ଚାଷୀଙ୍କ ଆୟ ବୃଦ୍ଧି ଲାଗି ଧ୍ୟାନ ଦେବା ଜରୁରୀ : ତୋମର

ବେଙ୍ଗାଲୁରୁରେ କୃଷିମନ୍ତ୍ରୀମାନଙ୍କ ସମ୍ମିଳନୀ ଉଦ୍‌ଯାପିତ

ଭୁବନେଶ୍ବର: ବେଙ୍ଗାଲୁରୁରେ ଆୟୋଜିତ ରାଜ୍ୟ କୃଷି ଏବଂ ଉଦ୍ୟାନ କୃଷି ମନ୍ତ୍ରୀମାନଙ୍କର ଦୁଇ ଦିନିଆ ସମ୍ମିଳନୀ ଆଜି ଉଦ୍‌ଯାପିତ ହୋଇଯାଇଛି । କେନ୍ଦ୍ର କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟ ଏବଂ କର୍ଣ୍ଣାଟକ ସରକାରଙ୍କ ମିଳିତ ଆନୁକୂଲ୍ୟରେ ଏହି ସମ୍ମିଳନୀ ଆୟୋଜନ କରାଯାଇଥିଲା । ଏହି ସମ୍ମିଳନୀ ଅବସରରେ ବିଭିନ୍ନ ପ୍ରସଙ୍ଗ ଉପରେ ଏକାଧିକ ଅଧିବେଶନ ମାଧ୍ୟମରେ ବ୍ୟାପକ ବିଚାରବିମର୍ଶ କରାଯାଇଥିଲା । ପ୍ରାକୃତିକ କୃଷି, ଡିଜିଟାଲ କୃଷି, ଫସଲ ବୀମା, କୃଷକ ଉତ୍ପାଦକ ସଂଗଠନ (ଏଫପିଓ)ଗୁଡ଼ିକୁ ପ୍ରୋତ୍ସାହନ ଏବଂ କୃଷି ଭିତ୍ତିଭୂମି ପାଣ୍ଠି ଭଳି କ୍ଷେତ୍ରରେ ଅଧିକ ଯୋଗଦାନ ଦେବା ଲାଗି ରାଜ୍ୟମାନେ ସହମତ ହୋଇଥିଲେ ।

ପ୍ରାକୃତିକ କୃଷି, ଫସଲ ବୀମା, ଭିତ୍ତିଭୂମି ପାଣ୍ଠି ଭଳି କ୍ଷେତ୍ରରେ ସମନ୍ବୟ ପାଇଁ ସହମତି

ଦୀର୍ଘସ୍ଥାୟୀ କୃଷି ବିକାଶ ପାଇଁ କେନ୍ଦ୍ର ସରକାରଙ୍କ ଲକ୍ଷ୍ୟ ହାସଲ ନିମନ୍ତେ କୃଷି ଭିତ୍ତିଭୂମି ପାଣ୍ଠିର ଯୋଗଦାନ ବିଷୟରେ ମଧ୍ୟ ସମ୍ମିଳନୀରେ ଆଲୋଚନା ହୋଇଥିଲା । ଏହା ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଆତ୍ମନିର୍ଭର ଭାରତ ସଂକଳ୍ପକୁ ସାକାର କରିବା ଦିଗରେ ଏକ ଦୃଢ଼ ପଦକ୍ଷେପ ସାବ୍ୟସ୍ତ ହେବ।

ଏହି ଅବସରରେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି କେନ୍ଦ୍ର କୃଷି ଏବଂ କୃଷକ କଲ୍ୟାଣ ମନ୍ତ୍ରୀ ଶ୍ରୀ ନରେନ୍ଦ୍ର ସିଂ ତୋମର କହିଥିଲେ ଯେ, କୃଷି କ୍ଷେତ୍ରରେ ବ୍ୟାପକ ସମ୍ଭାବନା ରହିଛି । ତେବେ ନବୋନ୍ମେଷ ଏବଂ ଆଧୁନିକ ଜ୍ଞାନକୌଶଳ ଉପରେ ଧ୍ୟାନ ଦେବାର ଆବଶ୍ୟକତା ରହିଛି। ସେ କହିଥିଲେ ଯେ କେନ୍ଦ୍ର ସରକାରଙ୍କ ଲକ୍ଷ୍ୟବଦ୍ଧ ହସ୍ତକ୍ଷେପ କାରଣରୁ ମହାମାରୀ କାଳରେ ଅନ୍ୟାନ୍ୟ କ୍ଷେତ୍ର ଅପେକ୍ଷା କୃଷି କ୍ଷେତ୍ର ସକାରାତ୍ମକ ପ୍ରଗତି ହାସଲ କରିଥିଲା। କୋଭିଡ ପ୍ରତିବନ୍ଧକରୁ କୃଷି କାର୍ଯ୍ୟକୁ କୋହଳ କରାଯାଇଥିଲା । କିସାନ ରେଳ ଚଳାଚଳ ଯୋଗୁ କୃଷି କ୍ଷେତ୍ର ଏବଂ ଚାଷୀ ଲାଭାନ୍ବିତ ହୋଇଥିବା କେନ୍ଦ୍ର କୃଷି ମନ୍ତ୍ରୀ କହିଥିଲେ ।

ଭାରତ ସରକାରଙ୍କ ଯୋଜନା ଏବଂ ନୀତିକୁ ରାଜ୍ୟ ସରକାରଙ୍କ ସହଯୋଗରେ ଭଲ ଭାବେ କାର୍ଯ୍ୟକାରୀ କରିବାର ଆବଶ୍ୟକତା ରହିଛି ବୋଲି କେନ୍ଦ୍ର ମନ୍ତ୍ରୀ କହିଥିଲେ । ଡିଜିଟାଲ କୃଷି ମିଶନ, ଏଫପିଓକୁ ପ୍ରୋତ୍ସାହନ, ଇ-ନାମ ଜରିଆରେ କୃଷି ଉତ୍ପାଦ ବିପଣନ ପାଇଁ ଅଧିକ ବାଣିଜ୍ୟ ପ୍ରଣାଳୀ ବିକଶିତ କରିବା, ପିଏମ କିଷାନ ସମ୍ମାନ ନିଧିର ସଦୁପଯୋଗ, ଗ୍ରାମାଞ୍ଚଳରେ କୃଷି ଭିତ୍ତିଭୂମି ବିକାଶ ଲାଗି କୃଷି ଭିତ୍ତିଭୂମି ପାଣ୍ଠି ଉପଯୋଗ ଉପରେ କୃଷି ମନ୍ତ୍ରୀ ଗୁରୁତ୍ବାରୋପ କରିଥିଲେ । ଉଚ୍ଚ ମୂଲ୍ୟଯୁକ୍ତ ଫସଲର ଚାହିଦା ବୃଦ୍ଧି ପାଉଛି । ଏହାକୁ ଦୃଷ୍ଟିରେ ରଖି ଚାଷୀଙ୍କ ଆୟ ବୃଦ୍ଧି ନିମନ୍ତେ ଫସଲ ବିବିଧକରଣ ଉପରେ ଗୁରୁତ୍ବାରୋପ କରାଯିବାର ଆବଶ୍ୟକତା ରହିଛି ବୋଲି ସେ କହିଥିଲେ । ଏଥିପ୍ରତି ଗୁରୁତ୍ବ ଦେବାକୁ କୃଷି ମନ୍ତ୍ରୀ ରାଜ୍ୟମାନଙ୍କୁ ପରାମର୍ଶ ଦେଇଥିଲେ । ଏହି ଅବସରରେ କୃଷି ଓ କୃଷକ କଲ୍ୟାଣ ରାଷ୍ଟ୍ରମନ୍ତ୍ରୀ ଶୋଭା କରନ୍ଦଲାଜେ, କର୍ଣ୍ଣାଟକ କୃଷି ମନ୍ତ୍ରୀ ଶ୍ରୀ ବି.ସି ପାଟିଲ ଉପସ୍ଥିତ ଥିଲେ। ଆସନ୍ତାବର୍ଷ ଅନ୍ତର୍ଜାତୀୟ ମିଲେଟ୍‌ (ପୋଷକ ଶସ୍ୟ) ବର୍ଷ -୨୦୨୩ ପାଳନ କରାଯିବାକୁ ଯାଉଥିବାରୁ ଏହି ପ୍ରସଙ୍ଗ ଉପରେ ସମ୍ମିଳନୀରେ ଆଲୋଚନା କରାଯାଇଥିଲାା

ସମ୍ବନ୍ଧିତ ଖବର