କଳାହାଣ୍ଡି ଜିଲ୍ଲାରେ ଧାନମଣ୍ଡି ଟ୍ୟାଗିଙ୍ଗ ଓ ଟାର୍ଗେଟ ନେଇ ଫିକ୍ସିଂ ଅଭିଯୋଗ
ମଣ୍ଡି ଠିକ ଭାବରେ ଆରମ୍ଭ ହୋଇନି ଅଥଚ ମିଲର୍ସଙ୍କ ଟାର୍ଗେଟ ନାହିଁ
ଭବାନୀପାଟଣା : କଳାହାଣ୍ଡି ଜିଲ୍ଲାରେ ରବି ଧାନ କିଣାରେ ବିଭିନ୍ନ ମଣ୍ଡିରେ ମିଲର୍ସ ମାନଙ୍କ ଟ୍ୟାଗିଙ୍ଗ ଓ ଟାର୍ଗେଟ ନେଇ ବ୍ୟାପକ ଫିକର ହୋଇଥିବା ଅଭିଯୋଗ ହୋଇଛି । ମଣ୍ଡି ଠିକ ଭାବରେ ଆରମ୍ଭ ହୋଇନଥିବା ବେଳେ ଜୁନାଗଡ଼ ବ୍ଲକର ନାନ୍ଦୋଳ ଓ ଆନ୍ତର୍ଲା ମଣ୍ଡିରେ ଦୁଇଜଣ ମିଲର୍ସଙ୍କ ଟାର୍ଗେଟ ଶେଷ ହେବା ଘଟଣା ଚାଷୀ ମହଲରେ ଉଦବେଗ ପ୍ରକାଶ ପାଇଛି ।
Sambad is now on WhatsApp
Join and get latest news updates delivered to you via WhatsApp
ପ୍ରାପ୍ତ ସୂଚନାରୁ ପ୍ରକାଶ ଯେ, କଳାହାଣ୍ଡି ଜିଲ୍ଲାରେ ଚଳିତ ରବି ମଣ୍ଡିରେ ୧୬ ଲକ୍ଷ ୨୩ ହଜାର ୫୦୦ କୁଇଣ୍ଟାଲ ଧାନ କିଣିବା ପାଇଁ ଟାର୍ଗେଟ ରହିଛି । ୨୪ ଲକ୍ଷ ୮୭ ହଜାର ୮୪୪ କୁଇଣ୍ଟାଲ ୬୮ କେଜି ଧାନ ବିକ୍ରି ପାଇଁ ଚାଷୀଙ୍କୁ ଟୋକନ ପ୍ରଦାନ କରାଯାଇଛି । ଜିଲ୍ଲାର ୧୩୩ଟି ମଣ୍ଡିରୁ ମାତ୍ର ୭୧ ଟି ମଣ୍ଡିରେ ଧାନ କିଣା ଆରମ୍ଭ ହୋଇଛି । ୬୦ ଜଣ ମିଲର୍ସଙ୍କ ମଧ୍ୟରୁ ମାତ୍ର ୫୪ ଜଣ ମିଲର୍ସ ମଣ୍ଡିରେ ଧାନ କିଣିଛନ୍ତି । ମିଲର୍ସ ମାନଙ୍କୁ ମଣ୍ଡିରେ ନିଜ ମନମୁତାବକ ଟ୍ୟାଗିଙ୍ଗ ଏବଂ ଟାର୍ଗେଟ ପ୍ରଦାନ ନେଇ ଜିଲ୍ଲା ଯୋଗାଣ ବିଭାଗରେ ଏକ ବଡ଼ ଧରଣର କିକବ୍ୟାକ ହୋଇଥିବା ଅଭିଯୋଗ ହୋଇଛି । ଜୁନାଗଡ଼ ବ୍ଲକର ନାନ୍ଦୋଳ ମଣ୍ଡିରେ ୨ ଟି ମିଲର୍ସ ଓ ଆନ୍ତର୍ଲା ମଣ୍ଡିରେ ୨ଟି ମିଲର୍ସ ଧାନ କିଣିବା ପାଇଁ ଟାର୍ଗେଟ ପ୍ରଦାନ କରାଯାଇଥିଲା । ବର୍ତ୍ତମାନ ଏହି ୨ ଟି ମଣ୍ଡିର ୨ଟି ମିଲର୍ସଙ୍କ ଟାର୍ଗେଟ ଶେଷ ହୋଇଛି । ଫଳରେ ମାତ୍ର ଜଣେ ମିଲର୍ସ ଏହି ମଣ୍ଡିରେ ଧାନ କିଣୁଥିବା ଯୋଗୁଁ ଚାଷୀମାନେ ବ୍ୟାପକ କଟନୀଛଟନୀ ର ଶିକାର ହେଉଛନ୍ତି । ଧର୍ମଗଡ଼ ବ୍ଲକର ତରାପୁର ମଣ୍ଡିରେ ୧୦୯ ଜଣ ଚାଷୀଙ୍କ ଟୋକନ ଆସି ନଥିଲା । ଚାଷୀ ମାନଙ୍କ ହୋହହ୍ଲା ପରେ ମାତ୍ର ୫୭ ଜଣ ଚାଷୀଙ୍କ ଟୋକନ ଆସିଛି । ଅନ୍ୟ ଚାଷୀମାନଙ୍କ ଟୋକନ ରିପୋର୍ଟ ଲେଖା ହେଲା ପର୍ଯ୍ୟନ୍ତ ଆସି ନ ଥିଲା ।
କଳାହାଣ୍ଡି ଜିଲ୍ଲାର ଉଠା ଜଳସେଚନ ଅଞ୍ଚଳର ଚାଷୀ ମାନଙ୍କ ଟୋକନ ଏଯାଏଁ ପହଞ୍ଚି ନାହିଁ । ଗତ କିଛି ଦିନ ତଳେ ମିନଗୁର ଉଠା ଜଳସେଚନ ଅଞ୍ଚଳର ଚାଷୀମାନେ ଜିଲ୍ଲା ଯୋଗାଣ ଅଧିକାରୀଙ୍କୁ ଭେଟି ଦାବିପତ୍ର ପ୍ରଦାନ କରିଥିଲେ । ଗୋଟିଏ ପଟେ ଚାଷୀଙ୍କୁ ଟୋକନ ମିଳି ପାରିନଥିବା ବେଳେ ମାତ୍ର ଆହୁରି ୫୬ଟି ମଣ୍ଡି ଏପର୍ଯ୍ୟନ୍ତ ଆରମ୍ଭ ହୋଇନାହଁ । ମଣ୍ଡି ଆରମ୍ଭ ନ ହେବା ପୂର୍ବରୁ ମିଲର୍ସ ମାନଙ୍କ ଟାର୍ଗେଟ ଶେଷ ହେବା ଘଟଣା ତଦନ୍ତ ସାପେକ୍ଷ ଅଟେ । ମିଲର୍ସ ମାନଙ୍କ ଧାନ ଉଠାଣ ଓ ଚାଉଳ ଡେଲିଭରି ପରିମାଣକୁ ଆଧାର କରି ଟାର୍ଗେଟ ପ୍ରଦାନ କରାଯାଇଥାଏ । କିନ୍ତୁ କଳାହାଣ୍ଡି ଯୋଗାଣ ବିଭାଗରେ ଏହାର ବ୍ୟତିକ୍ରମ ଦେଖା ଦେଇଛି । ମୋଟା ରକମର ହାତ ଗୁଂଜା ନେଇ ବିଭାଗୀୟ ଅଧିକାରୀ ଓ କର୍ମଚାରୀମାନେ ଜିଲ୍ଲା ପ୍ରଶାସନକୁ ଅନ୍ଧାରରେ ରଖି ବ୍ୟାପକ ଫିକ୍ସିଂ ହୋଇଥିବା ଅଭିଯୋଗ ହୋଇଛି । ଏହାର ଏକ ଭିଜିଲାନ୍ସ ତଦନ୍ତ କରାଗଲେ ଦୁର୍ନୀତିର ଗୁମର ଖୋଲି ପାରନ୍ତା ବୋଲି ଚାଷୀ ମହଲରେ ଦାବୀ ହୋଇଛି । ଏନେଇ ଜିଲ୍ଲା ଯୋଗାଣ ଅଧିକାରୀ ରତ୍ନକର ସେଠୀ ଙ୍କୁ ପଚାରିବାରୁ ଦୁଇ ଉପଖଣ୍ଡର ଉପଜିଲ୍ଲାପାଳ ମାନଙ୍କ ସୁପାରିଶ କ୍ରମେ ମଣ୍ଡି ଟ୍ୟାଗିଙ୍ଗ ଓ ଟାର୍ଗେଟ ପ୍ରଦାନ କରାଯାଇଛି ବୋଲି କହିଥିଲେ ।