କଳାହାଣ୍ଡି ମୋର ଦ୍ୱିତୀୟ ଜନ୍ମଭୂମି : ପ୍ରଦୀପ ଜେନା

ଭବାନୀପାଟଣା: ଢେଙ୍କାନାଳ ମୋର ଜନ୍ମଭୂମି ହୋଇଥିବା ବେଳେ କଳାହାଣ୍ଡି ମୋର ଦ୍ୱିତୀୟ ଜନ୍ମଭୂମି ଅଟେ। ୧୯୯୬ ମସିହାରେ କଳାହାଣ୍ଡି ଜିଲ୍ଲାପାଳ  ଦାୟିତ୍ୱ ନେବା ବେଳେ ସେହିବର୍ଷ ଜିଲ୍ଲା ମରୁଡ଼ିର ଶିକାର ହୋଇଥିଲା। ୧୯୯୭ ମସିହାରେ ପ୍ରଥମ କଳାହାଣ୍ଡି ଉତ୍ସବ ଆରମ୍ଭ ବେଳେ ଏହାକୁ କିଛିଲୋକ ବିରୋଧ କରିଥିଲେ। କଳାହାଣ୍ଡିର ସ୍ୱାଭିମାନକୁ ବିଶ୍ଵ ଦରବାରରେ ପ୍ରଦର୍ଶନ କରିବାର ସମୟ ଆସିଛି। ୧୮୬୬ ମସିହାରେ ବଙ୍ଗଳା ଦୁର୍ଭିକ୍ଷ ବେଳେ କଳାହାଣ୍ଡିରୁ ଚାଉଳ ପଠାଯାଇଥିଲା। କଳାହାଣ୍ଡିର ମେରୁ ମାଝୀଠାରୁ ମୁଁ ସ୍ୱାଭିମାନ ଶିଖିଛି। ବର୍ତ୍ତମାନ କଳାହାଣ୍ଡିର ହକ୍‌ ମାଗିବାର ସମୟ ଆସିଛି ବୋଲି ତୃତୀୟ ସନ୍ଧ୍ୟାରେ ମୁଖ୍ୟ ଅତିଥି ଭାବେ ଅତିରିକ୍ତ ଶାସନ ସଚିବ ତଥା ଉନ୍ନୟନ କମିସନର ଏବଂ ରାଜ୍ୟ ଯୋଜନା ଓ ସମନ୍ୱୟ ବିଭାଗର ସଚିବ ପ୍ରଦୀପ ଜେନା ଯୋଗଦେଇ ନିଜର କଳ୍ପନାପ୍ରସୂତ କଳାହାଣ୍ଡି ଉତ୍ସବର ଗୌରବମୟ ଅତୀତକୁ ମନେ ପକାଇ ଭାବବିହ୍ୱଳ ହୋଇ ଉଠିଥିଲେ।

ଏହି ଅବସରରେ ସମ୍ମାନିତ ଅତିଥି ଭାବେ କୃଷି ଓ କୃଷକ ସଶକ୍ତୀକରଣ ବିଭାଗର ପ୍ରମୁଖ ସଚିବ ଡ. ଅରବିନ୍ଦ ପାଢ଼ୀ ଯୋଗଦେଇ ଗୁଡ଼ହାଣ୍ଡି, ଦଣ୍ଡପାଟ, ଡଙ୍ଗରିଆମାନଙ୍କ ନିୟମଗିରି, ତେଲ, ହାତୀ, ଉଦନ୍ତୀଠାରୁ ଆରମ୍ଭ କରି ବିଭିନ୍ନ ନଦୀ କଳାହାଣ୍ଡିକୁ ଆହୁରି ଗରିୟାନ କରିଛନ୍ତି ବୋଲି କହିଥିଲେ। କଳାହାଣ୍ଡି ଜିଲ୍ଲାପାଳ ପି. ଅନ୍ୱେଷା ରେଡ୍ଡୀ ପ୍ରାରମ୍ଭିକ ସୂଚନା ଦେଇ କଳାହାଣ୍ଡି ଉତ୍ସବକୁ ପୂର୍ବ ଜିଲ୍ଲାପାଳ ପ୍ରଦୀପ ଜେନା ଆରମ୍ଭ କରିଥିଲେ। ତାଙ୍କର ପ୍ରୟାସ ଯୋଗୁଁ ଆମେ ଆଜି ରଜତ ଜୟନ୍ତୀ ପାଳନ କରିଛୁ ବୋଲି କହିଥିଲେ। କଳାହାଣ୍ଡି ବିଶ୍ୱବିଦ୍ୟାଳୟର କୁଳପତି ପ୍ରଫେସର ଡ. ସଞ୍ଜୟ ଶତପଥୀ, ଜିଲ୍ଲା ନ୍ୟାୟାଧୀଶ ଦୀପ୍ତିରଞ୍ଜନ କାନୁନଗୋ, କଳାହାଣ୍ଡି ଏସ୍‌ପି ଅଭିଳାଷ ଜୀ, ଜିଲ୍ଲା ପରିଷଦ ମୁଖ୍ୟ ନିର୍ବାହୀ ଅଧିକାରୀ ସଚିନ ପାୱାର, ଧର୍ମଗଡ଼ ଉପଜିଲ୍ଲାପାଳ ବେଦଭୂଷଣ, ସିଆର୍‌ପିଏଫ୍ ୬୪ ବାଟାଲିୟନର ଦୁର୍ଗପତି ପଙ୍କଜ ଚୌଧୁରୀ, ଆଞ୍ଚଳିକ ମୁଖ୍ୟ ବନସଂରକ୍ଷକ ଅଶ୍ୱିନୀ କର, ଦକ୍ଷିଣ ବନଖଣ୍ଡ ଅଧିକାରୀ ଲାଡେ ଗଜାନନ ଦୟାନନ୍ଦ ପ୍ରମୁଖ ଯୋଗ ଦେଇଥିଲେ।

କଳାହାଣ୍ଡି ଜିଲ୍ଲାପାଳ ପି. ଅନ୍ୱେଷା ରେଡ୍ଡୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କାର୍ଯ୍ୟକ୍ରମରେ ଜିଲ୍ଲା ପରିଷଦ ମୁଖ୍ୟ ନିର୍ବାହୀ ଅଧିକାରୀ ସଚିନ ପାୱାର, ଅତିରିକ୍ତ ଜିଲ୍ଲାପାଳ ସୁଶାନ୍ତ ପଟେଲ, ଭବାନୀପାଟଣା ଉପଜିଲ୍ଲାପାଳ ଡ. ବିଶ୍ୱଜିତ ଦାସ, ଜିଲ୍ଲା ସଂସ୍କୃତି ଅଧିକାରୀ ଅର୍ପିତା ବେହେରା, ଜିଲ୍ଲା ସୂଚନା ଓ ଲୋକସଂପର୍କ ଅଧିକାରୀ ମନୋଜ ବେହେରା, ଭବାନୀପାଟଣା ପୌରାଧ୍ୟକ୍ଷା ସଂଯୁକ୍ତା ବେହେରା ପ୍ରମୁଖ ଉପସ୍ଥିତଥିଲେ। ସୁରସଙ୍ଗୀତ ଅନୁଷ୍ଠାନ ଦ୍ୱାରା ପ୍ରାରମ୍ଭିକ ସଙ୍ଗୀତ ଗାନ କରାଯାଇଥିଲା। ସତ୍ୟ ନାରାୟଣ ମହାପାତ୍ର ସଭା ପରିଚାଳନା କରିଥିଲେ। ଏଇ ଅବସରରେ ଜିଲ୍ଲାର ବିଭିନ୍ନ କ୍ଷେତ୍ରରେ ପ୍ରତିଷ୍ଠିତ ବ୍ୟକ୍ତିବିଶେଷଙ୍କୁ ସମ୍ମାନିତ କରାଯାଇଥିଲା। ଏହାପରେ ଅନୁଷ୍ଠିତ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମରେ ଲୋକଗୀତ, ଥୁଆମୂଳ ରାମପୁର ବ୍ଲକ ପୁରୁଣାଗୁମା ଶୁଭମ ଅନୁଷ୍ଠାନର ଘୁମୁରା, ଭବାନୀପାଟଣା ଜେଜେ ସ୍କୁଲ ଅଫ୍ ଡ୍ୟାନ୍ସ, ନୃତ୍ୟାଙ୍ଗନା, ଟ୍ରାଇବାଲ ଡ୍ୟାନ୍ସ ଏକାଡେମୀ, ରେଣ୍ଡୋ ମାଝୀ ସାଂସ୍କୃତିକ ଅନୁଷ୍ଠାନ, ନୃତ୍ୟକଳା ଅନୁଷ୍ଠାନ, ସକ୍ଷମ ଅନୁଷ୍ଠାନର ଓଡ଼ିଶୀ, ବିକାଶ, ସୁହାଗପୁରର ମା ଡୋକରୀ ଅନୁଷ୍ଠାନର ବଜାଶାଲ, ଭୁବନେଶ୍ୱର ନଟରାଜ ଅନୁଷ୍ଠାନର ମୟୂରୀ ନୃତ୍ୟ, ବରଗଡ଼ ଜିଲ୍ଲା ସଂସ୍କୃତି ପରିଷଦ, ବଲାଙ୍ଗୀର ଢୋଲ ମହୁରି କଳା ପରିଷଦ ଅନୁଷ୍ଠାନ, ନବରଙ୍ଗପୁର ଜିଲ୍ଲା ସଂସ୍କୃତି ପରିଷଦ, କୋରାପୁଟର ଢେମସା, ଖୋର୍ଦ୍ଧାର ପାଇକ ଆଖଡ଼ା, ଭଦ୍ରକର ଲୋକକଳା ସମେତ ରାଜ୍ୟ ବାହାରର ଲୋକକଳା ମଧ୍ୟରେ ଆସାମର ବିହୁ, ଝାଡ଼ଖଣ୍ଡର ପାଇକିଆ ନୃତ୍ୟ ଆଦି ପ୍ରଦର୍ଶିତ ହୋଇଥିଲା।

ସେହିପରି ପାରବା ମଞ୍ଚରେ ସ୍ଥାନୀୟ କଳାକାର, ରାଜ୍ୟ ଓ ରାଜ୍ୟ ବାହାର କଳାକାରମାନେ ସେମାନଙ୍କ କଳା ପ୍ରଦର୍ଶନ କରିଥିଲେ। ସହିଦ ରେଣ୍ଡୋ ମାଝୀ ମଞ୍ଚରେ ଶୁଭେନ୍ଦୁ ମହାପାତ୍ର, ନମିତା ମିଶ୍ର, ସତ୍ୟ ନାରାୟଣ ମୁଣ୍ଡଛିନା, ନୀହାରିକା ନାୟକ ଏବଂ ପାରବା ମଞ୍ଚରେ ହେମନ୍ତ ସାହୁ, ସୌରଭ ମହାପାତ୍ର, ସ୍ନିଗ୍ଧାରାଣୀ ସିଂହ, ଲିପ୍ସା ମହାରଣା ସାଂସ୍କୃତିକ କାର୍ଯ୍ୟକ୍ରମର ସଂଯୋଜନା କରିଥିଲେ। ବିଖ୍ୟାତ ସମ୍ବଲପୁରୀ ଗାୟକ ମଣ୍ଟୁ ଛୁରିଆ ଓ ସାଥୀଙ୍କ ଦ୍ୱାରା ପ୍ରସ୍ତୁତ କାର୍ଯ୍ୟକ୍ରମ ବିଳମ୍ବିତ ରାତିଯାଏଁ ଦର୍ଶକଙ୍କୁ ବାନ୍ଧି ରଖିଥିଲା। କଳାହାଣ୍ଡି ପୁଲିସ, ଜିଲ୍ଲା ଅଗ୍ନିଶମ ବିଭାଗ, ଏନ୍‌ସିସି କ୍ୟାଡେଟ୍‌, ସ୍ୱେଚ୍ଛାସେବୀମାନେ ଉତ୍ସବରେ ଶାନ୍ତିଶୃଙ୍ଖଳା ରକ୍ଷାରେ ନିୟୋଜିତ ଥିଲେ। ଉତ୍ସବ ପଡ଼ିଆରେ ୩୫୫ ପଞ୍ଜୀକୃତ ଷ୍ଟଲ ଓ ଶତାଧିକ ରାସ୍ତାକଡ଼ ଦୋକାନରେ ଲୋକଙ୍କ ବେଶ୍ ଭିଡ଼ ପରିଲକ୍ଷିତ ହୋଇଥିଲା।