ବିଳମ୍ବିତ ରାୟ: ୨୨ ବର୍ଷ ପରେ ୩ ସପ୍ଲାୟର୍ସଙ୍କୁ ଜେଲ୍‌ଦଣ୍ଡ

ବାରିପଦା : ୨୨ ବର୍ଷ ପରେ ଆସିଲା ରାୟ। ମୟୂରଭଞ୍ଜ ଜିଲ୍ଲା ହଳଦିଆ ସୁବର୍ଣ୍ଣରେଖା ଜଳସେଚନ ପ୍ରକଳ୍ପ କାମ ପାଇଁ ଅଧିକ ଦରରେ ସରଞ୍ଜାମ କିଣି ସରକାରୀ ଅର୍ଥ ବରବାଦ୍‌ ମାମଲାର ଶନିବାର ଦିନ ଶୁଣାଣି ହୋଇଛି।

ମାମଲାର ମୁଖ୍ୟ ଅଭିଯୁକ୍ତ ନିର୍ବାହୀ ଯନ୍ତ୍ରୀ ବ୍ରଜକିଶୋର ସାହୁଙ୍କ ସହ ସଲାସୁତରା କରି ଅଧିକ ମୂଲ୍ୟରେ ସରଞ୍ଜାମ ଯୋଗାଇଥିବା ୩ ସପ୍ଲାୟର୍ସ; ବାରିପଦା ସହରର ‌ନରେନ୍ଦ୍ର କୁମାର ଜୈନ ଓ ସୋମନାଥ ଅଧିକାରୀ ଏବଂ ଭୁବନେଶ୍ବର ରଘୁନାଥପୁରର ହେମେନ୍ଦ୍ର ମୋହନ ପଣ୍ଡାଙ୍କୁ ବାରିପଦା ସ୍ବତନ୍ତ୍ର ଭିଜିଲାନ୍‌ସ ଜଜ୍ ପ୍ରସନ୍ନ କୁମାର ପଣ୍ଡା ୨ ବର୍ଷ ଲେଖାଏଁ ଜେଲ୍‌ ଦଣ୍ଡା ଶୁଣାଇଛନ୍ତି। ଏଥିସହ ପ୍ରତ୍ୟେକଙ୍କୁ ୧୫ ହଜାର ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି। ଜରିମାନା ଅର୍ଥ ଅନାଦେୟ ହେଲେ ଅଧିକ ୪ ମାସ ଜେଲ୍‌ଦଣ୍ଡ ଭୋଗିବାକୁ ପଡ଼ିବ ବୋଲି ରାୟରେ ଉଲ୍ଲେଖ ରହିଛି। ତେବେ ମୁଖ୍ୟ ଅଭିଯୁକ୍ତ ଶ୍ରୀ ସାହୁଙ୍କର ଏଇ ଭିତରେ ମୃତ୍ୟୁ ହୋଇଥିବା ଜଣାପଡ଼ିଛି। ମାମଲା ଅନୁସାରେ, ୨୦୦୦ ମସିହାରେ ହଳଦିଆ ସୁବର୍ଣ୍ଣରେଖା ଜଳସେଚନ ପ୍ରକଳ୍ପ ପାଇଁ ସରଞ୍ଜାମ ଯୋଗାଣ ପାଇଁ ଟେଣ୍ଡ‌ର ହୋଇଥିଲା। ସେସମୟର ନିର୍ବାହୀ ଯନ୍ତ୍ରୀ ଶ୍ରୀ ସାହୁ କିଛି ନିର୍ଦ୍ଦିଷ୍ଟ ସପ୍ଲାୟର୍ସଙ୍କୁ ଟେଣ୍ଡର ଦେଇଥିଲେ। ତେବେ ଆବଶ୍ୟକ ସରଞ୍ଜାମ ନିର୍ଦ୍ଧାରିତ ମୂଲ୍ୟଠାରୁ ଢେର ଅଧିକ ଦରରେ କିଣାଯାଇଥିଲା। ଏନେଇ ଟେଣ୍ଡରରୁ ବାଦ୍ ପଡ଼ିଥିବା କିଛି ସପ୍ଲାୟର୍ସମାନେ ଭିଜିଲାନ୍ସରେ ଅଭିଯୋଗ କରିଥିଲେ। ଭିଜିଲାନ୍ସର ସ୍ବତନ୍ତ୍ର ଟିମ୍ ଏନେଇ ତଦନ୍ତ କରିଥିଲା। ତଦନ୍ତ ହେବାରୁ ସରଞ୍ଜାମ କିଣାରେ ହେର୍‌ଫେର୍‌ ହୋଇଥିବା ଏବଂ ବିଭାଗ ୧ କୋଟି ୧୪ ଲକ୍ଷ ୨୯ ହଜାର ୭୫୧ ଟଙ୍କା କ୍ଷତି ସହିଥିବା ରିପୋର୍ଟ ଆସିଥିଲା। ଏହାପରେ ନିର୍ବାହୀ ଯନ୍ତ୍ରୀ ଶ୍ରୀ ସାହୁଙ୍କ ସହ ସପ୍ଲାୟର୍ସ ‌ନରେନ୍ଦ୍ର, ସୋମନାଥ ଓ ହେମେନ୍ଦ୍ରଙ୍କ ନାମରେ ମାମଲା ରୁଜୁ ହୋଇ ତଦନ୍ତ ଚାଲିଥିଲା।