କଳାହାଣ୍ଡିର କରୋନା ଆକ୍ରାନ୍ତଙ୍କ ଯାତ୍ରା ଇତିହାସ ଜାଣନ୍ତୁ, ବାହାରେନରୁ ବେହେରାଗୁଡ଼ା
ଦିଲ୍ଲୀରୁ ହାଇଦ୍ରାବାଦ ଦେଇ ବିଶାଖାପାଟଣାରେ ପହଞ୍ଚିଥିଲେ, ରାୟଗଡ଼ା ଓ କେଶିଙ୍ଗା ଦେଇ ଗାଁକୁ ପହଞ୍ଚିଲେ
ଭୁବନେଶ୍ୱର: ରାଜ୍ୟ ସରକାର ୨୦ ନମ୍ବର କରୋନା ଆକ୍ରାନ୍ତଙ୍କ ଯାତ୍ରା ଇତିହାସ ବିବରଣୀ ପ୍ରଦାନ କରିଛନ୍ତି । କଳାହାଣ୍ଡି ଜିଲ୍ଲାର ଗୋଲାମୁଣ୍ଡା ବ୍ଲକର ୨୯ ବର୍ଷିଅ ଯୁବକ ବାହାରିନରୁ ଏୟାର ଇଣ୍ଡିଆର ବିମାନ (ଏଆଇ୯୪୦)ର ୭-ବି ନମ୍ବର ସିଟରେ ବସି ଦିଲ୍ଲୀ ଆସିଥିଲେ । ଏହା ଥିଲା ମାର୍ଚ୍ଚ ୧୭ର ଘଟଣା । ସେଠାରୁ ସେ ମାର୍ଚ୍ଚ ୧୮ରେ ଅନ୍ୟ ଏକ ଏୟାର ଇଣ୍ଡିଆର ବିମାନ (ଏଆଇ ୫୬୦)ର ୨୦-ବି ସିଟରେ ବସି ହାଇଦ୍ରାବାଦ ଯାଇଥିଲେ । ସେଦିନ ସେ ହାଇଦ୍ରାବାଦ ବିମାନବନ୍ଦରରୁ ସିଟି ବସର ୧୫ ନମ୍ବର ସିଟରେ ବସଷ୍ଟାଣ୍ଡ ଯାଇଥିଲେ ।
Sambad is now on WhatsApp
Join and get latest news updates delivered to you via WhatsApp
ବାହାରିନର ଏକ କମ୍ପାନିରେ ଫିଟର ଭାବେ କାର୍ଯ୍ୟରତ ଯୁବକ ମାର୍ଚ୍ଚ ୧୮ ଅପରାହ୍ନ ୩ଟାରୁ ୬ଟା ମଧ୍ୟରେ ହାଇଦ୍ରାବାଦରୁ ବିଶାଖାପାଟଣାରେ ପହଞ୍ଚିଥିଲେ । ରାତି ୮ଟାରେ ସେ ଏକ ଢବାରେ ଖାଇଥିଲେ । ମାର୍ଚ୍ଚ ୧୯ରେ ସେ ଆନ୍ଧ୍ରପ୍ରଦେଶର ଗୁଣ୍ଟୁର ରେଳଷ୍ଟେସନରୁ ଗୁଣ୍ଟୁର-ରାୟଗଡ଼ା ଏକ୍ସପ୍ରେସର କୋଚ ଏସ-୬ (ସିଟ-୫)ରେ ରାୟଗଡ଼ା ଆସିଥିଲେ । ସେ ଝରକା କଡ଼ରେ ଥିବା ସିଟରେ ବସିଥିଲେ । ସେ ସେଦିନ ଝରକା କଡ଼ର ସିଟରେ ବସି ରାୟଗଡ଼ାରୁ କେସିଙ୍ଗା ତପସ୍ପିନୀ ଏକ୍ସପ୍ରେସରେ ଆସିଥିଲେ ।
ମାର୍ଚ୍ଚ ୧୯ ତାରିଖ ଦିନ ଯୁବକ ଜଣକ କେସିଙ୍ଗା ଟ୍ୟାକ୍ସିଷ୍ଟାଣ୍ଡ ଠାରୁ ବେହେରାଗୁଡ଼ା ଏକ ରିଜର୍ଭ ବୋଲେରୋ ଯାଇଥିଲେ । ସେହିଦିନ ଠାରୁ ସେ ହୋମ କ୍ୱାରେଣ୍ଟାଇନରେ ଥିଲେ । ତାଙ୍କର ନମୁନା ଏପ୍ରିଲ ୪ରେ ପଜିଟିଭ ଚିହ୍ନଟ ହୋଇଥିଲା । ଶେଷରେ ତାଙ୍କୁ ଏପ୍ରିଲ ୫ରେ କଟକସ୍ଥିତ ଅଶ୍ୱିନୀ ହସ୍ପିଟାଲରେ ଭର୍ତ୍ତି କରାଯାଇଥିଲା ।