ଅଗଷ୍ଟ ୧୪ ଯାଏଁ କୋରାପୁଟ ଜିଲ୍ଲା ସଟଡାଉନ୍, ଘୋଷଣା କଲେ ଜିଲ୍ଲାପାଳ
କୋରାପୁଟ: ଆଜି କୋରାପୁଟ ଜିଲ୍ଲାରୁ ୪୬ଜଣ କରୋନା ପଜିଟିଭ୍ ଚିହ୍ନଟ ହେବା ପରେ ସମଗ୍ର ଜିଲ୍ଲାକୁ ଲକଡାଉନ୍ ଘୋଷଣା କରାଯାଇଛି। ଆଜି ମଧ୍ୟରାତ୍ରି (୧ତାରିଖ)ରୁ ଆଗାମୀ ୧୪ ତାରିଖ ମଧ୍ୟରାତ୍ରି ଯାଏଁ କୋରାପୁଟ ଜିଲ୍ଲାକୁ ଲକଡାଉନ୍ ଘୋଷଣା କରିଛନ୍ତି ଜିଲ୍ଲାପାଳ ମଧୁସୂଦନ ମିଶ୍ର। ଏ ନେଇ ନିର୍ଦେଶାବଳୀ ଜଣାଇ ଦିଆଯିବ ବୋଲି ଏକ ଭିଡିଓ ବାର୍ତ୍ତାରେ କହିଛନ୍ତି ସେ। ଏହାଛଡ଼ା ସପ୍ତାହାନ୍ତ ସଟଡାଉନ୍ ନେଇ ବି ଖୁବ୍ ଶୀଘ୍ର ସୂଚନା ଦିଆଯିବ ବୋଲି ଜିଲ୍ଲାପାଳ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ଜିଲ୍ଲାରେ ହୁ ହୁ ହୋଇ ବଢିଚାଲିଛି କରୋନା ଆକ୍ରାନ୍ତଙ୍କ ସଂଖ୍ୟା। ଏହି ମହାମାରୀ ଜିଲ୍ଲା ସାରା ମାଡି ଚାଲିଥିଲା ବେଳେ ଆଜି ପୁଣି ୪୬ ଜଣ ସଂକ୍ରମିତ ଚିହ୍ନଟ ହୋଇଛନ୍ତି। ଏମାନଙ୍କୁ ମିଶାଇ କୋରାପୁଟ ଜିଲ୍ଲାରେ କରୋନା ଆକ୍ରାନ୍ତଙ୍କ ସଂଖ୍ୟା ୮୧୭ ରେ ପହଞ୍ଚିଛି। ଉଦବେଗର ବିଷୟ, କୋରାପୁଟ ସହରରୁ ସବୁଠାରୁ ଅଧିକ ସଂକ୍ରମିତ ବାହାରୁଛନ୍ତି। ଏହା ଜିଲ୍ଲା ସଦର ମହକୁମା ହୋଇଥିବାରୁ ଏଠାରୁ କରୋନା ବ୍ୟାପିବାର ଆଶଙ୍କା ଅଧିକ ରହୁଛି। ଏପଟେ ପୁଲିସ ଓ ସ୍ବାସ୍ଥ୍ୟ କର୍ମୀମାନେ କରୋନା ଆକ୍ରାନ୍ତ ହେବା ପରେ ସମସ୍ୟା ବଢୁଛି।