ନୂଆଦିଲ୍ଲୀ : କେନ୍ଦ୍ର ସାହିତ୍ୟ ଅକାଦେମିର ଉଚ୍ଚ କ୍ଷମତାସମ୍ପନ୍ନ ଅର୍ଥ କମିଟିକୁ ଓଡ଼ିଆ ଭାଷା ଉପଦେଷ୍ଟାମଣ୍ଡଳୀର ଆବାହକ ଡକ୍ଟର ଗୌରହରି ଦାସ ମନୋନୀତ ହୋଇଛନ୍ତି। ରବୀନ୍ଦ୍ର ଭବନଠାରେ ଅନୁଷ୍ଠିତ ନବଗଠିତ କାର୍ଯ୍ୟନିର୍ବାହୀ ସମିତିର ପ୍ରଥମ ବୈଠକରେ ଶ୍ରୀଦାସ ସର୍ବସମ୍ମତି କ୍ରମେ ମନୋନୀତ ହୋଇଥିବା ଅକାଦେମିର ସଚିବ କେ. ଶ୍ରୀନିବାସ ରାଓ ଜଣାଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଏହି ଅବସରରେ ୨୦୨୩-୨୭ ପାଞ୍ଚବର୍ଷ ପାଇଁ ବିଭିନ୍ନ ଭାଷାର ଉପଦେଷ୍ଟାମଣ୍ଡଳୀ ପୁନର୍ଗଠିତ ହୋଇଥିଲା। ଓଡ଼ିଆ ଉପଦେଷ୍ଟାମଣ୍ଡଳୀକୁ ସାଧାରଣ ପରିଷଦର ସଦସ୍ୟ ପଣ୍ଡିତ ଅନ୍ତର୍ଯ୍ୟାମୀ ମିଶ୍ର, ପ୍ରଫେସର ବିଜୟ କୁମାର ଶତପଥୀ ଏବଂ କାର୍ଯ୍ୟନିର୍ବାହୀ ସମିତି ସଭ୍ୟ ଗୌରହରି ଦାସଙ୍କ ବ୍ୟତୀତ ଆଉ ୭ଜଣ ଲେଖକ/ଲେଖିକା ମନୋନୀତ ହୋଇଛନ୍ତି। ସେମାନେ ହେଲେ, ପ୍ରୀତିଧାରା ସାମଲ, ଡକ୍ଟର ଲକ୍ଷ୍ମୀକାନ୍ତ ତ୍ରିପାଠୀ, ଡକ୍ଟର ମନୋଜ କୁମାର ପଣ୍ଡା, ମହେନ୍ଦ୍ର ପ୍ରସାଦ, ଅରୁଣ କୁମାର ସାହୁ, ପବିତ୍ର ମୋହନ କର ଏବଂ ଯୁବ କଥାକାର ଚିତ୍ତରଞ୍ଜନ ଚିରଞ୍ଜିତ। ଏମାନେ ପାଂଚବର୍ଷ ପାଇଁ ଓଡ଼ିଆ ଉପଦେଷ୍ଟା କମିଟିର ସଦସ୍ୟ ଭାବେ କାର୍ଯ୍ୟ କରିବେ।
ଆଜିର ଏହି ବୈଠକରେ ଅକାଦେମିର ସଭାପତି ମାଧବ କୌଶିକ ଅଧ୍ୟକ୍ଷତା କରିଥିବା ବେଳେ ଉପାଧ୍ୟକ୍ଷା ପ୍ରଫେସର କୁମୁଦ ଶର୍ମା ଏବଂ ସବୁ ଭାଷାର ଆବାହକ ଯୋଗ ଦେଇଥିଲେ। ସଚିବ ଡକ୍ଟର ଶ୍ରୀନିବାସ ରାଓ ବିବରଣୀ ପାଠ କରିଥିଲେ ଏବଂ ସମସ୍ତ ନୂଆ ସଭ୍ୟଙ୍କୁ ସ୍ବାଗତ କରିଥିଲେ।