କୋଣାର୍କ: ୨୯ତମ କୋଣାର୍କ ଉତ୍ସବର ଆଜି ଥିଲା ତୃତୀୟ ସନ୍ଧ୍ୟା। ବିଶ୍ବ ଐତିହ୍ୟ ସୂର୍ଯ୍ୟମନ୍ଦିର ନିକଟରେ ଅବସ୍ଥିତ ମୁକ୍ତକାଶ ରଙ୍ଗମଞ୍ଚରେ ବେଦ ଓ ଗୀତଗୋବିନ୍ଦ କଥାବସ୍ତୁକୁ ନେଇ ଆଜି ପରିବେଷିତ ହୋଇଥିଲା ଓଡ଼ିଶୀ ଓ ମୋହିନୀ ଆଟ୍ଟମ ନୃତ୍ୟ। ଆଜି ତୃତୀୟ ସନ୍ଧ୍ୟାର ପ୍ରଥମ ସାଂସ୍କୃତିକ କାର୍ଯ୍ୟକ୍ରମ ରୂପେ ଓଡ଼ିଶାର ଅନୁଗୁଳର ଗୁରୁ ସ୍ବପ୍ନାରାଣୀ ସିହ୍ନା ଓ ନୃତ୍ୟ ନିଳୟ ଅନୁଷ୍ଠାନର ନୃତ୍ୟଶିଳ୍ପୀମାନେ ଓଡ଼ିଶୀ ନୃତ୍ୟ ଆଧାରରେ ମଞ୍ଚ ପ୍ରବେଶ କରିଥିଲେ। ବେଦ ବର୍ଣ୍ଣିତ ଅଗ୍ନିସ୍ତୁତିକୁ ଓଡ଼ିଶୀ ନୃତ୍ୟ ଭାବେ ମଞ୍ଚରେ ପରିବେଷଣ କରି ଶିଳ୍ପୀଗଣ ଦର୍ଶକଙ୍କୁ ମଞ୍ଚମନସ୍କ କରିଥିଲେ। ପରେପରେ ପୁଣ୍ୟତୋୟା ଗଙ୍ଗା, ଯମୂନା ଓ ସରସ୍ବତୀ ନଦୀର ଗାଥାକୁ ନେଇ ନୃତ୍ୟଶିଳ୍ପୀମାନେ ନୃତ୍ୟାଭିନୟ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ଦ୍ବିତୀୟ ପର୍ଯ୍ୟାୟରେ ନୂଆଦିଲ୍ଲୀର ସୁପ୍ରସିଦ୍ଧ ମୋହିନୀ ଆଟ୍ଟମ ନୃତ୍ୟଗୁରୁ ଜୟପ୍ରଭା ମେନନ ଓ ସାଥୀମାନେ ମୋହିନୀ ଆଟ୍ଟମ ନୃତ୍ୟ ପରିବେଷଣ ପାଇଁ ମଞ୍ଚରେ ଉପନୀତ ହୋଇଥିଲେ। ନୃତ୍ୟଶିଳ୍ପୀ ମାନେ ଜୀବ, ମୋକ୍ଷ ଓ ଉପସଂହାରର କଥାକୁ ନୃତ୍ୟ ଆଧାରରେ ପରିବେଷଣ କରି ସନ୍ଧ୍ୟାକୁ ବେଶ ସ୍ମରଣୀୟ କରି ତୋଳିଥିଲେ। ଆଜି ଗ୍ୟାଲେରିପୂର୍ଣ୍ଣ ଦର୍ଶକ ଓ ପର୍ଯ୍ୟଟକଙ୍କ ଗହଣରେ ତୃତୀୟ ସନ୍ଧ୍ୟାର ସାଂସ୍କୃତିକ କାର୍ଯ୍ୟକ୍ରମର ସମାରୋହକୁ ପ୍ରିନ୍ସିପାଲ ଏଜି ଯଶୋଧାରା ରାୟ ଚୌଧୁରୀ, ପର୍ଯ୍ୟଟନ ବିଭାଗ ସଚିବ ସଚିନ ରାମଚନ୍ଦ୍ର ଯାଦବ, ଓଡ଼ିଶା ସଂଗୀତ ନାଟକ ଏକାଡେମି ସଚିବ ଡ. ବିଜୟ କୁମାର ଜେନା ଓ ଓଡ଼ିଶୀ ଗବେଷଣା କେନ୍ଦ୍ରର ମୁଖ୍ୟ ନିର୍ବାହୀ ଡ. ସଂଗୀତା ଗୋସାଇଁ ପ୍ରମୁଖ ଅତିଥି ଭାବେ ଯୋଗଦେଇ ପ୍ରଦୀପ ପ୍ରଜ୍ଜ୍ବଳନ କରି ଉଦଘାଟନ କରିଥିଲେ।