କାଳିଆ ଯୋଜନା କଲା କିମିଆ! ଗାଁକୁ ଫେରିଲେ ହଜାର ହଜାର ବିଦେଶରେ ରହୁଥିବା ଲୋକ, ପଞ୍ଜାୟତ ଅଫିସ୍ ସାମ୍ନାରେ ଲମ୍ବା ଧାଡ଼ି
ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଥିବା କାଳିଆ ଯୋଜନା ପାଇଁ ଗାଁକୁ ଫେରୁଛନ୍ତି ଲୋକ। ପେଟପାଟଣା ପାଇଁ ଭିଟାମାଟି ଛାଡ଼ି ବାହାରେ ରହୁଥିବା ଓଡ଼ିଆ ଲୋକମାନେ ଏବେ କାଳିଆ ଯୋଜନାରେ ନିଜକୁ ପଂଜିକୃତ କରିବା ପାଇଁ ଗାଁକୁ ଫେରୁଥିବାର ଦେଖିବାକୁ ମୁଳୁଛି। ଜମିବାଡ଼ି ନଥିବା କୃଷି ଶ୍ରମିକଙ୍କ ପାଇଁ ଏହି ଯୋଜନାରେ ଆର୍ଥିକ ସହାୟତା ବ୍ୟବସ୍ଥା ଥିବାରୁ ଆବେଦନ କରିବାକୁ ଲୋକଙ୍କ ମଧ୍ୟରେ ବେଶ ଉତ୍ସାହ ଦେଖା ଦେଇଛି। ଏପଟେ କାଳିଆ ଯୋଜନାରେ ଦୁର୍ନୀତିର ଅଭିଯୋଗ ଆଣିଛି କଂଗ୍ରେସ।। ଯାହାକୁ ସଂପୂର୍ଣ୍ଣ ଭିତ୍ତିହୀନ ବୋଲି କହିଛି ବିଜେଡି।
Sambad is now on WhatsApp
Join and get latest news updates delivered to you via WhatsApp
ଯେଉଁମାନେ ଭିଟାମାଟି ଛାଡ଼ି ପରିବାର ସହ ସହରରେ ରହୁଛନ୍ତି, ଏବେ ‘କାଳିଆ’ ଟଙ୍କା ପାଇଁ ହେଉଛନ୍ତି ଗାଁ ମୁହାଁ। ଚାଷୀଙ୍କୁ ସହାୟତା ପାଇଁ ‘କାଳିଆ’ ଯୋଜନା ଘୋଷଣା ପରେ ରାଜ୍ୟର କୋଣ ଅନୁକୋଣରେ ଦେଖିବାକୁ ମିଳୁଛି ସେହିଭଳି ଚିତ୍ର। ପଂଚାୟତ ଅଫିସରେ ଆବେଦନ ପାଇଁ ଲାଗୁଛି ଲମ୍ବା ଲାଇନ୍।
ପ୍ରଥମ ପର୍ଯ୍ୟାୟ ଆବେଦନ ୧୫ ତାରିଖକୁ ଘୁଞ୍ଚିଥିବା ବେଳେ ଦ୍ୱିତୀୟ ପର୍ଯ୍ୟାୟରେ ମଧ୍ୟ ଆବେଦନ କରାଯାଇପାରିବ ବୋଲି ସ୍ପଷ୍ଟ କରିସାରିଛନ୍ତି ସରକାର। ସେପଟେ ବିଭିନ୍ନ ଅଂଚଳରୁ କାଳିଆ ପାଇଁ ଫର୍ମ ବିକ୍ରି ହେଉଥିବା ଖବର ଆସୁଛି। ଏସବୁ ଭିତରେ ଖବରକାଗଜରେ ଆବେଦନ ଫର୍ମ ପ୍ରକାଶ ପାଇଛି। ଏହାକୁ ଜେରକ୍ସ କରି ଆବେଦନ କରିବାକୁ ବିଜ୍ଞାପନ ଦେଇଛନ୍ତି ସରକାର। ଏହା ସତ୍ୱେ ‘କାଳିଆ’କୁ ନେଇ ଦ୍ୱନ୍ଦ୍ୱ ଦୂର ହେଉନାହିଁ।
କାଳିଆ ଯୋଜନାକୁ ନେଇ ପ୍ରଶ୍ନ ଉଠାଇଛନ୍ତି ବିରୋଧୀ। ଫ୍ଲେକ୍ସ, ବ୍ୟାନର ଆଦି ପ୍ରିଟିଂରେ ଦୁର୍ନୀତି ହୋଇଥିବା ଅଭିଯୋଗ କରିଛି କଂଗ୍ରେସ। ସେପଟେ ବିଜେପି କହିଛି ପ୍ରକୃତ ଚାଷୀ ଚିହ୍ନଟ ନକରି ଦଳୀୟ ଆଧାରରେ ଚୟନ ହେଉଛନ୍ତି ହିତାଧିକାରୀ। ତବେ ଏସବୁ ଅଭିଯୋଗକୁ ଭିତ୍ତିହୀନ ବୋଲି କହିଛନ୍ତି ମନ୍ତ୍ରୀ ଶଶିଭୂଷଣ ବେହେରା। ଗୋଟିଏ ପଟେ କାଳିଆ ଯୋଜନାକୁ ନେଇ ସାରା ରାଜ୍ୟରେ ପ୍ରବଳ ଉକ୍ରଣ୍ଠା ଦେଖିବାକୁ ମିଳିଥିବା ବେଳେ ଏହାକୁ ନେଇ ଜୋରଦାର ରାଜନୀତି ଆରମ୍ଭ ହୋଇଛି।