କଳାହାଣ୍ଡି ଜିଲ୍ଲାରେ କେନ୍ଦୁପତ୍ର ଫଡ଼ି ମରାମତିରେ ବ୍ୟାପକ ହରିଲୁଟ, ୩୩୩ଟି ଫଡ଼ି ମରାମତି ପାଇଁ ୭୭ ଲକ୍ଷ ଟଙ୍କା ଖର୍ଚ୍ଚ ହୋଇଛି
ଭବାନୀପାଟଣା : କଳାହାଣ୍ଡି ଜିଲ୍ଲାରେ ସବୁଜ ହୀରାର ଦୁର୍ନୀତି ଗୋଟିଏ ପରେ ଗୋଟିଏ ଗୁମର ଫିଟିବାରେ ଲାଗିଛି । କଳାହାଣ୍ଡି ଜିଲ୍ଲାରେ ୩୩୩ ଟି କେନ୍ଦୁପତ୍ର ଫଡ଼ି ଘର ପାଇଁ ୭୭ ଲକ୍ଷ ଟଙ୍କା ଖର୍ଚ୍ଚ ହୋଇଛି । କାଗଜ କଲମରେ ମିଥ୍ୟାବିଲ କରି ଲକ୍ଷ ଲକ୍ଷ ଟଙ୍କା ବାଟମାରଣା କରିବା ଘଟଣା ସାଧାରଣରେ ଚାଞ୍ଚଲ୍ୟ ପ୍ରକାଶ ପାଇଛି।
Sambad is now on WhatsApp
Join and get latest news updates delivered to you via WhatsApp
ପ୍ରାପ୍ତ ସୂଚନାରୁ ପ୍ରକାଶ ଯେ, କଳାହାଣ୍ଡି ଜିଲ୍ଲାରେ ଭବାନୀପାଟଣା କେନ୍ଦୁଲିପ ଡିଭିଜନ ଅଧୀନରେ ଭବାନୀପାଟଣା, ଲଡୁଗାଁ, କେସିଙ୍ଗା, ମଦନପୁର ରାମପୁର, ନର୍ଲା ଓ କେଗାଁ ସମେତ ୬ଟି ରେଞ୍ଜ ରହିଛି । ଏହି ୬ଟି ରେଞ୍ଜ ଅଧୀନରେ ୩୩୩ଟି ଫଡ଼ି ଘର ନିର୍ମାଣ ହୋଇଛି । ଏଥିରେ ୫ କୋଟି ୭୪ ଲକ୍ଷ କେରି କେନ୍ଦୁପତ୍ର ରଖା ଯାଇଛି। ଏହି ୩୩୩ଟି କେନ୍ଦୁପତ୍ର ଫଡ଼ିଘର ମରାମତି ପାଇଁ ଗତ ଏପ୍ରିଲ ମାସ ପ୍ରଥମ ସପ୍ତାହରେ ବିଭାଗ ପକ୍ଷରୁ ୭୭ ଲକ୍ଷ ଟଙ୍କା ଅନୁଦାନ ଆସିଥିଲା । ଲକଡାଉନ ଯୋଗୁଁ ଫଡ଼ିଘର ନିର୍ମାଣ ପାଇଁ ଶ୍ରମିକ ମିଳିନଥିବା ଦେଖିବାକୁ ମିଳିଥିଲା । ଲକଡାଉନ ଖୋଲିବା ପରେ ବର୍ତ୍ତମାନ ଜୁନ ମାସରେ କେନ୍ଦୁପତ୍ର ସଂଗ୍ରହ କରାଯାଇ ଫଡ଼ିମାନଙ୍କୁ ଆସିଥିଲା । ସମୟ ଅଭାବ ଯୋଗୁଁ ଫଡ଼ିଘର ମରାମତି ହୋଇପାରିନଥିଲା । କେନ୍ଦୁପତ୍ର ବିଭାଗ ପକ୍ଷରୁ କାଗଜ କଲମରେ ମିଥ୍ୟା ବିଲ କରି ଫଡ଼ିଘର ମରାମତି ଅର୍ଥର ବ୍ୟାପକ ହରିଲୁଟ ହୋଇଥିବା ଅଭିଯୋଗ ହୋଇଛି । ଫଳରେ ଫଡ଼ିଘର ଦୁର୍ନୀତି ଗୁମର ଚାଞ୍ଚଲ୍ୟ ତଥ୍ୟ ସାଧାରଣ ରେ ଚର୍ଚ୍ଚାର ଖୋରାକ ଯୋଗାଇଛି ।
କେନ୍ଦୁପତ୍ର ଗୋଛାକଟା, ପତ୍ର ସଂଗ୍ରହ, ବନ୍ଧେଇ ଦୁର୍ନୀତି ସାଙ୍ଗକୁ ବର୍ଷାରେ ଫଡ଼ିଘର ଜଳିଯିବା ଭଳି ଦୁର୍ନୀତି ବିଭାଗର ଅସଲମୁଖା ଖୋଲି ଦେଇଛି । କିଛି ଫଡ଼ିଘରରେ କାଁ ଭାଁ ମରାମତି କରି ବିଭାଗୀୟ କର୍ମଚାରୀମାନଙ୍କ ଲକ୍ଷାଧିକ ଟଙ୍କା ହଡ଼ପ ଘଟଣା ସାଧାରଣରେ ଭୃକୁଞ୍ଚନ ଦେଖା ଦେଇଛି । ଏହି ଘଟଣାର ଭିଜିଲାନ୍ସ ତଦନ୍ତ କରାଗଲେ ଫଡ଼ିଘର ଦୁର୍ନୀତିର ଗୁମୁର ଫିଟିବ ବୋଲି ସାଧାରଣରେ ଦାବୀ ହୋଇଛି । କେନ୍ଦୁଲିପ ଡିଭିଜନର ଫରେଷ୍ଟଗାର୍ଡ ଠାରୁ ଆରମ୍ଭ କରି ଡିଭିଜନର ଅଧିକାରୀ ପର୍ଯ୍ୟନ୍ତ ଫଡ଼ିଘର ଦୁର୍ନୀତିରେ ଲିପ୍ତ ଥିବା ଅଭିଯୋଗ ହୋଇଛି । ପ୍ରତିବର୍ଷ ମରାମତି ନାମରେ ଆସୁଥିବା ଅନୁଦାନ ହରିଲୁଟ କରି କର୍ମଚାରୀମାନେ ମାଲାମାଲ ହେଉଛନ୍ତି । ରାଜ୍ୟ ସରକାରଙ୍କ ବିଭିନ୍ନ ଯୋଜନାରେ ଆସୁଥିବା ଏହି ଅନୁଦାନକୁ ସଠିକ ବିନିଯୋଗ ନ କରି କାଗଜ କଲମରେ ଦର୍ଶାଉଥିବା ସଙ୍ଗିନ ଅଭିଯୋଗ ଆସିଛି । ଏନେଇ କେନ୍ଦୁପତ୍ର ଡିଏଫଓ ମଳୟ ଦାସଙ୍କୁ ପଚାରିବାରୁ ଗତ ଏପ୍ରିଲ ପ୍ରଥମ ସପ୍ତାହରେ ୩୩୩ଟି ଫଡ଼ିଘର ମରାମତି ପାଇଁ ପ୍ରାୟ ୭୭ ଲକ୍ଷ ଟଙ୍କା ଅନୁଦାନ ଆସିଥିଲା । ଏହି ଟଙ୍କାରେ ଫଡ଼ିଘର ମରାମତି କରାଯାଇଛି । ଫଡ଼ିଘର ମରାମତି ଦୁର୍ନୀତିକୁ ସେ ଅସ୍ବୀକାର କରିଥିଲେ ।