମ୍ପାନି ପାରାଦ୍ୱୀପସ୍ଥିତ ନିଜର ବିଶୋଧନାଗାରକୁ ବର୍ତ୍ତମାନର ୧୫ ନିୟୁତ ଟନରୁ ୨୫ ନିୟୁତ ଟନକୁ ବୃଦ୍ଧି କରିବ ଓ ଏକ ନାପଥା ୟୁନିଟ ସ୍ଥାପନ କରିବ । ଏହି ଡୁଆଲ କ୍ରାକର ନାପଥା ୟୁନିଟର କ୍ଷମତା ବାର୍ଷିକ ୩-୪ ନିୟୁତ ଟନ ରହିବ । ଏହାଛଡା ପାରାଦ୍ୱୀପରେ କମ୍ପାନି ଏକ ବାର୍ଷିକ ୧.୪ନିୟୁତ ଟନ କ୍ଷମତା ବିଶିଷ୍ଟ ଏଥିଲିନ ୟୁନିଟ, ବାର୍ଷିକ ୦.୬୫ ନିୟୁତ ଟନ କ୍ଷମତା ବିଶିଷ୍ଟ ପ୍ରୋପିଲିନ ୟୁନିଟ ଓ ବାର୍ଷିକ ୬୫୦ କିଲୋଟନ କ୍ଷମତା ବିଶିଷ୍ଟ ପଲି-ପ୍ରୋପିଲିନ ୟୁନିଟ ସ୍ଥାପନର ପ୍ରସ୍ତାବ ରହିଛି । ଏହି ସଂପ୍ରସାରଣ ପ୍ରସ୍ତାବକୁ କମ୍ପାନି ପକ୍ଷରୁ ଗତ ଜୁଲାଇ ମାସରେ ଓଡ଼ିଶା ସରକାରଙ୍କ ସିଙ୍ଗଲ ଓ୍ଵିଣ୍ଡୋ ଅଥରିଟି ମାଧ୍ୟମରେ ମଂଜୁରୀ ପାଇଁ ଦାଖଲ କରାଯାଇଥିଲା । ଏହି ସଂପ୍ରସାରଣ ପାଇଁ କମ୍ପାନି ପ୍ରାୟ ୪୨୦୦ ଏକର ଜମି ଆବଶ୍ୟକ କରିବ । କମ୍ପାନି ପୂର୍ବରୁ ଓଡ଼ିଶାରେ ୩୫ ହଜାର କୋଟି ନିବେଶ କରିସାରିଛି ।
ଏହାଛଡା ହଳଦିଆ ପେଟ୍ରୋକେମିକାଲ୍ସର ଏକ ପ୍ରକଳ୍ପକୁ ମଂଜୁରୀ ଦିଆଯାଇଛି । ସୁବର୍ଣ୍ଣରେଖା ବନ୍ଦର ନିକଟରେ ଏହି ପ୍ରକଳ୍ପ କରିବ ହଳଦିଆ ପେଟ୍ରୋକେମିକାଲ୍ସ ।