ଜାନକୀବଲ୍ଲଭ ଥିଲେ ଶ୍ରେଷ୍ଠ ମୁଖ୍ୟମନ୍ତ୍ରୀ: ସୁରେଶ ପୂଜାରୀ

କଟକ: ରାଜନୀତି ଖରାପ ନୁହେଁ କିମ୍ବା ସବୁ ରାଜନେତା ଖରାପ ନୁହନ୍ତି। ରାଜନୀତିକୁ ବାଦ୍‌ ଦେଇ ବିକାଶ ସମ୍ଭବ ନୁ‌ହେଁ। ରାଜନୀତିକୁ ଜ୍ଞାନୀଗୁଣି, ଦରଦୀ ଲୋକ ଆସିଲେ, ବିକଶିତ ଓଡ଼ିଶା ସମ୍ଭବ ହେବ ବୋଲି କହିଛନ୍ତି ରାଜସ୍ବ ମନ୍ତ୍ରୀ ସୁରେଶ ପୂଜାରୀ। ଜାନକୀବଲ୍ଲଭ ସ୍ମାରକୀ ପ୍ରତିଷ୍ଠାନ ପକ୍ଷରୁ ଆୟୋଜିତ ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ତଥା ଆସାମର ପୂର୍ବତନ ରାଜ୍ୟପାଳ ଜାନକୀବଲ୍ଲଭ ପଟ୍ଟନାୟକଙ୍କ ଦଶମ ବାର୍ଷିକ ସ୍ମୃତିସଭାରେ ମୁଖ୍ୟଅତିଥି ଭାବେ ଯୋଗ ଦେଇ ଶ୍ରୀ ପୂଜାରୀ କହିଲେ ଯେ ଓଡ଼ିଶାରେ ଯେତେ ମୁଖ୍ୟମନ୍ତ୍ରୀ ହୋଇଛନ୍ତି, ‌ସେମାନଙ୍କ ମଧ୍ୟରେ ଜାନକୀବଲ୍ଲଭ ପଟ୍ଟନାୟକ ଥିଲେ ସର୍ବଶ୍ରେଷ୍ଠ। ୨୦୦୯ରେ ଓଡ଼ିଶାରେ ବ‌ିଜେପିର ପରାଜୟ ପରେ ଜାନକୀବଲ୍ଲଭ ପଟ୍ଟନାୟକ ବ୍ୟକ୍ତିଗତ ଭାବେ ତାଙ୍କ (ସୁରେଶ ପୂଜାରୀ)ଙ୍କ ସହ ଆଲୋଚନା କରିଥିଲେ। ସକ୍ରିୟ ରାଜନୀତିରୁ ଦୂରେଇ ରହିବାର ବହୁ ବର୍ଷ ପରେ ଜାନକୀ ବାବୁ ଓଡ଼ିଶାର ୧୪୭ ବିଧାନସଭା ମଣ୍ଡଳୀର ଚିତ୍ର, ଲୋକଚରିତ୍ର ବିଷୟରେ ଯେଉଁ ତଥ୍ୟ ଦେଇଥିଲେ, ତାହା ତାଙ୍କର ବିରଳ ବ୍ୟକ୍ତିତ୍ବ, ବିଚକ୍ଷଣ ରାଜନୈତିକ ବ୍ୟକ୍ତିତ୍ବର ପରିଚୟ ଦିଏ। ଥରେ ସମ୍ବଲପୁରରେ ଆୟୋଜିତ ଏକ ଭାଗବତ ଆଲୋଚନାରେ ଜାନକୀ ବାବୁ ୨ ଘଣ୍ଟା ଧରି ଭାଗବତ ଉପରେ କହିଥିଲେ। ସେଭଳି ଉଚ୍ଚସ୍ତରର ଆଲୋଚନା ସମସ୍ତଙ୍କୁ ପ୍ରଭାବିତ କରିଥିଲା। ଜାନକୀବାବୁ ଥିଲେ ଜ୍ଞାନଗରିମାର ମୂର୍ତ୍ତିମନ୍ତ ପ୍ରତୀକ। ୧୯୮୦ର ଛାତ୍ର ଆନ୍ଦୋଳନ ପାଇଁ ତାଙ୍କୁ ଓ ତାଙ୍କ ସାନଭାଇଙ୍କୁ କଲେଜରୁ ବାହାର କରିଦିଆଯିବା ସହ ତାଙ୍କ ବିରୋଧରେ ଶତାଧିକ ମାମଲା ରୁଜୁ ହେଲା। କିନ୍ତୁ ଏହି ଆନ୍ଦୋଳନ ସମୟରେ ବହୁ ବିଶିଷ୍ଟ ବ୍ୟକ୍ତିଙ୍କ ସାନ୍ନିଧ୍ୟ ମଧ୍ୟ ମିଳିଥିଲା। ତାଙ୍କ ଜୀବନରେ ଜାନକୀବାବୁଙ୍କ ଅବଦାନ ରହିଛି ବୋଲି ଶ୍ରୀ ପୂଜାରୀ କହିଥିଲେ। 

ସମ୍ମାନିତ ଅତିଥି ଭାବେ ରାଜ୍ୟ ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଲେ, ଜାନକୀବଲ୍ଲଭ ପଟ୍ଟନାୟକ ଥିଲେ ଅନେକ ଗୁଣବତ୍ତାର ସମାହାର। ରାଜନୀତି, ସାରସ୍ବତ ସାଧନା, ସାମ୍ବାଦିକତା କ୍ଷେତ୍ରରେ ତାଙ୍କର ପ୍ରଚଣ୍ଡ ଦକ୍ଷତା ଥିଲା। ଓଡ଼ିଶା ବିକାଶର ସ୍ବପ୍ନଦ୍ରଷ୍ଟା ଥିଲେ ସେ। ରାଜ୍ୟରେ ଶିଳ୍ପର ବିକାଶ, ଶିକ୍ଷାକୁ ବ୍ୟବସ୍ଥିତ କରିବା, ବ୍ୟାପକ ଜଳସେଚନ ବ୍ୟବସ୍ଥା କରିବାରେ ତାଙ୍କ ଅବଦାନ ଅତୁଳନୀୟ। ତାଙ୍କ ମନ୍ତବ୍ୟ ‘ଜାତୀୟ ଦଳରେ ରାଜନୀତି କରୁଛ, ଦିଲ୍ଲୀ ସହ ଭଲ ସଂପର୍କ ରଖ’ ଭଳି ପରାମର୍ଶକୁ ଏଯାଏଁ ଭୁଲି ନାହିଁ ‌ବୋଲି ଆଇନ ମନ୍ତ୍ରୀ ଶ୍ରୀ ହରିଚନ୍ଦନ କହିଥିଲେ। ସମ୍ମାନିତ ଅତିଥି ଭାବେ ଇଷ୍ଟର୍ଣ୍ଣ ମିଡିଆ ଅଧ୍ୟକ୍ଷ ସୌମ୍ୟରଞ୍ଜନ ପଟ୍ଟନାୟକ କହିଲେ ଯେ ଜାନକୀବଲ୍ଲଭ ଥିଲେ ସମ୍ପୂର୍ଣ୍ଣ ଭାବେ ଆତ୍ମନିର୍ଭରଶୀଳ। ଜଣେ ସେଲଫ୍‌ମେଡ୍ ମଣିଷ। ତାଙ୍କର କେହି ଧର୍ମପିତା ନ ଥିଲେ ମଧ୍ୟ ସେ ସଫଳତାର ଶୀର୍ଷକୁ ଯାଇପାରିଥିଲେ। ରାଜ୍ୟରେ ଏବେ ନେତୃତ୍ବର ସଂକଟ ରହିଛି। ଛାତ୍ରସଂସଦ ନିର୍ବାଚନ ଆଉ ଚାରି ପାଞ୍ଚବର୍ଷ ବନ୍ଦ ହେଲେ, ରାଜ୍ୟରେ ନେତାଙ୍କ ଅଭାବ ପଡ଼ିବ ବୋଲି ଶ୍ରୀ ପଟ୍ଟନାୟକ କହିଥିଲେ। ହରେକୃ୍ଷ୍ଣ ମହତାବଙ୍କ ଉଦାହରଣ ଦେଇ ଶ୍ରୀ ପଟ୍ଟନାୟକ କହିଲେ ଯେ ମହତାବ ବାବୁ ନିଜେ ମୁଖ୍ୟମନ୍ତ୍ରୀ ହେବା ସହିତ ତାଙ୍କୁ ସହଯୋଗ କରୁଥିବା ୪ ଜଣଙ୍କୁ ମୁଖ୍ୟମନ୍ତ୍ରୀ ଭାବେ ଗଢ଼ିଥିଲେ। 

ଜାନକୀବଲ୍ଲଭ ସ୍ମାରକୀ ପ୍ରତିଷ୍ଠାନର ସଭାପତି ପ୍ରଫେସର ଡକ୍ଟର ବୈଷ୍ଣବ ଚରଣ ସାମଲଙ୍କ ପୌରୋହିତ୍ୟରେ ଆୟୋଜିତ ସ୍ମୃତିସଭାରେ ସାଧାରଣ ସଂପାଦକ ବିଶିଷ୍ଟ ସାହିତ୍ୟିକ ଡକ୍ଟର ଗୋବିନ୍ଦ ଭୂୟାଁ ସ୍ବାଗତ ଭାଷଣ ଦେଇଥିଲେ। ପ୍ରତିଷ୍ଠାନର ଉପସଭାପତି ବରି‌ଷ୍ଠ ଆଇନଜୀବୀ ଧରଣୀଧର ନାୟକ କଟକ ସହିତ ଜାନକୀବଲ୍ଲଭଙ୍କ ଭାବଗତ ସଂପର୍କରେ ବିଷୟରେ କହିବା ସହିତ ତାଙ୍କର ସ୍ମୃତିରକ୍ଷା ପାଇଁ କଟକର ଏକ ପ୍ରମୁଖ ସ୍ଥାନରେ ପ୍ରତିମୂର୍ତ୍ତି ପ୍ରତିଷ୍ଠା କରିବାକୁ ଦାବି କରିଥିଲେ। ପ୍ରତିଷ୍ଠାନର ଉପସଭାପତି ତଥା ପୂର୍ବତନ ବିଧାୟକ ଇଞ୍ଜିନିୟର ମହମ୍ମଦ ‌ମୋକିମ୍ କହିଲେ, ମର୍କତନଗର ଜାନକୀବାବୁ ଓ ବସନ୍ତବାବୁଙ୍କ ଅବଦାନ। ତେଣୁ ଆମର ଉତ୍ତରପିଢ଼ି ପାଇଁ ସେଲ୍‌ଟର ଛକରେ ଜାନକୀବାବୁଙ୍କ ପ୍ରତିମୂର୍ତ୍ତି ନିର୍ମାଣ କରିବାକୁ ଶ୍ରୀ ମୋକିମ ଦାବି କରିଥିଲେ। ଅନ୍ୟତମ ଉପସଭାପତି ଇଂ.ପ୍ରଭାକର ସ୍ବାଇଁ ଜାନକୀବଲ୍ଲଭଙ୍କୁ ସାହିତ୍ୟ, ସାମ୍ବାଦିକତା ଓ ରାଜନୀତିର ତ୍ରିବେଶୀ ସଙ୍ଗମ ଭାବେ ବର୍ଣ୍ଣନା କରିଥିଲେ। ଏହି ଅବସରରେ ସାହିତ୍ୟିକ ନଟବର ଖୁଣ୍ଟିଆଙ୍କୁ ଜାନକୀବଲ୍ଲଭ ସାହିତ୍ୟ ସମ୍ମାନ, ସମାଜସେବୀ ପ୍ରହ୍ଲାଦ କୁମାର ସିଂଙ୍କୁ ଜାନକୀବଲ୍ଲଭ ସେବା‌ ସମ୍ମାନ ଓ ସାମ୍ବାଦିକା ସୁପ୍ରିୟା ଦାସଙ୍କୁ ଜାନକୀବଲ୍ଲଭ ସାମ୍ବାଦିକତା ସମ୍ମାନ ପ୍ରଦାନ କରାଯାଇଥିଲା। ଇଂ. ଆକାଶ ଭୂୟାଁ ଧନ୍ୟବାଦ ଅର୍ପଣ କରିଥିବା ବେଳେ ଇଂ. ଆଲୋକ ଭୂୟାଁ କାର୍ଯ୍ୟକ୍ରମ ସଂଯୋଜନା କରିଥିଲେ।