ଆଇପିଏଲ ସଟା ବେଟିଂ ଜାଲରେ କଳାହାଣ୍ଡି : ଦିନକୁ କୋଟି କୋଟି ଟଙ୍କାର ଖେଳ, କରୋଡ଼ପତି ନିଶାରେ ହେଉଛନ୍ତି ସର୍ବସ୍ୱାନ୍ତ
ଏହି ରାକେଟ ଚେର କଳାହାଣ୍ଡିରୁ ଟିଟିଲାଗଡ଼ ଓ ରାୟପୁରକୁ ଲମ୍ବିଛି
ଭବାନୀପାଟଣା : କଳାହାଣ୍ଡି ଜିଲ୍ଲାରେ ଆଇପିଏଲ ସଟା ବେଟିଂ ଜାଲରେ ଲୋକେ ଏବେ ଉବୁଟୁବୁ ହେଉଥିବା ଦେଖିବାକୁ ମିଳିଛି । ରାତାରାତି କରୋଡ଼ପତି ହେବା ନିଶାରେ ଲୋକେ ସର୍ବସ୍ୱାନ୍ତ ହେଉଛନ୍ତି । ଆଇପିଏଲ ଯୋଗୁଁ ଲୋକେ ଘରଦ୍ୱାର ଜମିବାଡ଼ି ବିକ୍ରି କରିଦେଉଥିବା ନଜରକୁ ଆସୁଛି । ଏହି ରାକେଟ ଚେର କଳାହାଣ୍ଡିରୁ ଟିଟିଲାଗଡ଼ ଓ ରାୟପୁରକୁ ଲମ୍ବିବା ଘଟଣା ସାଧାରଣରେ ଉଦବେଗର ବିଷୟ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ପ୍ରାପ୍ତ ସୂଚନାରୁ ପ୍ରକାଶ ଯେ, କଳାହାଣ୍ଡି ଜିଲ୍ଲାର ଭବାନୀପାଟଣା, ଜୁନାଗଡ଼, ଧର୍ମଗଡ଼, ଜୟପାଟଣା, କେସିଙ୍ଗା, କଲମପୁର, କୋକସରା ସମେତ ବିଭିନ୍ନ ସହରରେ ପ୍ରତିଦିନ ଆଇପିଏଲ କ୍ରିକେଟ ବେଟିଂ ଦେଖିବାକୁ ମିଳୁଛି । ଆଇପିଏଲର ଦୁଇ ପ୍ରତିପକ୍ଷ ଟିମରେ କିଏ ଜିତିବ, କିଏ ହାରିବ ସେନେଇ ଟଙ୍କା ଲଗାଯାଉଛି । ସେହିଭଳି ପ୍ରତି ଓଭର, ଛକା, ଉଇକେଟ, କ୍ୟାଚ, ଦଳଗତ ରନ ସ୍କୋର, ବ୍ୟାଟ୍ସମ୍ୟାନଙ୍କ ବ୍ୟକ୍ତିଗତ ରନ ସ୍କୋରରେ ଲୋକେ ଟଙ୍କା ଲଗାଉଛନ୍ତି । ଯଦି ଯେଉଁ ଟିମରେ ଟଙ୍କା ଲଗାଉଛନ୍ତି ସେହି ଟିମ ଜିତିବ ତାହେଲେ ଟଙ୍କା ୨ ରୁ ୮୦ ଗୁଣା ଟଙ୍କା ମିଳିବ । ଯଦି ଯେଉଁ ଟିମ ବିପକ୍ଷରେ ଟଙ୍କା ଲଗାଯାଇଥିବ ସେହି ଟିମ ହାରେ ତାହେଲେ ସର୍ବସ୍ୱାନ୍ତ ହେବା ସୁନିଶ୍ଚିତ । ଏଭଳି ଭାବରେ ଲୋକେ ରାତାରାତି କରୋଡ଼ପତି ହେବା ନିଶାରେ ଆଇପିଏଲ ବେଟିଂ ରେ ଟଙ୍କା ଲଗେଇ ଦେଉଛନ୍ତି । ବର୍ତ୍ତମାନ ଛୋଟ ଛୋଟ ବୁକି ମାନେ ଲକ୍ଷ ଲକ୍ଷ ଟଙ୍କାର ଖେଳ କରୁଥିବା ବେଳେ ଏହି ବେଟିଂ ଟିଟିଲାଗଡ଼ ଓ ରାୟପୁରରୁ କଣ୍ଟ୍ରୋଲ ହେଉଛି । ଫୋନ ମାଧ୍ୟମରେ ଏହି ଖେଳ ଚାଲୁଥିବା ବେଳେ ପୁଲିସ ମଧ୍ୟ ଏହାର ସୁରାକ ପାଇପାରୁନାହିଁ । ଜିଲ୍ଲାର ମହିଳାମାନେ ମଧ୍ୟ ଏହି ଖେଳରେ ବେଟିଂ ଲଗାଉଥିବା ଅଭିଯୋଗ ହୋଇଛି । ଗତବର୍ଷ ଜୁନାଗଡ଼ ସହରର ଜଣେ ଯୁବକ ୫ କୋଟି ଟଙ୍କାର ବେଟିଂ ଲଗେଇଥିଲେ । ହାରିଯିବା ପରେ ସେ ବାହାର ରାଜ୍ୟକୁ ଚାଲିଯାଇଥିଲେ । ତାଙ୍କୁ ପରେ ପରିବାର ଲୋକେ କୋଲକତାରେ ଠାଵ କରିଥିଲେ।
କଳାହାଣ୍ଡି ଜିଲ୍ଲାର ଜୁନାଗଡ଼ ଠାରୁ ଆଇପିଏଲ ସଟା କଣ୍ଟ୍ରୋଲ ହେଉଥିବା ବେଳେ ଭବାନୀପାଟଣା, କେସିଙ୍ଗା, ଟିଟିଲାଗଡ଼, କଣ୍ଟାବାଞ୍ଜି, ରାୟପୁର ନେଟୱାର୍କ ଦେଇ ନିଜର ବେଟିଂ ସାମ୍ରାଜ୍ୟକୁ ବିସ୍ତାର କରିବାରେ ଲାଗିଛନ୍ତି । ଏହି ବେଟିଂରେ ଧନୀ ଯୁବକ ଶ୍ରେଣୀର ଲୋକେ ଅଧିକ ଲାଭ ଆଶାରେ ଆର୍ଥକୁ ଜୁଆ ଖେଳୁଛନ୍ତି । ଏହି ଆଇପିଏଲ ବେଟିଂ ଯୋଗୁଁ ବହୁ ଯୁବକ ପଥଭ୍ରଷ୍ଟ ହେବାରେ ଲାଗିଛନ୍ତି । ଏନେଇ ପୁଲିସ ପ୍ରଶାସନ ଏକ ବ୍ଲୁପ୍ରିଣ୍ଟ ପ୍ରସ୍ତୁତ କରି ଚଢଉ କଲେ ଏହି କଳାକାରାନାମା ରାକେଟର ପର୍ଦାଫାସ ହୋଇପାରନ୍ତା ବୋଲି ସାଧାରଣରେ ଦାବୀ ହୋଇଛି । ଏନେଇ କଳାହାଣ୍ଡି ପୁଲିସ ଏସପି ବାତୁଲା ଗଙ୍ଗାଧରଙ୍କୁ ପଚାରିବାରୁ ଏନେଇ ଆମେ ନଜର ରଖିଛୁ ବୋଲି କହିଥିଲେ ।