ବିଳମ୍ବିତ ରାୟ: ୨୨ ବର୍ଷ ପରେ ୩ ସପ୍ଲାୟର୍ସଙ୍କୁ ଜେଲ୍‌ଦଣ୍ଡ

ମୁଖ୍ୟ ଅଭିଯୁକ୍ତଙ୍କ ହୋଇସାରିଛି ଦେହାନ୍ତ, ୩୫ ବର୍ଷ ପରେ ପୂର୍ବତନ ଡବ୍ଲୁଇଓଙ୍କୁ ଜେଲ୍‌

ବାରିପଦା : ୨୨ ବର୍ଷ ପରେ ଆସିଲା ରାୟ। ମୟୂରଭଞ୍ଜ ଜିଲ୍ଲା ହଳଦିଆ ସୁବର୍ଣ୍ଣରେଖା ଜଳସେଚନ ପ୍ରକଳ୍ପ କାମ ପାଇଁ ଅଧିକ ଦରରେ ସରଞ୍ଜାମ କିଣି ସରକାରୀ ଅର୍ଥ ବରବାଦ୍‌ ମାମଲାର ଶନିବାର ଦିନ ଶୁଣାଣି ହୋଇଛି।
ମାମଲାର ମୁଖ୍ୟ ଅଭିଯୁକ୍ତ ନିର୍ବାହୀ ଯନ୍ତ୍ରୀ ବ୍ରଜକିଶୋର ସାହୁଙ୍କ ସହ ସଲାସୁତରା କରି ଅଧିକ ମୂଲ୍ୟରେ ସରଞ୍ଜାମ ଯୋଗାଇଥିବା ୩ ସପ୍ଲାୟର୍ସ; ବାରିପଦା ସହରର ‌ନରେନ୍ଦ୍ର କୁମାର ଜୈନ ଓ ସୋମନାଥ ଅଧିକାରୀ ଏବଂ ଭୁବନେଶ୍ବର ରଘୁନାଥପୁରର ହେମେନ୍ଦ୍ର ମୋହନ ପଣ୍ଡାଙ୍କୁ ବାରିପଦା ସ୍ବତନ୍ତ୍ର ଭିଜିଲାନ୍‌ସ ଜଜ୍ ପ୍ରସନ୍ନ କୁମାର ପଣ୍ଡା ୨ ବର୍ଷ ଲେଖାଏଁ ଜେଲ୍‌ ଦଣ୍ଡା ଶୁଣାଇଛନ୍ତି। ଏଥିସହ ପ୍ରତ୍ୟେକଙ୍କୁ ୧୫ ହଜାର ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି। ଜରିମାନା ଅର୍ଥ ଅନାଦେୟ ହେଲେ ଅଧିକ ୪ ମାସ ଜେଲ୍‌ଦଣ୍ଡ ଭୋଗିବାକୁ ପଡ଼ିବ ବୋଲି ରାୟରେ ଉଲ୍ଲେଖ ରହିଛି। ତେବେ ମୁଖ୍ୟ ଅଭିଯୁକ୍ତ ଶ୍ରୀ ସାହୁଙ୍କର ଏଇ ଭିତରେ ମୃତ୍ୟୁ ହୋଇଥିବା ଜଣାପଡ଼ିଛି। ମାମଲା ଅନୁସାରେ, ୨୦୦୦ ମସିହାରେ ହଳଦିଆ ସୁବର୍ଣ୍ଣରେଖା ଜଳସେଚନ ପ୍ରକଳ୍ପ ପାଇଁ ସରଞ୍ଜାମ ଯୋଗାଣ ପାଇଁ ଟେଣ୍ଡ‌ର ହୋଇଥିଲା। ସେସମୟର ନିର୍ବାହୀ ଯନ୍ତ୍ରୀ ଶ୍ରୀ ସାହୁ କିଛି ନିର୍ଦ୍ଦିଷ୍ଟ ସପ୍ଲାୟର୍ସଙ୍କୁ ଟେଣ୍ଡର ଦେଇଥିଲେ। ତେବେ ଆବଶ୍ୟକ ସରଞ୍ଜାମ ନିର୍ଦ୍ଧାରିତ ମୂଲ୍ୟଠାରୁ ଢେର ଅଧିକ ଦରରେ କିଣାଯାଇଥିଲା। ଏନେଇ ଟେଣ୍ଡରରୁ ବାଦ୍ ପଡ଼ିଥିବା କିଛି ସପ୍ଲାୟର୍ସମାନେ ଭିଜିଲାନ୍ସରେ ଅଭିଯୋଗ କରିଥିଲେ। ଭିଜିଲାନ୍ସର ସ୍ବତନ୍ତ୍ର ଟିମ୍ ଏନେଇ ତଦନ୍ତ କରିଥିଲା। ତଦନ୍ତ ହେବାରୁ ସରଞ୍ଜାମ କିଣାରେ ହେର୍‌ଫେର୍‌ ହୋଇଥିବା ଏବଂ ବିଭାଗ ୧ କୋଟି ୧୪ ଲକ୍ଷ ୨୯ ହଜାର ୭୫୧ ଟଙ୍କା କ୍ଷତି ସହିଥିବା ରିପୋର୍ଟ ଆସିଥିଲା। ଏହାପରେ ନିର୍ବାହୀ ଯନ୍ତ୍ରୀ ଶ୍ରୀ ସାହୁଙ୍କ ସହ ସପ୍ଲାୟର୍ସ ‌ନରେନ୍ଦ୍ର, ସୋମନାଥ ଓ ହେମେନ୍ଦ୍ରଙ୍କ ନାମରେ ମାମଲା ରୁଜୁ ହୋଇ ତଦନ୍ତ ଚାଲିଥିଲା।
୩୫ ବର୍ଷ ପରେ ପୂର୍ବତନ ଡବ୍ଲୁଇଓଙ୍କୁ ଜେଲ୍‌

ବାଲେଶ୍ବର : ଦୀର୍ଘ ୩୫ ବର୍ଷ ଧରି ବିଚାରାଧୀନ ରହିଥିବା ଏକ ସରକାରୀ ଅର୍ଥ ହଡ଼ପ ମାମଲାର ବିଚାର କରି ବାଲେଶ୍ବର ସ୍ବତନ୍ତ୍ର ଭିଜିଲାନ୍ସ କୋର୍ଟର ବିଚାରପତି ଶିଖାରାଣୀ ରଥ ଶନିବାର ଦିନ ଅଭିଯୁକ୍ତଙ୍କୁ ୧୫ ହଜାର ଟଙ୍କା ଜରିମାନା ସହ ୧ବର୍ଷ ଜେଲଦଣ୍ଡ ଏବଂ ତାହା ଅନାଦେୟ ହେଲେ ଆଉ ୨ ମାସ ଅଧିକ ଜେଲଦଣ୍ଡ ଭୋଗିବାକୁ ରାୟରେ ପ୍ରକାଶ କରିଛନ୍ତି। ଅଭିଯୁକ୍ତଜଣକ ହେଲେ ଭଦ୍ରକ ଜିଲ୍ଲା ତିହିଡ଼ି ବ୍ଲକର ଅବସରପ୍ରାପ୍ତ ମଙ୍ଗଳ ସମ୍ପ୍ରସାରଣ ଅଧିକାରୀ ହୃଷୀକେଶ ମଲ୍ଲିକ।

୧୯୮୨ ଏପ୍ରିଲ ୬ରୁ ୧୯୮୫ ମସିହା ଜୁନ୍‌ ୨୪ ପର୍ଯ୍ୟନ୍ତ ଏବଂ ୧୯୮୫ ମସିହା ସେପ୍ଟେମ୍ବର ୨୦ରୁ ୧୯୮୬ ମସିହା ଜାନୁଆରି ୧୬ତାରିଖ ପର୍ଯ୍ୟନ୍ତ ଭଦ୍ରକ ଜିଲ୍ଲା ତିହିଡ଼ି ବ୍ଲକରେ ପଢ଼ୁଥିବା ପ୍ରି-ମାଟ୍ରିକରେ ପଢ଼ୁଥିବା ଅନୁସୂଚିତ ଜାତି ଓ ଜନଜାତି ଛାତ୍ରଛାତ୍ରୀଙ୍କ ସ୍କଲାରସିପ୍‌ ଟଙ୍କା ତତ୍କାଳୀନ ବ୍ଲକ ମଙ୍ଗଳ ସମ୍ପ୍ରସାରଣ ଅଧିକାରୀ ହୃଷୀକେଶ ମଲ୍ଲିକ ହଡ଼ପ କରିଥିଲେ। ଏହି ମାମଲାରେ ବାଲେଶ୍ବର ଭିଜିଲାନ୍ସ ବିଭାଗ ୦୨/୧୯୮୭ରେ ମାମଲା ରୁଜୁ କରିଥିଲା ଏବଂ ଏହି ମାମଲା ବାଲେଶ୍ବର ସ୍ବତନ୍ତ୍ର ଭିଜିଲାନ୍ସ କୋର୍ଟରେ ବିଚାରାଧୀନ ଥିଲା। ଆଜି ପୂର୍ବାହ୍ନରେ ବିଚାରପତି ଶିଖାରାଣୀ ରଥ ଅଭିଯୁକ୍ତ ତଥା ଅବସରପ୍ରାପ୍ତ ତତ୍କାଳୀନ ମଙ୍ଗଳ ସମ୍ପ୍ରସାରଣ ଅଧିକାରୀଙ୍କୁ ଦଣ୍ଡ ଶୁଣାଣି କରିଥିଲେ।
ସୂଚନାଥାଉକି, ଅଭିଯୁକ୍ତ ଶ୍ରୀ ମଲ୍ଲିକ ଦୀର୍ଘବର୍ଷ ଧରି ଚାକିରିରୁ ଅବସର ନେଲେଣି। ତାଙ୍କ ବିରୋଧରେ ଏହି ମାମଲାକୁ ୩୫ବର୍ଷ ଚାଲିଥିବା ବେଳେ ସେ ଏବେ ବୃଦ୍ଧ।

 

ସମ୍ବନ୍ଧିତ ଖବର