ସାକ୍ଷୀଗୋପାଳ: ପୁରୀ ଜିଲ୍ଲାର ଅନ୍ୟତମ ପର୍ଯ୍ୟଟନ ସ୍ଥାନ ‘ସାକ୍ଷୀଗୋପାଳ’ସ୍ଥିତ ଶ୍ରୀଗୋପାଳଜିଉ ମନ୍ଦିର ସେବାୟତ ଅସନ୍ତୋଷ ପ୍ରସଙ୍ଗ ନେଇ ଉପୁଜିଥିବା ବିବାଦ ଶୁକ୍ରବାର ସମାଧାନ ହୋଇଛି। ରାତି ପାହିଲେ ଏଠାରେ ଲକ୍ଷାଧିକ ଭକ୍ତ ଏବଂ ଶ୍ରଦ୍ଧାଳୁ ଶ୍ରୀରାଧାଙ୍କ ପାଦ ଦର୍ଶନ କରିବେ। ଏଥି ପାଇଁ ସାକ୍ଷୀଗୋପାଳ ଉତ୍ସବ ମୁଖର ହୋଇ ଉଠିଛି।
Sambad is now on WhatsApp
Join and get latest news updates delivered to you via WhatsApp
ସେବାକାର୍ଯ୍ୟ ନେଇ ବିବାଦ ଦେଖାଯିବା ପରେ ଆଜି ବିଧାୟକ ଓ ଜିଲ୍ଲାପାଳଙ୍କ ସହିତ ସେବାୟତମାନେ ଆଲୋଚନା କରିଛନ୍ତି। ବୈଠକରେ ପାଉଣା ପ୍ରସଙ୍ଗରେ ଆଲୋଚନା ହୋଇଥିଲା। ସେବାୟତମାନଙ୍କୁ ପ୍ରତିଶ୍ରୁତି ମିଳିବା ପରେ ସେମାନେ କାର୍ଯ୍ୟରେ ଯୋଗଦେଇଛନ୍ତି।
ବୈଠକରେ ମନ୍ଦିର ଦର୍ଶନ ପାଇଁ ପାସ୍ ବ୍ୟବସ୍ଥା ଉପରେ ଆଲୋଚନା ହୋଇଥିଲା। ଏହି ଆଧାରରେ ସେବାୟତମାନଙ୍କୁ ୧୨୦୦ ଟୋକନ୍ ଦିଆଯିବାକୁ ଥିବା ବେଳେ ପ୍ରଶାସନକୁ ୩୦୦ ଟୋକନ୍ ମିଳିବ। ଶାନ୍ତିଶୃଙ୍ଖଳା ପାଇଁ ବ୍ୟାପକ ପୁଲିସ ମୁତୟନ କରାଯିବ। ସେହିଭଳି ସ୍ୱେଚ୍ଛାସେବୀ ସଂଗଠନର କର୍ମଚାରୀମାନେ ଭକ୍ତଙ୍କ ଦର୍ଶନରେ ସହଯୋଗ କରିବେ।
ଐତିହାସିକ ସାକ୍ଷୀଗୋପାଳ ମନ୍ଦିରରେ ଏଥର ଶ୍ରଦ୍ଧାଳୁମାନେ ଶ୍ରୀରାଧାଙ୍କ ପାଦ ସ୍ପର୍ଶ କରିପାରିବେ ନାହିଁ। ପୁରୀ ଜିଲ୍ଲା ପ୍ରଶାସନ ପକ୍ଷରୁ ଏଭଳି ନିଷ୍ପିତ୍ତି ନିଆଯାଇଛି। ଜିଲ୍ଲା ପ୍ରଶାସନ ପକ୍ଷରୁ ନିଆଯାଇଥିବା ପଦକ୍ଷେପ ଅନୁସାରେ ଅଁଳା ନବମୀ ଦିନ ଶ୍ରଦ୍ଧାଳୁଙ୍କ ପ୍ରବଳ ଭିଡ଼କୁ ଦୃଷ୍ଟିରେ ରଖି ନିଷ୍ପତ୍ତି ନିଆଯାଇଛି। ଶ୍ରଦ୍ଧାଳୁମାନେ କେବଳ ଦର୍ଶନ କରି ପାରିବେ କିନ୍ତୁ ସ୍ପର୍ଶ କରିପାରିବେ ନାହିଁ। ପୂର୍ବରୁ ଯଦିଓ ଏହି ନିୟମ ଥିଲା ତଥାପି ଏହାକୁ ଠିକ୍ ରୂପେ ପାଳନ ହେଉ ନଥିଲା, ଯେଉଁଥି ପାଇଁ ବେଳେ ବେଳେ ବିଶୃଙ୍ଖଳା ଦେଖାଯାଉଥିଲା। ମାତ୍ର ଏଥର ନିୟମ କଡ଼ାକଡ଼ି କରିବାକୁ ପ୍ରଶାସନ ଅଣ୍ଟା ଭିଡିଛି।