କୋଇଡା: ଖଣି ଖାଦାନ ଭରା କୋଇଡା ଅଞ୍ଚଳରେ ରାସ୍ତା ଜାମ କିଛି ନୂଆ କଥା ନୁହେଁ । ଏହି ଅଞ୍ଚଳର ରାଜରାସ୍ତାରେ ପ୍ରତ୍ୟେକ ଦିନ କେଉଁଠି ନା କେଉଁଠି ରାସ୍ତା ଜାମ ସମସ୍ୟା ସମ୍ନାକୁ ଆସିଥାଏ । ଏମିତିକି ଅତୀତରେ ରାସ୍ତା ଜାମରେ ରୋଗୀର ମୃତ୍ୟବରଣ ଏବଂ ରାସ୍ତା ଜାମରେ ଉଚ୍ଚ ପଦସ୍ଥ ଅଧିକାରୀ ଘଣ୍ଟା ଘଣ୍ଟା ଧରି ଫସି ରହି ଫେରିଯିବାର ଇତିହାସ ଏହାର ମୂକସାକ୍ଷୀ । କୋଇଡାବାସୀଙ୍କ ପାଇଁ ଯେମିତି ଅଘୋଷିତ କର୍ଫ୍ୟୁ ଲାଗିଲା ପରି ଦୈନନ୍ଦିନ ଜୀବନ ଅତିବାହିତ କରୁଛନ୍ତି ।
Sambad is now on WhatsApp
Join and get latest news updates delivered to you via WhatsApp
ରାତି ପାହିଲେ ଖଣିଜ ପରିବହନ ପାଇଁ ରାଜ୍ୟ ଏବଂ ଜିଲ୍ଲା ବାହାରୁ ଛୁଟି ଆସେ ହଜାର ହଜାର ମାଲବାହୀ ଟ୍ରକ । ଏପଟେ ବହୁ ଖଣି ବନ୍ଦ ହେବା ଫଳରେ ଯେଉଁ ଖଣି ଚାଲିଛି ସେଥିରୁ ଖଣିଜ ପରିବହନ ପାଇଁ ଆସୁଥିବା ଟ୍ରକ ରାସ୍ତାରେ ପାର୍କ କରାଯାଉଥିବାରୁ ଭୟଙ୍କର ଜାମ ସୃଷ୍ଟି ହେଉଛି । ହଜାର ହଜାର ଲୌହ ପଥର ବୋଝେଇ ଟ୍ରକ ସମେତ ଆମ୍ବୁଲାନ୍ସ, ଚାରିଚକିଆ ଯାନ, ବାଇକ, ଘଣ୍ଟା ଘଣ୍ଟା ଧରି ଜାମରେ ଫସି ରହୁଛି । ଭୁଲ୍ ପାର୍ଶ୍ଵ ସହିତ ଡବଲ ଲାଇନ ପାର୍କିଙ୍ଗ ଓ ତା’ ସାଙ୍ଗକୁ ଶହ ଶହ ଟ୍ରକ ତେଲ ଟାଙ୍କିରେ ତେଲ ଭରିବା ପାଇଁ ଲମ୍ବା ଲାଇନ୍ କରିବା ଜାମର ମୁଖ୍ୟ କାରଣ ପାଲଟିଛି ।
ସ୍ଥାନୀୟ ପୁଲିସ ଓ ସ୍ୱେଚ୍ଛାସେବୀମାନେ ଘଟଣାସ୍ଥଳରେ ପହଞ୍ଚି ବହୁଥର ଜାମ ହଟାଇବା ପାଇଁ ଅନେକ ଚେଷ୍ଟା ଜାରି ରଖୁଥିଲେ ହେଁ ସେମାନେ ଗଲା ପରେ ଯଥା ପୁର୍ବଂ ତଥା ପରଂ। ଗୋଟିଏ ପଟେ କୋଇଡା-କାଲଟା ଜାତୀୟ ରାଜପଥ ରାସ୍ତାର ଅବସ୍ଥା ଅତି ଶୋଚନୀୟ ଥିବା ବେଳେ ପ୍ରାୟ ସମୟରେ ରାସ୍ତା ଜାମ୍ ଲାଗି ରହିଥାଏ | ଅନ୍ୟପଟେ କୋଇଡା- ଟେନସା – କଲେଇପୋଷ ଘାଟି ରାସ୍ତା ତ୍ରୁଟିପୂର୍ଣ୍ଣ ହୋଇଥିବାରୁ ଗାଡି ଚଢି ନପାରି ସବୁବେଳେ ବ୍ରେକଡାଉନ୍ ହେଉଛି, ଯାହାଫଳରେ ଭୟଙ୍କର ଜାମ ହେଉଛି । ତଥାପି ସବୁ ବିଭାଗ ଚୁପ୍| ଜରୁରୀକାଳିନ ଆମ୍ବୁଲାନ୍ସ ୧୦୮ ସମେତ ଅଗ୍ନିଶମ ବିଭାଗ ଗାଡି ବହୁ ଘଣ୍ଟା ଧରି ଜାମରେ ଫସି ରହିବା ଦୃଶ୍ୟ କୋଇଡା ଅଞ୍ଚଳ ପାଇଁ ଚିନ୍ତାର ବିଷୟ ପାଲଟିଛି । ସବୁବେଳେ ଏମିତି ଦୃଶ୍ୟ ଦେଖି ଲାଗୁଛି ଏ ଅଞ୍ଚଳର ରୋଗୀ ଆମ୍ବୁଲାନ୍ସରେ ସ୍ଥାନାନ୍ତରିତ ହେବା ସମୟରେ ଅଧା ବାଟରେ ରୋଗୀର ନିଶ୍ୱାସ ବାଜିରେ ଲାଗିଥାଏ । ଜିଲ୍ଲା ପ୍ରଶାସନ ଏ ରାସ୍ତାର ଜାମ ସମସ୍ୟା ଦୂର ନକଲେ ପୁନର୍ବାର ଆମ୍ବୁଲାନ୍ସ ଅଟକି ରହି ପୁଣି ଅନେକ ରୋଗୀଙ୍କର ମୃତ୍ୟୁ ସହ ସ୍ଥିତି ଅସମ୍ଭାଳ ହେବ ବୋଲି ବୁଦ୍ଧିଜୀବୀମାନେ ମତ ଦେଇଛନ୍ତି ।