ଆଉ ନାହାନ୍ତି ବରିଷ୍ଠ ଯାତ୍ରା ହାସ୍ୟ ଅଭିନେତା ରବି ଶତପଥୀ
ଜଗତସିଂହପୁର: ଓଡ଼ିଆ ଯାତ୍ରା ଜଗତର ବରିଷ୍ଠ କଳାକାର ରବି ଶତପଥୀଙ୍କ ଦେହାନ୍ତ ହୋଇଯାଇଛି। ଆଜି ସନ୍ଧ୍ୟା ୭.୪୦ରେ ୬୮ ବର୍ଷ ବୟସରେ ତାଙ୍କର ପରଲୋକ ହୋଇଥିବା ସୂଚନା ମିଳିଛି । ସେ ଦୀର୍ଘ ଦିନ ହେବ କର୍କଟ ରୋଗରେ ଆକ୍ରାନ୍ତ ହୋଇ ଘରେ ଶଯ୍ୟାଶାୟୀ ଥିଲେ।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ରବି ଶତପଥୀ ଜଗତସିଂହପୁର ଜିଲ୍ଲା କୁଜଙ୍ଗ ବ୍ଲକ୍ ଅନ୍ତର୍ଗତ ଅଗପାଳ ପଞ୍ଚାୟତ କଲଦୀପ ଗ୍ରାମରେ ଜନ୍ମଗ୍ରହଣ କରିଥିଲେ। ଏକଦା ଓଡ଼ିଆ ଯାତ୍ରା ଦୁନିଆରେ ଚହଳ ପକାଇଥିବା ‘ଜନତା ଗଣନାଟ୍ୟ’ର ‘ଶାଗୁଣା ବସିଛି ଡେଲା ମେଲେଇ’ ନାଟକରେ ସେ ହାସ୍ୟ ଅଭିନେତା ଥିଲେ। ପଦୁ ମହାନ୍ତି ଚରିତ୍ରରେ ଅଭିନୟ କରି ରବି ଶତପଥି ଦର୍ଶକଙ୍କ ମନ ଜିଣିଥିଲେ।
ସେହିପରି ଗୌରୀ ଗଣନାଟ୍ୟ, କୋଣାର୍କ ଗଣନାନ୍ୟ ଭଳି ଅନେକ ଯାତ୍ରା ଅନୁଷ୍ଠାନରେ ସେ ହାସ୍ୟ ଅଭିନେତା ଭୂମିକାରେ ଦର୍ଶକଙ୍କୁ ହସାଇ ହସାଇ ବେଦମ କରୁଥିଲେ। ଯାତ୍ରା ଜଗତର କମେଡି କିଙ୍ଗ ଭାବେ ପରିଚିତ ରବି ଶତପଥୀଙ୍କ ଅଭିନୀତ ନାଟକ ଯେଉଁ ସ୍ଥାନରେ ପ୍ରଦର୍ଶନ ହୁଏ, ତାଙ୍କ ଅଭିନୟ ଦେଖିବା ପାଇଁ ଦର୍ଶକଙ୍କ ପ୍ରବଳ ଭିଡ଼ ଲାଗେ। ସେ ନିଖୁଣ ଅଭିନୟ କରି ଲୋକଙ୍କ ପ୍ରିୟ ହୋଇପାରିଥିଲେ। ୫୦୦ରୁ ଅଧିକ ଯାତ୍ରା ପେଣ୍ଡାଲରେ ନାଟକ କରି ଅନେକ ପୁରସ୍କାର ପାଇଥିଲେ ସେ। ରବି ଶତପଥୀଙ୍କ ପରଲୋକରେ ଯାତ୍ରା ଜଗତରେ ଏକ ଅପୂରଣୀୟ କ୍ଷତି ହୋଇଛି।