ଜାନୁଆରିରେ ‘ମୋ ସରକାର’ ଓ ‘୫-ଟି’ ଅଧିନକୁ ଆସିବ ଶ୍ରମ ବିଭାଗ: ଦାଦନ ଶ୍ରମିକ ଚାଲାଣ ରୋକିବାକୁ ସବୁ ରାଜ୍ୟରେ ଖୋଲିବ ହେଲ୍ପଡେସ୍କ
ଭୁବନେଶ୍ବର: ଆସନ୍ତା ଜାନୁଆରି ମାସରୁ ୫-ଟି ଓ ମୋ ସରକାର ଅଧିନକୁ ଶ୍ରମ ବିଭାଗ ଆସିବ । ଏଥିପାଇଁ ଜିଲ୍ଲା ଶ୍ରମ ଅଧିକାରୀଙ୍କୁ ଆବଶ୍ୟକୀୟ ପରାମର୍ଶ ଦେଇଛନ୍ତି ବିଭାଗୀୟ ମନ୍ତ୍ରୀ ଓ ସଚିବ । ବିଦେଶ ରହି କାମ କରୁଥିବା ଓଡ଼ିଆ ଶ୍ରମିକଙ୍କ କଲ୍ୟାଣ ପାଇଁ ରାଜ୍ୟ ସରକାର ଏକ ବ୍ଲୁ ପ୍ରିଂଟ ପ୍ରସ୍ତୁତ କରିଛନ୍ତି । ଖୁବଶୀଘ୍ର ଏ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିବେ ବୋଲି ଜଣାପଡ଼ିଛି । ବିଦେଶରେ ଥିବା ଓଡ଼ିଆ ଶ୍ରମିକଙ୍କ ଲାଗି ଦିଲ୍ଲୀରେ ରାଜ୍ୟ ସରକାରଏକ ସ୍ବତନ୍ତ୍ର କାର୍ଯ୍ୟାଳୟ ଖୋଲିବେ । ବିଦେଶ ମନ୍ତ୍ରାଳୟ ସହଯୋଗରେ ଦେଶ ବାହାରେ ଥିବା ଶ୍ରମିକଙ୍କ କଲ୍ୟାଣ ପାଇଁ ବିଭିନ୍ନ ପଦକ୍ଷେପ ନିଆଯିବ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ଦାଦନ ଶ୍ରମିକ ଚାଲାଣ ରୋକିବାକୁ ବି ଶ୍ରମ ବିଭାଗ ତତ୍ପରତା ପ୍ରକାଶ କରିଛି । ଏଥିଲାଗି ରାଜ୍ୟର ୧୧ ଜିଲ୍ଲାକୁ ଦାଦନ ପ୍ରବଣ ଜିଲ୍ଲା ଭାବେ ଚିହ୍ନଟ କରାଯାଇଛି । ଦଲାଲମାନେ କିଭଳି ଶ୍ରମିକଙ୍କୁ ପ୍ରଲୋଭିତ କରି ରାଜ୍ୟ ବାହାରକୁ ନେଇ ପାରବେ ନାହିଁ ତାହା ଉପରେ ନଜର ରଖାଯାଇଛି ଓ କାର୍ଯ୍ୟାନୁଷ୍ଠାନ ମଧ୍ୟ ନିଆଯାଇଛି । ଆନ୍ଧ୍ରପ୍ରଦେଶ, ତେଲେଙ୍ଗାନା, କର୍ଣ୍ଣାଟକ, ତାମିଲନାଡୁ ଓ ଦିଲ୍ଲୀ ଆଦି ୫ଟି ରାଜ୍ୟରେ ରାଜ୍ୟ ସରକାରଙ୍କ ପକ୍ଷରୁ ହେଲ୍ପ ଡେସ୍କ ଖୋଲାଯାଇଛି । ଖୁବଶୀଘ୍ର ଅନ୍ୟ ରାଜ୍ୟଗୁଡ଼ିକରେ ମଧ୍ୟ ହେଲ୍ପଡେସ୍କ ଖୋଲିବା ବ୍ୟବସ୍ଥା କରାଯାଇଛି ।