୨୭୨ ସହରରେ ହେବ ଜେଇଇ ମେନ୍ : ପରୀକ୍ଷାର୍ଥୀଙ୍କ ପାଇଁ ପରୀକ୍ଷା କେନ୍ଦ୍ର ତାଲିକା ପ୍ରକାଶ, ଡିସେମ୍ବର ୧୭ରୁ ମିଳିବ ଆଡମିଟ୍ କାର୍ଡ
ଭୁବନେଶ୍ବର : ୨୦୧୯ ଜାନୁଆରି ୬ରୁ ୨୦ ତାରିଖ ପର୍ଯ୍ୟନ୍ତ ଜେଇଇ ମେନ୍-୧ ଅନୁଷ୍ଠିତ ହେବ। ଏଥିପାଇଁ ଆବେଦନ ପ୍ରକ୍ରିୟା ଶେଷ ହୋଇଛି। ଗତ ସେପ୍ଟେମ୍ବର ୧ରୁ ୩୦ ମଧ୍ୟରେ ଛାତ୍ରଛାତ୍ରୀ ଅନ୍ଲାଇନ୍ରେ ନାମ ପଞ୍ଜିକରଣ କରିସାରିଥିବା ବେଳେ ଏବେ ପରୀକ୍ଷା ପରିଚାଳନା କରୁଥିବା ନ୍ୟାସନାଲ ଟେଷ୍ଟିଂ ଏଜେନ୍ସି(ଏନ୍ଟିଏ) ପକ୍ଷରୁ ଛାତ୍ରଛାତ୍ରୀଙ୍କୁ ପରୀକ୍ଷା କେନ୍ଦ୍ର, ତାରିଖ ଓ ପରୀକ୍ଷା ସିଫ୍ଟ ସମ୍ପର୍କରେ ଅବଗତ କରାଯାଇଛି। ଛାତ୍ରଛାତ୍ରୀ ‘jeemain.nic.in’ ମାଧ୍ୟମରେ ସମ୍ପୂର୍ଣ୍ଣ ତଥ୍ୟ ପାଇପାରିବେ। ଡିସେମ୍ବର ୧୭ରୁ ପରୀକ୍ଷାର୍ଥୀମାନେ ୱେବସାଇଟ୍ରୁ ଆଡମିଟ୍ କାର୍ଡ ଡାଉନ୍ଲୋଡ୍ କରିପାରିବେ। ଜାନୁଆରି ୩୧ରେ ରେଜଲ୍ଟ ବାହାରିବ।
Sambad is now on WhatsApp
Join and get latest news updates delivered to you via WhatsApp
ପରୀକ୍ଷାର୍ଥୀଙ୍କ ନିକଟକୁ କୌଣସି ପ୍ରକାର ଏସ୍ଏମ୍ଏସ୍ ଓ ଇ-ମେଲ୍ ମାଧ୍ୟମରେ ସୂଚନା ପ୍ରଦାନ କରାଯିବ ନାହିଁ। ଛାତ୍ରଛାତ୍ରୀ ‘jeemain.nic.in’ ୱେବସାଇଟ୍କୁ ନିୟମିତ ବ୍ୟବଧାନରେ ଯାଞ୍ଚ କରିବାକୁ ପରାମର୍ଶ ଦିଆଯାଇଛି। ପେପର୍-୧ ପରୀକ୍ଷା କମ୍ପ୍ୟୁଟର ବେସ୍ଡ େଟଷ୍ଟ(ସିବିଟି) ହେବାକୁ ଥିବା ବେଳେ ପେପର୍-୨ର ମ୍ୟାଥମେଟିକ୍ସ-ପାର୍ଟ-୧ ଓ ଆପ୍ଟିଚ୍ୟୁଡ ଟେଷ୍ଟ ପାର୍ଟ-୨ କେବଳ ସିବିଟି ମୋଡ୍ରେ କରାଯିବ। ଡ୍ରଇଂ ଟେଷ୍ଟ-ପେପର ୩ ପରୀକ୍ଷା ପେନ୍ ଓ ପେପର୍ରେ ଦେବେ ବୋଲି ଏନ୍ଟିଏ ପକ୍ଷରୁ ସୂଚନା ଦିଆଯାଇଛି। ପରୀକ୍ଷାର ସମୟ ଅବଧି ୩ ଘଣ୍ଟା ରଖାଯାଇଛି। ଏହାର ଦୁଇ ଘଣ୍ଟା ପୂର୍ବରୁ ପରୀକ୍ଷାର୍ଥୀଙ୍କୁ କେନ୍ଦ୍ର ଭିତରକୁ ଛଡ଼ାଯିବ। ପରୀକ୍ଷାର ଘଣ୍ଟାଏ ପୂର୍ବରୁ ପରୀକ୍ଷାର୍ଥୀଙ୍କୁ ପରୀକ୍ଷା କେନ୍ଦ୍ର ଓ ଅଧଘଣ୍ଟା ପୂର୍ବରୁ ହଲ୍ ଭିତରକୁ ଆଉ ଛଡ଼ାଯିବ ନାହିଁ। ଜେଇଇ ମେନ୍ ପାଇଁ ଦେଶ ଭିତରେ ଓ ବାହାରେ ୨୭୨ଟି ସହରରେ ପରୀକ୍ଷା କେନ୍ଦ୍ର କରାଯାଇଛି। ଦେଶ ଭିତରେ ୨୬୩ଟି ସହରରେ ପରୀକ୍ଷା କେନ୍ଦ୍ର ହୋଇଥିବା ବେଳେ ଦେଶ ବାହାରେ ବାହାରିନ୍, କଲମ୍ବୋ, ଦୋହା, ଦୁବାଇ, କାଠମାଣ୍ଡୁ, ମୁସକାଟ୍, ରିହାଦ୍, ସାରଜା ଓ ସିଙ୍ଗାପୁର ସହରରେ ପରୀକ୍ଷା କେନ୍ଦ୍ର କରାଯିବ। ମହାରାଷ୍ଟ୍ରରେ ସର୍ବାଧିକ ୩୧ଟି ସହରରେ ପରୀକ୍ଷା କେନ୍ଦ୍ର ହେବ। ଓଡ଼ିଶାର ୯ଟି ସହର ଯଥା-ଅନୁଗୁଳ, ବାଲେଶ୍ବର, ବ୍ରହ୍ମପୁର, ଭୁବନେଶ୍ବର, କଟକ, ଢ଼େଙ୍କାନାଳ, ଜୟପୁର, ରାଉରକେଲା, ସମ୍ବଲପୁରରେ ପରୀକ୍ଷା କେନ୍ଦ୍ର ହେବ।
ସୂଚନାଯୋଗ୍ୟ ଏପ୍ରିଲ ୬ରୁ ୨୦ ପର୍ଯ୍ୟନ୍ତ ଜେଇଇ ମେନ୍-୨ ଅନୁଷ୍ଠିତ ହେବ। ଏଥିପାଇଁ ଫେବ୍ରୁଆରି ୮ରୁ ମାର୍ଚ୍ଚ ୭ ମଧ୍ୟରେ ଛାତ୍ରଛାତ୍ରୀ ନାମ ପଞ୍ଜିକରଣ କରିପାରିବେ। ମାର୍ଚ୍ଚ ୧୮ରୁ ଆଡମିଟ୍ କାର୍ଡ ଡାଉନ୍ଲୋଡ କରିହେବ। ଏପ୍ରିଲ ୩୦ରେ ପରୀକ୍ଷା ଫଳ ବାହାରିବ।