କାମାକ୍ଷାନଗର: ବାଣଫୁଟାକୁ କେନ୍ଦ୍ର କରି ମରଣାନ୍ତକ ଆକ୍ରମଣ
କାମାକ୍ଷାନଗର: ହାତୀ ଘଉଡ଼ାଇବା ପାଇଁ ଜଙ୍ଗଲ ବିଭାଗ ଗ୍ରାମବାସୀମାନଙ୍କୁ ଦେଇଥିବା ବାଣ ଫୁଟାଇବାକୁ କେନ୍ଦ୍ର କରି ମରଣାନ୍ତକ ଆକ୍ରମଣ ହୋଇଥିବାର ଖବର ମିଳିଛି l ଏଭଳି ଘଟଣା ଦେଖିବାକୁ ମିଳିଛି ଢେଙ୍କାନାଳ ଜିଲ୍ଲାର କାମାକ୍ଷାନଗର ଥାନା ଅନ୍ତର୍ଗତ ସୁନାଝରି ଗ୍ରାମରେl
Sambad is now on WhatsApp
Join and get latest news updates delivered to you via WhatsApp
ସୁନାଝରି ଗ୍ରାମଟି ଜଙ୍ଗଲ ମଧ୍ୟରେ ଥିବାରୁ ବନ ବିଭାଗ ତରଫରୁ ହାତୀ ଘଉଡ଼ାଇବା ପାଇଁ ସ୍ଥାନୀୟ ଗ୍ରାମବାସୀମାନଙ୍କୁ କିଛି ବାଣ ଦିଆଯାଇଥିଲା l ଗ୍ରାମର ଗୋଟିଏ ଗୋଷ୍ଠୀର କିଛି ଲୋକ ଗତକାଲି ରାତିରେ ଗ୍ରାମ ମଧ୍ୟରେ ଥିବା ଏକ ଚାନ୍ଦିନୀରେ କିଛି ବାଣ ଫୁଟାଇଥିଲେl ଏହାକୁ ନେଇ ଅନ୍ୟ ଗୋଷ୍ଠୀର କିଛି ଲୋକଙ୍କ ସହିତ ସେମାନଙ୍କର ବଚସା ହୋଇଥିଲା l
ଏହାକୁ ନେଇ ନେପାଳ ପଧାନ, ବିନତି ପଧାନ, କୃଷ୍ଣ ପଧାନ, ଭକ୍ତ ପଧାନ ଓ କୁନି ପଧାନ ପ୍ରମୁଖ ଅପର ଗୋଷ୍ଠୀର ମୂଷା ପଧାନ, ଲକ୍ଷ୍ମୀଧର ପଧାନ ଓ ଅମ୍ବୁଜ ପଧାନଙ୍କ ଉପରେ ମରଣାନ୍ତକ ଆକ୍ରମଣ କରିଥିଲେ l ଫଳରେ ଆକ୍ରମଣର ଶିକାର ହୋଇଥିବା ଆହତ ଲୋକମାନଙ୍କୁ ବିଳମ୍ବିତ ରାତିରେ କାମାକ୍ଷାନଗର ମେଡିକାଲରେ ଭର୍ତ୍ତି କରାଯାଇଥିଲା l କାମାକ୍ଷାନଗର ପୁଲିସ ମେଡିକାଲରେ ପହଞ୍ଚି ଘଟଣାର ଅଧିକ ତଦନ୍ତ ଆରମ୍ଭ କରିଛି। ରିପୋର୍ଟ ପ୍ରସ୍ତୁତ ହେବା ଯାଏଁ ଏହି ମାମଲାରେ କାହାରିକୁ ଗିରଫ କରାଯାଇନାହିଁ।