ପୂର୍ବ ଶତ୍ରୁତାରୁ ଯୁବକଙ୍କୁ ହତ୍ୟା

ସମ୍ବଲପୁର: ବୁର୍ଲା ଥାନା ଅଦୀନ ମୁଡିଆଡୁଙ୍ଗୁରି ନିକଟ କେନାଲ୍‌ରୁ ବିହାର ମଧୁବାଣୀର ରାଜ କୁମାର ଠାକୁରଙ୍କ ଭାଇ ରାଜେଶ ଠାକୁରଙ୍କ ମୃତଦେହ ଗୁରୁବାର ସକାଳେ ଜବତ ହୋଇଥିଲା। ପୂର୍ବଶତ୍ରୁତାରୁ ତାଙ୍କୁ ହତ୍ୟା କରାଯାଇଥିବା ରାଜ ବୁର୍ଲା ଥାନାରେ କରିଥିବା ଅଭିଯୋଗରେ ଉଲ୍ଲେଖ କରିଛନ୍ତି। ତେବେ ରାଜେଶ ପ୍ରେମ କରୁଥିବା ଝିଅର ପରିବାର ଲୋକେ ତାଙ୍କୁ ହତ୍ୟା କରିଥିବା ନେଇ ଚର୍ଚ୍ଚା ହେଉଛି। ଏହି ମାମଲାରେ ପୁଲିସ ଜଣକୁ ଶୁକ୍ରବାର ଗିରଫ କରିଛି।

ସୂଚନାନୁସାରେ, ଗତ ୯ ତାରିଖରୁ ରାଜେଶ ନିଖୋଜ ଥିଲେ। ରାଜେଶ ନିଖୋଜ ଥିବା ନେଇ ତାଙ୍କ ଭାଇ ବୁର୍ଲା ଥାନାରେ ଲିଖିତ ଅଭିଯୋଗ ମଧ୍ୟ କରିଥିଲେ। ମୁଡିଆଡୁଙ୍ଗୁରି ନିକଟରେ କେନାଲ୍‌ରେ ଏକ ମୃତଦେହ ଭାସୁଥିବା ନେଇ ଲୋକଙ୍କ ଠାରୁ ସୂଚନା ପାଇବା ପରେ ସେ ପରିବାର ସହ ସେଠାକୁ ଯାଇଥିଲେ ଏବଂ ଉକ୍ତ ମୃତଦେହଟି ରାଜେଶଙ୍କର ବୋଲି ଚିହ୍ନଟ କରିଥିଲେ। ୮ ତାରିଖ ରାତି ବୁର୍ଲା ମୁଡିଆଡୁଙ୍ଗୁରିର ଶୁଭ୍ରାଂଶୁ ପାଢ଼ୀ(୨୩) ଓ ତାର ୨ ସହଯୋଗୀ ତାଙ୍କୁ ହତ୍ୟା କରିଥିବା ନେଇ ସେ ଅଭିଯୋଗରେ ଉଲ୍ଲେଖ କରିଥିଲେ। ଏ ନେଇ ପୁଲିସ ଏକ ହତ୍ୟା ମାମଲା ରୁଜୁ କରିବା ସହ ଶୁଭ୍ରାଂଶୁ ପାଢ଼ୀକୁ ଶୁକ୍ରବାର ଗିରଫ କରିଛି।