ଗାଁ ଗହଳିରେ ସଙ୍କୀର୍ତ୍ତନ କଲେ
ଛୋଟ ପିଲାଠାରୁ ବୟସ୍କ ସଭିଏଁ ସାମିଲ
ତାଳି ବଜାଇ ଜିଲ୍ଲାପାଳଙ୍କ ଧନ୍ୟବାଦ
Sambad is now on WhatsApp
Join and get latest news updates delivered to you via WhatsApp
ଜଗତସିଂହପୁର ଟାଉନ୍ : ଜଗତସିଂହପୁର ଜିଲ୍ଲାରେ ଜନତା କର୍ଫ୍ୟୁକୁ ପୂର୍ଣ୍ଣ ସମର୍ଥନ ମିଳିଛି । ଦିନ ସାରା ଘରେ ରହି ଜନତା କର୍ଫ୍ୟୁକୁ ପାଳନ କରିବା ପରେ ସନ୍ଧ୍ୟାରେ ଧନ୍ୟବାଦ ଦେବାରେ ହେଳା କରି ନାହାନ୍ତି ଜିଲ୍ଲାବାସୀ । ଠିକ୍ ସନ୍ଧ୍ୟା ୫ଟାରେ ହଠାତ୍ ଚାରିଆଡେ ଘଣ୍ଟ, ଘଣ୍ଟା, ବାଜା ଓ ତାଳି ମାଡରେ ପ୍ରକମ୍ପିତ ହୋଇଥିଲା । ଲୋକମାନେ ଘରୁ ବାହାରି ଆସି ହୃଦୟର ସହ ପ୍ରତିକୂଳ ପରିସ୍ଥିତିରେ ସେବା ଯୋଗାଉଥିବା ଯୋଦ୍ଧାଙ୍କୁ ଧନ୍ୟବାଦ ଦେଇଥିଲେ । ଗଣମାଧ୍ୟମର ପ୍ରତିନିଧି, ଡାକ୍ତର, ନର୍ସ, ଅଗ୍ନିଶମ ବିଭାଗ, ପୁଲିସ, ପ୍ରଶାସନର କରୋନା ମୁକାବିଲା ପାଇଁ ଉଦ୍ୟମ କରୁଥିବା ପ୍ରତିଟି ଯୋଦ୍ଧାଙ୍କୁ ଧନ୍ୟବାଦ ପୂର୍ବକ ଏଭଳି ନିଆରା ଢ଼ଙ୍ଗରେ ପାଳନ କରିଥିଲେ ।
ଜିଲ୍ଲାସାରାର ଭିଡ଼ିଓ ଓ ଫଟୋ ସାମାଜିକ ଗଣ ମାଧ୍ୟମରେ ଏକ ସକରାତ୍ମକ ବାର୍ତ୍ତା ଦେଇଛି । ଛୋଟ ପିଲାଙ୍କ ଠାରୁ ଆରମ୍ଭ କରି ବୟସ୍କଙ୍କ ପର୍ଯ୍ୟନ୍ତ ସଭିଏଁ ଏଥିରେ ସାମିଲ ହୋଇଥିଲେ । ଏଥିରେ ଏକ ଗୁରୁତ୍ୱପୂର୍ଣ୍ଣ ଦିଗ ସାମ୍ନାକୁ ଆସିଥିଲା । ତାହା ହେଲା ମା ଶାରଳାଙ୍କ ମନ୍ଦିର ସମେତ ଜିଲ୍ଲା ସମସ୍ତ ମନ୍ଦିର ଗୁଡ଼ିକରେ ଏକ ସଙ୍ଗରେ ଘଣ୍ଟ ବାଜି ଉଠିଥିଲା । ଗାଁ ଗୁଡ଼ିକରେ ମନ୍ଦିରରେ ଏକ ସଙ୍ଗରେ ଆଳତୀ କରାଯାଇ ଘଣ୍ଟ, ଶଙ୍ଖ ବଜା ଯାଇଥିଲା । କିଛି ଗ୍ରାମରେ ସଙ୍କୀର୍ତ୍ତନ କରାଯାଇ ନଗର ପରିକ୍ରମାକ କରାଯାଉଥିବା ଦେଖିବାକୁ ମିଳିଛି । ଯାହା ଏକ ଭଲ ବାର୍ତ୍ତା ଦେଇଛି । ଜିଲ୍ଲାପାଳ ମଧ୍ୟ ଏଥଇରେ ସାମିଲ ହୋଇଥିଲେ ନିଜ ବାସ ଭବନରେ ରହି ତାଳି ମାରି କରୋନା ମୁକାବିଲା କରୁଥିବା ଯୋଦ୍ଧାମାନଙ୍କୁ ଧନ୍ୟବାଦ ଜଣାଇଥିଲେ ।
ବାସ ଭବନରେ ଘଣ୍ଟ ବାଡେଇଲେ ମନ୍ତ୍ରୀ ରଘୁନନ୍ଦନ
ଜଗତସିଂହପୁର ଟାଉନ୍ : ପ୍ରତିକୂଳ ପରିସ୍ଥିତିରେ ସେବା ଯୋଗାଉଥିବା ଯୋଦ୍ଧାଙ୍କୁ ଧନ୍ୟବାଦ ଦେବାରେ ରାଜନେତା ମଧ୍ୟ ସାମିଲ ହୋଇଛନ୍ତି । ବାଲିକୁଦା-ଏରସମା ବିଧାୟକ ତଥା ଜଳସମ୍ପଦ, ସୂଚନା ଓ ଲୋକ ସମ୍ପର୍କ ମନ୍ତ୍ରୀ ରଘୁନନ୍ଦନ ଦାସ ତାଙ୍କ ବାଲିକୁଦା ସ୍ଥିତ ବାସ ଭବନରେ କରୋନା ଯୋଦ୍ଧାଙ୍କୁ ଘଣ୍ଟ ବାଡ଼େଇ ଧନ୍ୟବାଦ ଦେଇଛନ୍ତି । ଏଭଳି ଜରୁରୀ ପରିସ୍ଥିତିରେ ନିଜ ଜୀବନକୁ ବାଜିରେ ଲଗାଇ ଯେଉଁମାନେ ଦେଶରେ କୋଟି କୋଟି ଲୋକଙ୍କ ପାଇଁ କାମ କରୁଛନ୍ତି ସେମାନଙ୍କୁ ଏଭଳି ପ୍ରୟାସ କାମ କରିବାକୁ ଶକ୍ତି ଯୋଗାଇବ ବୋଲି କହିଛନ୍ତି ।
ଚାଳିଶି ଜଣଙ୍କର ସରିଲା କ୍ୱାରେଣ୍ଟାଇନ ସମୟ
ଜଗତସିଂହପୁର ଟାଉନ୍ : ଜଗତସିଂହପୁର ଜିଲ୍ଲାରେ ଆଜି ସୁଧା ଜିଲ୍ଲାରେ ୧୧୪ ଜଣଙ୍କୁ ସନ୍ଦେହରେ ରଖାଯାଇଛି । ସେମାନଙ୍କ ମଧ୍ୟରୁ ୪୦ ଜଣଙ୍କରକ୍ୱାରେଣ୍ଟାଇନ ସମୟ ଶେଷ ହୋଇଛି । ବାକି ୭୪ ଜଣ ଆଇସୋଲେସନରେ ରହିଥିବା ଜିଲ୍ଲାପାଳ ସୂଚନା ଦେଇଛନ୍ତି । ଜିଲ୍ଲାରେ ଏପର୍ଯ୍ୟନ୍ତ କରୋନା ପଜେଟିଭ୍ ରୋଗୀ ନାହାନ୍ତି । ତେବେ ବର୍ତ୍ତମାନ ବାହାର ରାଜ୍ୟରୁ ଅଧଇକାଂଶ ଲୋକ ଟ୍ରେନ୍ ଓ ବସ୍ ଯୋଗେ ଜିଲ୍ଲାକୁ ଆସିଛନ୍ତି । ଯାହାଙ୍କର ସମ୍ପୂର୍ଣ୍ଣ ହିସାବ ଜିଲ୍ଲା ପ୍ରଶାସନ ଗ୍ରହଣ କରି ପାରି ନଥିବା ଅଭିଯୋଗ ହୋଇଛି । କିଛି କିଛି ସ୍ଥାନରେ ଏହାକୁ ନେଇ ଉତ୍ତେଜନା ପ୍ରକାଶ ପାଇଛି । ପଂଚାୟତସ୍ତରରେ କାମ କରୁଥିବା ଜନପ୍ରତିନିଧି ଓ ସ୍ୱାସ୍ଥ୍ୟ କର୍ମୀଙ୍କୁ ବାହାରୁ ଆସୁଥିବା ଲୋକଙ୍କ ବିଷୟରେ ଜଣାଇବାକୁ ପ୍ରଶାସନ ପକ୍ଷରୁ କୁହାଯାଇଛି ।